AKP គន់មីង ថ្ងៃទី០៦ ខែកញ្ញា ឆ្នាំ២០២៥ --

លោក ចូវ ជានពីន (Zhou Jianbin) អនុប្រធានប្រតិបត្តិក្រុមហ៊ុនថាមពលអគ្គីសនីឡានឆាង-មេគង្គបញ្ជូនបណ្តាញអគ្គិសនីខាងត្បូងប្រទេសចិន (China Southern Power Grid Lancang-Mekong International Co., Ltd. - CSG-LMI)  បានរំលេចពីតួនាទីសំខាន់របស់ប្រព័ន្ធផ្សព្វផ្សាយក្នុងការលើកកម្ពស់កិច្ចសហប្រតិបត្តិការថាមពលរវាងកម្ពុជា និងចិន។

ក្នុងឱកាសទទួលគណៈប្រតិភូសារព័ត៌មានកម្ពុជា ដឹកនាំដោយ ឯកឧត្តម ឈាន លាង រដ្ឋលេខាធិការក្រសួងព័ត៌មាន ក្នុងដំណើរទស្សនកិច្ចនៅទីស្នាក់ការកណ្តាលរបស់ក្រុមហ៊ុន CSG-LMI នៅទីក្រុងគុនមីង ខេត្តយូណាន ប្រទេសចិន នារសៀលថ្ងៃទី០៦ ខែកញ្ញា ឆ្នាំ២០២៥ លោក ចូវ ជានពីន បានគូសបញ្ជាក់អំពីសក្តានុពល នៃកិច្ចសហប្រតិបត្តិការថាមពលរវាងប្រទេសទាំងពីរ ដែលនឹងត្រូវបានពង្រឹងបន្ថែមទៀត តាមរយៈការគាំទ្រពីក្រសួងព័ត៌មាន និងដៃគូប្រព័ន្ធផ្សព្វផ្សាយកម្ពុជា។

លោកអនុប្រធានប្រតិបត្តិក៏បានស្នើបង្កើតយន្តការទំនាក់ទំនងជាប្រចាំជាមួយក្រសួង និងដៃគូប្រព័ន្ធផ្សព្វផ្សាយ ដើម្បីបង្កើនការផ្លាស់ប្តូរព័ត៌មាន កសាងទំនុកចិត្តទៅវិញទៅមក និងរាយការណ៍ទាន់ពេលវេលាអំពីព័ត៌មានដែលទាក់ទិននឹងដំណើរការគម្រោងវិធានការការពារបរិស្ថាន និងកិច្ចការសង្គម។

លោក ចូវ ជានពីន បានសន្យានឹងបន្កកិច្ចសហប្រតិបត្តិការជាមួយកម្ពុជា ដោយផ្តោតលើការចែករំលែកចំណេះដឹង ការផ្លាស់ប្តូរវប្បធម៌ និងគម្រោងសហគមន៍ដូចជាគំនិតផ្តួចផ្តើមថាមពលតាតៃ។ លោកបន្តថា ក្រុមហ៊ុន CSG-LMI គាំទ្រដល់ការផ្លាស់ប្តូរថាមពលបៃតងនៅកម្ពុជា និងការធ្វើសមាហរណកម្មក្នុងតំបន់តាមរយៈកម្មវិធីបណ្តុះបណ្តាល ដោយបានផ្តល់មូលនិធិយ៉ាងពេញលេញដល់និស្សិតចំនួន ១៧១ នាក់មកពីប្រទេសមេគង្គក្នុងផ្នែកវិស្វកម្មថាមពល និងវិទ្យាសាស្ត្រវេជ្ជសាស្ត្រ។ រហូតមកដល់ពេលនេះ អ្នកឯកទេសកម្ពុជាជាង ៣០០នាក់ បានទទួលការបណ្តុះបណ្តាលដែលគាំទ្រដោយក្រុមហ៊ុន CSG-LMI។

ជាការឆ្លើយតប ឯកឧត្តម ឈាន លាង បានកោតសរសើរដល់ក្រុមហ៊ុន CSG-LMI ដែលបានបង្កើតនូវបច្ចេកវិទ្យាទំនើបដើម្បីបម្រើដល់ប្រតិបត្តិការរបស់ខ្លួនឱ្យកាន់តែមានប្រសិទ្ធភាព និងបានថ្លែងអំណរគុណចំពោះក្រុមហ៊ុនដែលបានគាំទ្រក្នុងការកសាងសមត្ថភាពរបស់មន្ត្រីជំនាញកម្ពុជា។ ឯកឧត្តមក៏បានអញ្ជើញ ក្រុមហ៊ុន CSG-LMI ទៅស្វែងរកឱកាសវិនិយោគបន្ថែមទៀតនៅក្នុងប្រទេសកម្ពុជាផងដែរ។

គួរបញ្ជាក់ថា ក្រុមហ៊ុន CSG-LMI ត្រូវបានបង្កើតឡើងក្នុងឆ្នាំ២០២៤ និងមានទីស្នាក់ការកណ្តាលនៅខេត្តយូណាន ប្រទេសចិន។ ក្រុមហ៊ុន មានឯកទេសក្នុងកិច្ចសហប្រតិបត្តិការថាមពលឆ្លងព្រំដែនទូទាំងតំបន់មេគង្គ និងអាស៊ាន ដោយផ្តោតលើការតភ្ជាប់បណ្តាញ ការវិនិយោគ និងការប្រឹក្សាបច្ចេកទេស ហើយបានពង្រីកអាជីវកម្មរបស់ខ្លួនទៅកាន់ប្រទេស និងតំបន់ចំនួន ១២ ដូចជា សិង្ហបុរី ម៉ាឡេស៊ី ឥណ្ឌូនេស៊ី ហ្វីលីពីន ប្រ៊ុយណេ ទីម័រខាងកើត និងបង់ក្លាដែស៕

ដោយ នីកា