AKP កំពង់ធំ ថ្ងៃទី០៥ ខែកញ្ញា ឆ្នាំ២០២៥-- ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី០៤ ខែកញ្ញា ឆ្នាំ២០២៥ បានអញ្ជើញដឹកនាំក្រុមការងារ រួមមានលោក ប៉ី វិចិត្រ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោក ជិន ស៊ីថា នាយខណ្ឌរដ្ឋបាលជលផលកំពង់ធំ និងសហការី តំបន់ប្រតិបត្តិការសឹករងកំពង់ធំ (យោធភូមិភាគទី៤) និងកម្លាំងចម្រុះទីបញ្ជាការស្រាលប្រចាំការឃុំពាមបាង ស្រុកស្ទោង បានចេញប្រតិបត្តិការត្រួតពិនិត្យនិងបង្ក្រាបបទល្មើសនេសាទនៅចំណុចវាលទុង វេហាល បែកឃ្លះ ប្រាំបីមុំ កាប់ចិន ខ្វែងតាសូ និង ព្រែកចងខ្លុង ឃុំពាមបាង ស្រុកស្ទោង ខេត្តកំពង់ធំជាលទ្ធផលអនុវត្តបាន០១ ករណីដោយបានរុះរើ កាប់បំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ របាំងសាច់អួនក្រឡាញឹកចំនួន០១របាំងប្រវែង ២០០ ម៉ែត្រ ឡុកសាច់អួនចំនួន២គ្រឿង លូឬលបចំនួន ២មាត់ បង្គោលកូនឈើ ចំនួន ១០០ ដើមនិងចាក់លែងកូនត្រីចម្រុះមួយចំនួនចូលទំនេរវិញ។

នៅថ្ងៃជាមួយគ្នានេះដែរលោក សៅ វណ្ណសិរីវុទ្ធ នាយសង្កាត់រដ្ឋបាលជលផលកំពង់ស្វាយលើ ដឹកនាំកម្លាំងសហគមន៌នេសាទបឹងស្ពង់ ចូលរួមជាមួយកម្លាំងគណៈបញ្ជារការឯកភាពរដ្ឋបាលស្រុកកំពង់ស្វាយ ដឹកនាំលោក ថន ពុទ្ធា អភិបាលរងនៃគណៈភិបាលស្រុកកំពង់ស្វាយ ចុះទប់ស្កាត់ និងបង្ក្រាបបទល្មើសជលផលនៅចំណុចកក់វាល ស្ថិតនៅក្នុងភូមិប្រាសាទ ឃុំសាន់គរ ស្រុកកំពង់ស្វាយ ខេត្តកំពង់ធំជាលទ្ធផលអនុវត្តបាន០១ករណីដោយបានធ្វើការរុះរើ និងបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ របាំងស្បៃមុងចំនួន៧របាំង ប្រវែង៣៥០ម៉ែត្រ ឡុកចំនួន៧គ្រឿង លូស្បៃមុងចំនួន០៧មាត់ បង្គោលចំនួន២៣៨ដើម និងចាក់លែងត្រីស្រុកចម្រុះទំនង់៥០គីឡូក្រាមចូលទៅនេះវិញ៕

ដោយ ស៊ុម វណ្ណា