AKP ភ្នំពេញ ថ្ងៃទី០៥ ខែកញ្ញា ឆ្នាំ២០២៥-- លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមក្នុងពិធីសម្ពោធគម្រោង «ពង្រឹងបច្ចេកវិទ្យា និងធនធាន សម្រាប់ស្រ្តីជនជាតិដើមភាគតិចក្នុងវិស័យកសិកម្ម (STRIVE Project)» នៅសណ្ឋាគារកាំបូឌីយ៉ាណា រាជធានីភ្នំពេញ នាព្រឹកថ្ងៃទី០៤ ខែកញ្ញា ឆ្នាំ២០២៥ ដែលមានសមាសភាពចូលរួមពីលោក Bryan FORNARI ប្រធានកិច្ចសហប្រតិបត្តិការសហភាពអឺរ៉ុបប្រចាំកម្ពុជា EU Dr. Gidon WINDECKER អនុប្រធានការិយាល័យសហប្រតិបត្តិការអភិវឌ្ឍន៍នៃស្ថានទូតអាល្លឺម៉ង់នៅកម្ពុជា លោកស្រី Anette Müller ប្រធានតំបន់បែកខាងអាស៊ី ជាតំណាងអង្គការយូហានីធឺ (Johanniter)។

គម្រោងនេះមានគោលបំណងគឺដើម្បីផ្សព្វផ្សាយក្របខ័ណ្ឌគម្រោង និងបង្កើនកិច្ចសហការអនុវត្តគម្រោងឱ្យមានប្រសិទ្ធភាព និងដើម្បីទទួលបានផលជាវិជ្ជមានទៅដល់ក្រុមគោលដៅ នៅក្នុងខេត្តរតនគីរី និងខេត្តស្ទឹងត្រែង។

លោកជំទាវអនុរដ្ឋលេខាធិការបានមានប្រសាសន៍ថា គម្រោងនេះបង្ហាញយ៉ាងច្បាស់ពីចក្ខុវិស័យ ការចូលរួមជាមួយក្រសួងកសិកម្ម រុក្ខាប្រមាញ់ និងនេសាទ ក្នុងការជំរុញគោលនយោបាយជាតិស្តីពីស្វាយចន្ទីប្រកបដោយប្រសិទ្ធភាពខ្ពស់ និងចីរភាព តាមរយៈការអនុវត្តគម្រោងរយៈពេល៤ឆ្នាំនេះ ដែលនឹងចូលរួមពង្រឹងយុទ្ធសាស្រ្តនៃការផលិតដោយប្រើប្រាស់បច្ចេកវិទ្យាថ្មីៗ ការអនុវត្តកសិកម្មល្អ រៀបចំផែនការដាំដុះ និងការគ្រប់គ្រងការប្រមូលផលឆ្លើយតបទៅនឹងតម្រូវការទីផ្សារក្នុងស្រុក និងក្រៅប្រទេស។ 

លោកជំទាវក៏បានស្នើដល់អង្គការ JOHANNITER ឱ្យមានកិច្ចសហការកាន់តែជិតស្និទ្ធ ជាមួយក្រសួងកសិកម្ម តាមរយៈ Memorandum of Understanding ឬ Project Agreement និងអំពាវនាវដល់ស្ថាប័នពាក់ពន្ធ័ ជាពិសេសមន្ទីរកសិកម្ម រុក្ខាប្រមាញ់ និងនេសាទនៅក្នុងខេត្តគោលដៅទាំងពីរ អាជ្ញាធរមូលដ្ឋាន អង្គការសង្គមស៊ីវិល ដៃគូអភិវឌ្ឍន៍ និងវិស័យឯកជន រួមគ្នាដើម្បីធ្វើឱ្យគម្រោងនេះទទួលបានជោគជ័យ។ លោកជំទាវសូមលើកទឹកចិត្តដល់ស្ត្រីជនជាតិដើមភាគតិចចូលរួមសហការរួមគ្នាជាគន្លឹះដ៏សំខាន់ក្នុងការធានាទទួលបានឱកាស និងធនធានដើម្បីឆ្ពោះទៅរកភាពរីកចម្រើនរួមគ្នា៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម)