AKP ភ្នំពេញ ថ្ងៃទី០៥ ខែកញ្ញា ឆ្នាំ២០២៥-- លោក ផាង វី ប្រធាននាយកដ្ឋានធារាសាស្ត្រកសិកម្ម ក្រសួងធនធានទឹក និងឧតុនិយម បានអញ្ជើញដឹកនាំក្រុមការងារមន្ត្រីបច្ចេកទេសក្រសួង ចុះពិនិត្យជាក់ស្តែងស្ថានភាពទឹកនៅប្រព័ន្ធធារាសាស្ត្រលំហាច ស្ថិតក្នុងស្រុកបរិបូណ៌ ខេត្តកំពង់ឆ្នាំង និងប្រព័ន្ធធារាសាស្ត្រដំណាក់អំពិល ស្ថិតក្នុងស្រុកបាកាន ខេត្តពោធិ៍សាត់ នៅថ្ងៃសុក្រ ទី០៥ ខែកញ្ញា ឆ្នាំ២០២៥។

សូមជម្រាបថា ប្រព័ន្ធធារាសាស្ត្រលំហាចមានសក្ដានុពលបម្រើឱ្យការប្រើប្រាស់ប្រចាំថ្ងៃ និងការស្រោចស្រពផ្ទៃដីស្រូវវស្សាចំនួន ៥១៨៣ហិកតា ស្រូវប្រាំងចំនួន១៥៥៥ហិកតា និងដំណាំរួមផ្សំផ្សេងៗទៀត គ្របដណ្តប់លើបណ្តាឃុំចំនួន៤នៃស្រុកបរិបូណ៌។ ចំណែកប្រព័ន្ធធារាសាស្រ្តដំណាក់អំពិល ស្ថិតក្នុងស្រុកបាកាន មានសក្តានុពលបម្រើឱ្យការស្រោចស្រពលើផ្ទៃដីស្រូវវស្សាចំនួន ២៧០០០ ហិកតា និងស្រូវប្រាំងចំនួន ៩០០០ហិកតា។

ក្នុងឱកាសចុះពិនិត្យ លោកប្រធាននាយកដ្ឋានធារាសាស្ត្រកសិកម្ម បានកោតសរសើរដល់ក្រុមការងារប្រចាំការនៅតាមប្រព័ន្ធនីមួយៗ ដែលបានយកចិត្តទុកដាក់ប្រកបដោយស្មារតីទទួលខុសត្រូវខ្ពស់លើការងារគ្រប់គ្រង និងថែទាំប្រព័ន្ធធារាសាស្ត្រឱ្យមានដំណើរការល្អ បម្រើឱ្យការផ្គត់ផ្គង់ទឹកស្រោចស្រពស្រែរបស់បងប្អូនប្រជាកសិករ ក៏ដូចជាជួយដោះទឹកពេលមានជំនន់កើតឡើងម្តងៗ។

ទន្ទឹមនឹងនេះ លោកក៏បានណែនាំដល់ក្រុមការងារឱ្យបន្តយកចិត្តទុកដាក់ប្រុងប្រយ័ត្នខ្ពស់ក្នុងការបិទបើកទ្វារទឹក ដោយសារមួយរយៈពេលនេះមានភ្លៀងធ្លាក់ច្រើន គឺត្រូវបន្តដាក់អ្នកប្រចាំការជាប្រចាំនៅតាមបណ្តាទ្វារទឹកសម្រាប់កិច្ចដំណើរការគ្រប់គ្រងទឹក ព្រមទាំងត្រៀមឧបករណ៍ជំនួយដូចជា កៅឡាក់ ដើម្បីជួយទាញបិទបើកទ្វារទឹកអូតូម៉ាទិកក្នុងករណីមិនដំណើរការ ដើម្បីកាត់បន្ថយហានិភ័យដែលកើតឡើងពីជំនន់ទឹកភ្លៀង៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)