AKP បន្ទាយមានជ័យថ្ងៃទី0៥ខែកញ្ញាឆ្នាំ២០២៥--  ប្រជាពលរដ្ឋមានជីវភាពខ្វះខាតចំនួន ៦២០ គ្រួសារ ក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តបន្ទាយមានជ័យ កាលពីព្រឹកថ្ងៃទី ៥ ខែកញ្ញា ឆ្នាំ ២០២៥ ដើម្បីជួយទ្រទ្រង់ដល់ការរស់នៅប្រចាំថ្ងៃ។

ពិធីចែកអំណោយនេះ បានធ្វើឡើងនៅវត្តជោគជ័យ ដោយមានវត្តមានដ៏ខ្ពង់ខ្ពស់របស់ ឯកឧត្តម អ៊ុ រាត្រី អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត។

 
ថ្លែងទៅកាន់ប្រជាពលរដ្ឋក្នុងពិធីនោះ ឯកឧត្តម អ៊ុ រាត្រី បានពាំនាំនូវការផ្តាំផ្ញើសួរសុខទុក្ខពីថ្នាក់ដឹកនាំកំពូលៗ នៃព្រះរាជាណាចក្រកម្ពុជា រួមមាន  សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា  សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី, និង លោកជំទាវបណ្ឌិត ពេជ ចន្ទមុន្នី។

ឯកឧត្តមបានបញ្ជាក់ថា សារទាំងនេះបង្ហាញពីការគិតគូរ និងនឹករលឹកជានិច្ចដល់សុខទុក្ខរបស់ប្រជាពលរដ្ឋគ្រប់រូប។
   ឯកឧត្តមបានបន្តទៀតថា «សាខាកាកបាទក្រហមកម្ពុជាខេត្តបន្ទាយមានជ័យ ជាពិសេសកាកបាទក្រហមកម្ពុជា ក្រោមការដឹកនាំរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជាមាតាមនុស្សធម៌ តែងតែយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋនៅពេលជួបគ្រោះថ្នាក់ផ្សេងៗដោយគ្មានការរើសអើងអ្វីឡើយ»។

     ជាមួយនោះ  ឯកឧត្តម អ៊ុ រាត្រី ក៏បានសម្តែងការអរគុណយ៉ាងជ្រាលជ្រៅចំពោះការស៊ូទ្រាំ និងការលះបង់របស់ប្រជាពលរដ្ឋក្នុងភូមិជោគជ័យ ដែលបានរួមសាមគ្គីគ្នាការពារផ្ទះសម្បែងរបស់ខ្លួនពីការឈ្លានពានរបស់ទាហានថៃ។ ឯកឧត្តមបានថ្លែងថា«ការឈ្លានពានរបស់សត្រូវគឺជាការប៉ុនប៉ងដណ្តើមយកទឹកដីកម្ពុជា ប៉ុន្តែដោយសារការខិតខំប្រឹងប្រែងរបស់រាជរដ្ឋាភិបាល និងការជឿជាក់របស់ប្រជាពលរដ្ឋ ទើបយើងអាចការពារបូរណភាពទឹកដីបានយ៉ាងរឹងមាំ»។
    ប្រជាពលរដ្ឋជាច្រើនដែលបានមកទទួលអំណោយបានបង្ហាញពីក្តីរំភើប និងការដឹងគុណយ៉ាងជ្រាលជ្រៅចំពោះសកម្មភាពមនុស្សធម៌នេះ។ អ្នកស្រី កែវ សាវឿន អាយុ ៥៦ ឆ្នាំ ដែលជាពលរដ្ឋនៅភូមិជោគជ័យបានថ្លែងថា៖ «ខ្ញុំពិតជាអរគុណដល់កាកបាទក្រហម ដែលបានចុះមកជួយយើងខ្ញុំ។ អំណោយនេះពិតជាបានជួយសម្រាលបន្ទុកជីវភាពបានច្រើន ព្រោះគ្រួសារខ្ញុំមិនសូវមានការងារធ្វើទៀងទាត់ទេ»។

   សូមបញ្ជាក់ថាសកម្មភាពមនុស្សធម៌នេះបានបង្ហាញឲ្យឃើញពីការយកចិត្តទុកដាក់របស់រាជរដ្ឋាភិបាល និងកាកបាទក្រហមកម្ពុជាចំពោះសុខទុក្ខរបស់ប្រជាពលរដ្ឋទូទាំងប្រទេស ជាពិសេសអ្នកដែលរស់នៅតាមតំបន់ដែលធ្លាប់រងផលប៉ះពាល់ពីសង្គ្រាម។ ការចែកអំណោយនេះមិនត្រឹមតែជាការផ្តល់វត្ថុធាតុដើមប៉ុណ្ណោះទេ ប៉ុន្តែថែមទាំងជាការផ្តល់ក្តីសង្ឃឹម និងកម្លាំងចិត្តដល់ពលរដ្ឋដែលកំពុងជួបការលំបាក៕
ដោយ ៖ឈុនសារ៉ាត