AKP ភ្នំពេញ ថ្ងៃទី០៧ ខែកញ្ញា ឆ្នាំ២០២៥--

នៅសាលាបុរីកោះពេជ្រ កម្មវិធីកម្រាលព្រំក្រហម និងប្រគល់ពានរង្វាន់នៃមហោស្រពភាពយន្តកម្ពុជាអាស៊ី លើកទី៣ បានប្រព្រឹត្តទៅដោយជោគជ័យ ក្រោមអធិបតីភាពដ៏ខ្ពង់ខ្ពស់របស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងដោយមានការចូលរួមពីសំណាក់ឯកឧត្ដម លោកជំទាវ ជាថ្នាក់ដឹកនាំក្រសួងពាក់ព័ន្ធ ព្រមទាំងផលិតករភាពយន្ត សិល្បករ សិល្បការិនី និង​ភ្ញៀវ​កិត្តិយស​ជាតិ​ អន្តរជាតិ​សរុបប្រមាណ៥០០រូប នៅយប់ថ្ងៃទី០៦ ខែកញ្ញា ឆ្នាំ២០២៥។

ក្នុងឱកាសនេះ លោកជំទាវបណ្ឌិតសភាចារ្យបានថ្លែងថា ការរៀបចំមហោស្រពនេះបានលើកកម្ពស់ចំណងមិត្តភាពនិងកិច្ចសហប្រតិបត្តិការលើវិស័យវប្បធម៌រវាងប្រទេសកម្ពុជា និងបណ្តាប្រទេសក្នុងតំបន់ ជាពិសេសលើវិស័យភាពយន្ត និងជាការផ្តល់ឱកាសសម្រាប់អ្នកដឹកនាំរឿង ផលិតករ សិល្បករ សិល្បការិនី និងអ្នកដែលមានអាជីពក្នុងវិស័យភាពយន្តបានជួបជុំគ្នា ចែករំលែកចំណេះដឹង បទពិសោធន៍ពីគ្នាទៅវិញទៅមក និងស្វែងរកឱកាសវិនិយោគថ្មីៗបន្ថែមទៀត ដើម្បីរួមចំណែកដល់ការអភិវឌ្ឍឧស្សាហកម្មភាពយន្ត និងវប្បធម៌នៃប្រទេសរបស់យើងទាំងអស់គ្នា។

លោកជំទាវសង្ឃឹមថា ភាពជាដៃគូដែលបានបង្កើតឡើងនៅទីនេះ នឹងត្រួសត្រាយផ្លូវសម្រាប់កិច្ចសហការផលិត ការផ្លាស់ប្តូរបច្ចេកទេស និងការចែករំលែកភាពច្នៃប្រឌិតរួមគ្នានៅក្នុងឧស្សាហកម្មភាពយន្តនាពេលអនាគត ដើម្បីរួមចំណែកដល់ការលើកកម្ពស់កំណើនប្រកបដោយនិរន្តរភាពនៃវិស័យភាពយន្ត និងរក្សាបាននូវភាពសំបូរបែបនៃបេតិកភណ្ឌវប្បធម៌របស់យើង។

មហោស្រពភាពយន្តកម្ពុជាអាស៊ី បានទទួលស្នាដៃភាពយន្តចូលរួមចំនួន១៥០ចំណងជើង ក្នុងនោះមានភាពយន្តខ្នាតវែងចំនួន ៦០ចំណងជើង និងភាពយន្តខ្នាតខ្លីចំនួន៩០ចំណងជើង។ ពានរង្វានសរុបចំនួន ១៩ពានបានផ្តល់ជូនផលិតករ អ្នកនិពន្ធ អ្នកដឹកនាំរឿង ព្រមទាំងតារាសម្តែងឆ្នើម ក្នុងនោះ ភាពយន្តខ្នាតខ្លីកម្ពុជា មានចំណងជើងថា Respoken បានទទួលពានរង្វាន់  Best Short Film Director និង ពានរង្វាន់ Best Short Film ចំណែកភាពយន្តរឿង ភ្លើងឆេះក្លឹបក្រោមដី របស់ផលិតកម្មអិលឌី អេនធើធេនម៊ិន បានទទួលបានពានរង្វាន់តួឯកស្រីឆ្នើម (Best Leading Actress) ដែលមានកញ្ញា ជា សុភាព ជាតួសម្តែងផងដែរ។

 
សូមបញ្ជាក់ផងដែរ មហោស្រពភាពយន្តកម្ពុជាអាស៊ីលើកទី៣ នេះ បានប្រព្រឹត្តទៅចាប់ពីថ្ងៃទី០៤ ដល់ថ្ងៃទី០៨ ខែកញ្ញា ឆ្នាំ២០២៥ ដោយមានកម្មវិធីអមមួយចំនួន ដូចជាការចាក់បញ្ចាំងភាពយន្ត វេទិកាជជែកអំពីឧស្សាហកម្មភាពយន្ត និងពិធីដើរលើកម្រាលព្រំក្រហមនិងប្រគល់ពានរង្វាន់។ មហោស្រពនេះសហការរៀបចំដោយនាយកដ្ឋានសិល្បៈភាពយន្តនិងផ្សព្វផ្សាយវប្បធម៌  និងគណៈកម្មការរៀបចំមហោស្រពភាពយន្តកម្ពុជា-អាស៊ី (CAFF) ព្រមទាំងមានការគាំទ្រពីក្រសួងវប្បធម៌និងវិចិត្រសិល្បៈ៕

ដោយ ណយ នឿន (ប្រភព៖ ក្រសួងវប្បធម៌)