AKP បន្ទាយមានជ័យ ថ្ងៃទី០៦ ខែកញ្ញា ឆ្នាំ២០២៥--

រដ្ឋបាលខេត្តបន្ទាយមានជ័យ សហការជាមួយក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃសៅរ៍ ទី០៦ ខែកញ្ញា ឆ្នាំ២០២៥នេះ បានរៀបចំវេទិកាការងារ និងវេទិកាផ្សព្វផ្សាយស្ដីពីអត្ថប្រយោជន៍នៃរបបសន្តិសុខសង្គមជូនប្រជាពលរដ្ឋជាង៣០០នាក់ ដែលទើបវិលត្រឡប់ពីប្រទេសថៃ ក្នុងឃុំស្លក្រាម ស្រុកស្វាយចេក។ វេទិកានេះធ្វើឡើងក្នុងគោលបំណងផ្ដល់ព័ត៌មាន និងឱកាសការងារដល់ពលរដ្ឋទាំងនោះ ដើម្បីជួយសម្រួលដល់ការវិលត្រឡប់មករស់នៅ និងស្វែងរកការងារធ្វើប្រកបដោយចីរភាពក្នុងប្រទេស។

វេទិកានេះប្រព្រឹត្តទៅក្រោមអធិបតីភាពលោក យឹម សំណាង អភិបាលរងខេត្តបន្ទាយមានជ័យ តំណាងឱ្យឯកឧត្តម អ៊ុ រាត្រី អភិបាលខេត្ត និងលោកស្រី ហង្ស សេរីវល័ក្ខណ៍ អនុប្រធានទីភ្នាក់ងារជាតិមុខរបរការងារ ដោយមានការចូលរួមពីលោក នួន ស៊ីណា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្ត អាជ្ញាធរមូលដ្ឋាន រួមទាំងតំណាងក្រុមហ៊ុន និងសហគ្រាសជាច្រើនដែលកំពុងត្រូវការបុគ្គលិក។

ក្នុងឱកាសនោះ លោក យឹម សំណាង បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ដែលបានចាត់ទុកពលករខ្មែរជាធនធានដ៏សំខាន់របស់ប្រទេសជាតិ។ លោកបានថ្លែងថា «រាជរដ្ឋាភិបាលមិនដែលបោះបង់ចោលប្រជាពលរដ្ឋរបស់ខ្លួននោះទេ មិនថាពួកគេនៅទីណានោះទេ។ វេទិកានេះគឺជាសក្ខីភាពមួយដែលបង្ហាញពីការខិតខំរបស់រដ្ឋាភិបាលក្នុងការជួយដោះស្រាយបញ្ហាប្រឈមរបស់បងប្អូនដែលទើបត្រឡប់មកពីក្រៅប្រទេស ពិសេសក្នុងការផ្ដល់ឱកាសការងារដែលសមស្របតាមជំនាញ និងបទពិសោធន៍របស់ពួកគេ»។

ក្រៅពីផ្ដល់ព័ត៌មានស្ដីពីកន្លែងទំនេរការងារ លោកស្រី ហង្ស សេរីវល័ក្ខណ៍ ក៏បានពន្យល់លម្អិតអំពីសារៈសំខាន់ និងអត្ថប្រយោជន៍ដែលពលករទទួលបានពី បេឡាជាតិរបបសន្តិសុខសង្គម (ប.ស.ស.)។ លោកស្រីបានលើកឡើងថា ការចុះឈ្មោះចូលជាសមាជិកប.ស.ស. មិនត្រឹមតែអាចទទួលបានការថែទាំសុខភាព និងគ្រោះថ្នាក់ការងារប៉ុណ្ណោះទេ ប៉ុន្តែថែមទាំងទទួលបានអត្ថប្រយោជន៍ផ្សេងទៀតដូចជា ប្រាក់ឧបត្ថម្ភពេលសម្រាលកូន របបសោធននិវត្តន៍សម្រាប់ពេលចាស់ជរា និងរបបផ្សេងៗទៀតដែលអាចផ្ដល់នូវសុវត្ថិភាពជីវិតនាពេលអនាគត។

ប្រជាពលរដ្ឋដែលបានចូលរួមក្នុងវេទិកានេះបានបង្ហាញនូវអារម្មណ៍រំភើប និងការដឹងគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់រាជរដ្ឋាភិបាល។ ពួកគេបានថ្លែងថា វេទិកានេះពិតជាមានប្រយោជន៍ណាស់ព្រោះបានផ្ដល់នូវព័ត៌មានជាក់ស្ដែងអំពីការងារដែលត្រូវការ ជួយកាត់បន្ថយការបារម្ភរបស់ពួកគេបន្ទាប់ពីបានត្រឡប់មកផ្ទះវិញ។ ពលរដ្ឋម្នាក់បានថ្លែងទាំងទឹកមុខរីករាយថា «ខ្ញុំពិតជាអរគុណខ្លាំងណាស់ ព្រោះវេទិកានេះបានផ្ដល់ឱកាសឱ្យខ្ញុំបានជួបផ្ទាល់ជាមួយក្រុមហ៊ុនដែលកំពុងត្រូវការបុគ្គលិក។ ខ្ញុំសង្ឃឹមថានឹងអាចរកបានការងារសមរម្យឆាប់ៗនេះ ហើយចាប់ផ្ដើមជីវិតថ្មីនៅស្រុកកំណើត»។

សូមបញ្ជាក់ថា វេទិកាការងារ និងផ្សព្វផ្សាយរបបសន្តិសុខសង្គមនេះ គឺជាផ្នែកមួយនៃយុទ្ធសាស្ត្ររបស់រដ្ឋាភិបាលក្នុងការជំរុញការអភិវឌ្ឍសេដ្ឋកិច្ចមូលដ្ឋាន និងពង្រឹងសុវត្ថិភាពសង្គមជូនប្រជាពលរដ្ឋទាំងអស់។ តាមរយៈសកម្មភាពនេះ រដ្ឋាភិបាលបានបង្ហាញពីការប្ដេជ្ញាចិត្តដ៏មុតមាំក្នុងការកសាងសង្គមមួយដែលពលរដ្ឋគ្រប់រូបអាចរស់នៅដោយមានកិត្តិយស សុវត្ថិភាព និងភាពកក់ក្ដៅ៕

ដោយ ឈុន សារ៉ាត