AKPបន្ទាយមានជ័យ ថ្ងៃទី0៨ ខែកញ្ញា ឆ្នាំ២០២៥ --ក្រុមប្រឹក្សាខេត្តបន្ទាយមានជ័យ បានបើកកិច្ចប្រជុំសាមញ្ញលើកទី១៦ អាណត្តិទី៤ របស់ខ្លួន ដើម្បីពិនិត្យ និងអនុម័តលើរបៀបវារៈសំខាន់ៗមួយចំនួន សំដៅជំរុញប្រសិទ្ធភាពការងាររដ្ឋបាល និងធានានូវតម្លាភាពក្នុងការគ្រប់គ្រង។

 កិច្ចប្រជុំនេះបានធ្វើឡើងនៅសាលប្រជុំក្រុមប្រឹក្សាខេត្តនាព្រឹកថ្ងៃទី៨ ខែកញ្ញា ឆ្នាំ២០២៥ ក្រោមអធិបតីភាពឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងលោកស្រី រស់ សុផានី អភិបាលរងខេត្ត តំណាងឲ្យឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយ

មានជ័យ។

 
 មានការចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលរងខេត្ត លោក លោកស្រីអភិបាល និងអភិបាលរងក្រុង ស្រុក មន្ទីរអង្គភាពពាក់ព័ន្ធ រួមទាំងកងកម្លាំងទាំងបី។
    កិច្ចប្រជុំនេះបានពិនិត្យ ពិភាក្សា និងអនុម័តលើរបៀបវារៈសំខាន់ៗ ដូចជា  ពិនិត្យ និងអនុម័តសេចក្តីព្រាងកំណត់ហេតុកិច្ចប្រជុំសាមញ្ញលើកទី១៥ អាណត្តិទី៤  ពិនិត្យ និងអនុម័តសេចក្តីព្រាងរបាយការណ៍ប្រចាំខែសីហា ឆ្នាំ២០២៥ របស់រដ្ឋបាលខេត្ត
  ពិនិត្យ និងអនុម័តសេចក្តីព្រាងតារាងបែងចែកប្រាក់រង្វាន់លើកទឹកចិត្ត និងថវិកាពង្រឹងយន្តការរដ្ឋបាលសម្រាប់ខែសីហា ឆ្នាំ២០២៥។
     ថ្លែងក្នុងកិច្ចប្រជុំនោះ ឯកឧត្តម ប្លែក វ៉ារី បានសង្កត់ធ្ងន់ពីសារៈសំខាន់នៃការអនុម័តលើរបៀបវារៈទាំងអស់នេះ ដែលជាមូលដ្ឋានគ្រឹះក្នុងការជំរុញការងាររដ្ឋបាលប្រកបដោយប្រសិទ្ធភាព និងធានាបាននូវតម្លាភាពក្នុងការគ្រប់គ្រង។ ឯកឧត្តមក៏បានសម្តែងការកោតសរសើរចំពោះកិច្ចខិតខំប្រឹងប្រែងរបស់មន្រ្តីគ្រប់លំដាប់ថ្នាក់ដែលបានបម្រើសេវាសាធារណៈជូនប្រជាពលរដ្ឋដោយយកចិត្តទុកដាក់។

ឯកឧត្តមប្រធានក្រុមប្រឹក្សាខេត្ត ក៏បានជំរុញដល់អាជ្ញាធរ មន្រ្តីរាជការ និងកងកម្លាំងទាំងអស់ ត្រូវបន្តពង្រឹងការងារសន្តិសុខ និងសណ្តាប់ធ្នាប់ឱ្យបានល្អប្រសើរ ដើម្បីរួមចំណែកដល់ការអភិវឌ្ឍខេត្តឱ្យកាន់តែរីកចម្រើន។

លោកស្រី រស់ សុផានី អភិបាលរងខេត្ត បានគូសបញ្ជាក់ថា របាយការណ៍ដែលបានដាក់ជូនកិច្ចប្រជុំបានឆ្លុះបញ្ចាំងពីវឌ្ឍនភាពជាក់ស្តែងនៃការងារអភិវឌ្ឍន៍ខេត្តដែលបានអនុវត្តកន្លងមក។ លោកស្រីបានលើកទឹកចិត្តដល់មន្រ្តីទាំងអស់ ឱ្យបន្តខិតខំប្រឹងប្រែងបន្ថែមទៀត ដើម្បីលើកកម្ពស់គុណភាពសេវាសាធារណៈ និងសម្រេចបាននូវគោលដៅអភិវឌ្ឍន៍ដែលបានកំណត់ទុក។
   សូមបញ្ជាក់ថា  កិច្ចប្រជុំសាមញ្ញលើកទី១៦ របស់ក្រុមប្រឹក្សាខេត្តបន្ទាយមានជ័យនេះ គឺបានបង្ហាញពីការប្តេជ្ញាចិត្តរបស់ថ្នាក់ដឹកនាំខេត្តក្នុងការជំរុញប្រសិទ្ធភាពការងារ ការលើកកម្ពស់សេវាសាធារណៈ និងការធានាតម្លាភាព ក្នុងគោលដៅរួមចំណែកអភិវឌ្ឍខេត្តបន្ទាយមានជ័យឱ្យមានការរីកចម្រើនជាបន្តបន្ទាប់៕
ដោយ ៖ឈុនសារ៉ាត