AKP កំពង់ធំ ថ្ងៃទី០៧ ខែកញ្ញា ឆ្នាំ២០២៥--

លោក ឃីម សុខឃាង អភិបាលនៃគណៈអភិបាលស្រុកប្រាសាទសំបូរ កាលពីថ្ងៃទី០៦ ខែកញ្ញា ឆ្នាំ២០២៥ បានដឹកនាំក្រុមការងារចុះពិនិត្យដោយផ្ទាល់នូវទីតាំងជាក់ស្តែងសម្រាប់អនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចដំណាក់កាលទី៣ (LASED III) នៅឃុំគោល ស្រុកប្រាសាទសំបូរ ខេត្តកំពង់ធំ។

លោក ឃីម សុខឃាង បានបញ្ជាក់ថា ការចុះត្រួតពិនិត្យនេះមានគោលបំណងសំខាន់ដើម្បីវាយតម្លៃ និងពិនិត្យទីកន្លែងបែងចែកដីសម្បទានសង្គមកិច្ចជូនប្រជាពលរដ្ឋក្រីក្រ និងគ្មានដីធ្លី។ គម្រោងនេះនឹងផ្តល់ជូននូវដីសម្រាប់សង់លំនៅដ្ឋាន និងដីសម្រាប់ធ្វើកសិកម្ម ដើម្បីជួយលើកកម្ពស់ជីវភាព និងកាត់បន្ថយភាពក្រីក្ររបស់ប្រជាពលរដ្ឋក្នុងមូលដ្ឋាន។

លោកអភិបាលស្រុកបានពិភាក្សាជាមួយក្រុមការងារជំនាញ និងអាជ្ញាធរមូលដ្ឋាន ដើម្បីធានាថាការអនុវត្តគម្រោងប្រព្រឹត្តទៅដោយរលូន និងមានតម្លាភាព។ លោកបានសង្កត់ធ្ងន់លើសារៈសំខាន់នៃការរៀបចំហេដ្ឋារចនាសម្ព័ន្ធចាំបាច់មួយចំនួនដូចជា ផ្លូវថ្នល់ និងប្រព័ន្ធធារាសាស្ត្រ ដើម្បីសម្រួលដល់ការរស់នៅ និងការបង្កបង្កើនផលរបស់ប្រជាពលរដ្ឋ។

គម្រោង LASED III គឺជាយន្តការដ៏សំខាន់មួយរបស់រាជរដ្ឋាភិបាលកម្ពុជា ដែលផ្តោតលើការផ្តល់ដីសម្បទានសង្គមកិច្ចដល់ប្រជាពលរដ្ឋក្រីក្រពិតប្រាកដ ដែលគ្មានដីឬមានដីតិចតួច។បង្កើតសហគមន៍កសិកម្មថ្មីមួយ ដែលមាននិរន្តរភាព និងជួយពង្រឹងសន្តិសុខស្បៀងនៅក្នុងសហគមន៍ផងដែរ។

លោក ឃីម សុខឃាង បានបញ្ជាក់ថា អាជ្ញាធរស្រុកនឹងបន្តសហការយ៉ាងជិតស្និទ្ធជាមួយស្ថាប័នពាក់ព័ន្ធ ដើម្បីសម្របសម្រួលការរៀបចំផែនការនិងចាប់ផ្តើមដំណើរការបែងចែកដីជូនប្រជាពលរដ្ឋតាមគោលការណ៍ដែលបានកំណត់និងបានអំពាវនាវដល់ប្រជាពលរដ្ឋដែលបានចុះឈ្មោះក្នុងគម្រោងឱ្យចូលរួមសហការជាមួយក្រុមការងារ ដើម្បីធានាថាការអនុវត្តគម្រោងនេះទទួលបានជោគជ័យ មានតម្លាភាព និងផ្តល់អត្ថប្រយោជន៍ដល់ពួកគាត់បានទាន់ពេលវេលា៕

ដោយ ស៊ុម វណ្ណា