AKP កណ្ដាល ថ្ងៃទី០៥ ខែកញ្ញា ឆ្នាំ២០២៥-- រដ្ឋបាលខេត្តកណ្តាល នៅថ្ងៃទី០៥ ខែកញ្ញា ឆ្នាំ២០២៥ បានបើកកិច្ចប្រជុំបូកសរុបលទ្ធផលការងារនៃការអនុវត្តការងារប្រចាំប្រចាំឆមាសទី១ និងប្រចាំខែកក្កដា និងខែសីហា របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តកណ្តាល ក្រោមអធិបតីភាព លោកស្រី ស្រ៊ុន ស្រីនាង អភិបាលរងខេត្តកណ្តាល និងជាប្រធានលេខាធិការដ្ឋានគណៈកម្មាធិការខេត្ត គ.ខ.ប.ជ.  ព្រមទាំងមានការអញ្ជើញចូលរួមពី មន្ទីរជុំវិញខេត្ត អាជ្ញាធរក្រុង-ស្រុក កងកម្លាំងមានសមត្ថកិច្ច និងមន្ត្រីពាក់ព័ន្ធផងដែរ នៅសាលប្រជុំសាលាខេត្តកណ្តាល។

ក្នុងកិច្ចប្រជុំនោះ លោកស្រី ស្រ៊ុន ស្រីនាង អភិបាលរងខេត្ត និងជាប្រធានលេខាធិការដ្ឋានគណៈកម្មាធិការខេត្ត គ.ខ.ប.ជ. បានមានប្រសាសន៍ណែនាំឱ្យអាជ្ញាធរក្រុង ស្រុក និងមន្ទីរជំនាញពាក់ព័ន្ធ កុំមានការធ្វេសប្រហែសជាដាច់ខាត់ ត្រូវបន្តខិតខំសហការគ្នាអនុវត្តឱ្យបានជោគជ័យនូវផែនការការងារដែលបានដាក់ចេញសម្រាប់អនុវត្តក្នុងឆ្នាំ២០២៥ និងទិសដៅការងារដែលកំណត់ដោយក្រសួង ស្ថាប័នពាក់ព័ន្ធនៅថ្នាក់ជាតិ សំដៅលុបបំបាត់ឱ្យបានអំពើជួញដូរមនុស្សគ្រប់រូបភាព។ អាជ្ញាធរក្រុង ស្រុក ត្រូវក្តាប់ឱ្យបានអំពីគោលបំណងនៃការធ្វើចំណាកស្រុក និងចំណូលស្រុករបស់ប្រជាពលរដ្ឋ និងជនបរទេស ត្រូវស្រង់ទិន្នន័យឱ្យបានច្បាស់ ត្រូវរាយការណ៍មកថ្នាក់ខេត្តឱ្យទាន់ពេល ដើម្បីងាយស្រួលក្នុងការគ្រប់គ្រង និងចាត់វិធានការបានទាន់ពេលវេលាចំពោះករណីដែលសង្ស័យ។

លោកស្រី អភិបាលរងខេត្ត ក៏បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមត្ថកិច្ច មន្ទីរជំនាញ និងអាជ្ញាធរមូលដ្ឋានគ្រប់ជាន់ថ្នាក់ ដែលបានអនុវត្តសកម្មភាពការងារកន្លងមក ក្នុងការបង្ការ បង្ក្រាបទប់ស្កាត់អំពើជួយដូរមនុស្ស ការធ្វើអាជីវកម្មផ្លូវភេទលើស្ត្រី និងកុមារ ការធ្វើចំណាកស្រុកដោយប្រថុយប្រថាន និងការអប់រំផ្សព្វផ្សាយជួបប្រជាពលរដ្ឋនៅមូលដ្ឋានឱ្យបានយល់ជ្រាបអំពីការប្រយុទ្ធប្រឆាំងនិងអំពើជួញដូរមនុស្ស បានយ៉ាងមានប្រសិទ្ធភាព៕

ដោយ ណយ នឿន (ប្រភព៖ រដ្ឋបាលខេត្តកណ្តាល)