AKP កំពង់ស្ពឺ ថ្ងៃទី០៦ ខែកញ្ញា ឆ្នាំ២០២៥--

ឯកឧត្តម ហន ភក្តី អភិបាលរងខេត្តកំពង់ស្ពឺ និងជាក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមុនីជ័យ បានដឹកនាំកិច្ចប្រជុំពិនិត្យ និងជំរុញការងារដោះស្រាយបញ្ហាប្រឈម សំណូមពររបស់ប្រជាពលរដ្ឋ ដែលបានលើកឡើងក្នុងវេទិកាសាធារណៈនៅស្រុកសាមគ្គីមុនីជ័យ ខេត្តកំពង់ស្ពឺ កាលពីថ្ងៃទី០៥ ខែកញ្ញា ឆ្នាំ២០២៥។

 
ក្រោយពីបានស្តាប់នូវរបាយការណ៍ការងារពីលោកអភិបាលស្រុក សមាជិក សមាជិកានៃអង្គប្រជុំបានពិភាក្សាគ្នាយ៉ាងល្អិតល្អន់ និងបានដាក់ចេញវិធានការត្រូវអនុវត្តចំពោះមុខ ដើម្បីឆ្លើយតបទៅនឹងសំណូមពររបស់ប្រជាពលរដ្ឋដែលបានលើកឡើងក្នុងវេទិកាសាធារណៈ នៅស្រុកសាមគ្គីមុនីជ័យនាពេលកន្លងមក។

ឯកឧត្តម ហន ភក្តី បានណែនាំដល់ក្រុមការងារគ្រប់លំដាប់ថ្នាក់ ពិសេសក្រុមការងារ ភូមិ ឃុំ ឱ្យខិតខំអនុវត្តនូវវិធានការ និងសកម្មភាពការងារចំពោះមុខដូចដែលបានឯកភាពគ្នាក្នុងកិច្ចប្រជុំនេះ និងបានជំរុញ ណែនាំអាជ្ញាធរមូលដ្ឋានឱ្យខិតខំបន្តអនុវត្តសេវាសាធារណៈជូនប្រជាពលរដ្ឋឱ្យបានល្អប្រសើរ ជាពិសេសការចុះបញ្ជីអត្រានុកូដ្ឋានឱ្យចប់ត្រឹមត្រូវទោះជាយឺតក៏ដោយ។ សូមឱ្យបងប្អូនប្រជាពលរដ្ឋចូលរួមអនុវត្ត «ភូមិ-ឃុំ-សង្កាត់មានសុវត្ថិភាព» ទាំងអស់គ្នាដោយអប់រំកូនចៅឱ្យល្អប្រសើរដើម្បីធានាបាននូវ សន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ ហើយបើសិនជាបងប្អូនប្រជាពលរដ្ឋនៅក្នុងភូមិសាស្ត្រខេត្តកំពង់ស្ពឺ បានជួបហេតុការណ៍ហើយត្រូវការ អន្តរាគមន៍ពីកម្លាំងកងរាជអាវុធហត្ថខេត្តកំពង់ស្ពឺ សូមបងប្អូនទំនាក់ទំនងមកលេខទូរសព្ទអន្តរាគមន៏សង្គ្រោះបន្ទាន់ (HoteLine)1292  ដោយមិនចំណាយលុយនៅក្នុងការខលឡើយ (24/24ម៉ោង) ឬអាចទំនាក់ទំនងតាមបណ្តាញ (Telegram,WhatsApp,CoolApp) និងតាមរយៈលេខទូរសព្ទ 010 61 68 68 ដែលជាលេខរបស់បញ្ជាការកងរាជអាវុធហត្ថខេត្តកំពង់ស្ពឺ៕

ដោយ លឹម សាន្ត