AKP កំពង់ធំ ថ្ងៃទី០៤ ខែកញ្ញា ឆ្នាំ២០២៥-- លោក ហាន កុសល អភិបាលរងខេត្តកំពង់ធំ បានដឹកនាំកិច្ចប្រជុំត្រៀមរៀបចំកម្មវិធីទិវាអក្ខរកម្មជាតិ៨ កញ្ញា ទិវាសន្តិភាពអន្តរជាតិលើកទី២៣  ២១កញ្ញា កម្មវីធីកាន់បិណ្ឌ-ភ្ជុំបិណ្ឌរបស់រដ្ឋបាលខេត្ត និងពិធីគោរពរដ្ឋធម្មនុញ្ញនៃព្រះរាជាណាចក្រកម្ពុជា នាព្រឹកថ្ងៃទី០៤ ខែកញ្ញា ឆ្នាំ២០២៥ នៅសាលប្រជុំខេត្តកំពង់ធំ។

លោក ហាន កុសល បានលើកយកខ្លឹមសារសារលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងទិវាអក្ខរកម្មជាតិ៨កញ្ញា ឆ្នាំ២០២៥។ មន្ទីរ/អង្គភាពដែលពាក់ព័ន្ធការងារអប់រំ ដោយបំផុសចលនា មាតាបិតា អាណាព្យាបាលឱ្យកូនចៅបានចូលរៀនសូត្រ សំដៅធ្វើឱ្យមនុស្សគ្រប់រូបចេះអាន ចេះសរសេរ ចេះគិតលេខនិងចេះដោះស្រាយ រាល់បញ្ហាលំបាកដែលប្រឈមក្នុងជីវភាពរស់នៅ។ រៀបចំតុបតែងលម្អលើកទង់ជាតិ ទង់សាសនាទង់ព្រះមហាក្សត្រ បដាពាក្យស្លោក និងបំភ្លឺភ្លើងពណ៌ គ្រប់មន្ទីរ អង្គភាព ក្រុង ស្រុក  ឃុំ សង្កាត់ គ្រប់វត្តអារាម អគារសាធារណៈ ក្រុមហ៊ុន រោងចក្រ សហគ្រាស សាលារៀន ទីប្រជុំជន តាមដងផ្លូវសាធារណៈនិងណែនាំប្រជាពលរដ្ឋឱ្យលើកទង់ជាតិ នៅតាមគេហដ្ឋានដើម្បីអបអរសាទរ ទិវាអក្ខរកម្មជាតិ ៨កញ្ញា។អំពាវនាវដល់អង្គការជាតិ អង្គការអន្តរជាតិ ផ្នែកឯកជន និងសាធារណជនទូទៅឱ្យចូលរួមជួយគាំទ្រដល់សកម្មភាពនៃទិវាអក្ខរកម្មជាតិ ៨ កញ្ញា ក្នុងតំបន់រៀងៗខ្លួន សំដៅធ្វើយ៉ាងណាឱ្យទិវានេះមានភាពផុសផុល និងមហោឡារិក។

លោកអភិបាលរងខេត្តកំពង់ធំបានបន្តទៀតថា ខេត្ត ក្រុង ស្រុក  ឃុំ សង្កាត់ អង្គការក្រៅរដ្ឋាភិបាល សង្គមស៊ីវិលបំផុសមន្ត្រីរាជការ បុគ្គលិក និយោជក និយោជិត កម្មករ យុទ្ធជន និងប្រជាពលរដ្ឋ ឱ្យយល់ដឹងអំពី អត្ថន័យទិវាសន្តិភាពអន្តរជាតិ ២១ កញ្ញា ជាទិវាគ្មានអំពើហិង្សា និងបញ្ឈប់ការផ្ទុះអាវុធទូទាំងសកលលោក និងណែនាំឱ្យតុបតែងលម្អលើកទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក បំភ្លឺភ្លើងពណ៌តាមអង្គភាព អគារសាធារណៈ ក្រុមហ៊ុន រោងចក្រ សហគ្រាស សាលារៀន តាមសួនច្បារ ទីធ្លាសាធារណៈ។

លោក ហាន កុសល បានគូសបញ្ជាក់ថាបុណ្យកាន់បិណ្ឌ-ភ្ជុំបិណ្ឌ ជាបុណ្យប្រពៃណីព្រះពុទ្ធសាសនាដ៏មានសារសំខាន់របស់ពុទ្ធសាសនិកជនខ្មែរគ្រប់ៗរូបក្នុងគោលបំណងធំនៃពិធីបុណ្យនេះ ប្រារព្ធឡើងដើម្បីឧទ្ទិសកុសលជូនវិញ្ញាណក្ខន្ធ អ្នកមានគុណទាំងឡាយ មានមាតាបិតា ជីដូនជីតា គ្រូឧបជ្ឈាយាចារ្យ បុព្វបុរសជាតិ និងបងប្អូនជនរួមជាតិ ទាំងឡាយ ដែលបានលាចាកលោកនេះទៅកាន់លោកខាងមុខ។  ឆ្នាំនេះពិធីបុណ្យកាន់បិណ្ឌ ភ្ជុំបិណ្ឌ នឹងប្រព្រឹត្តទៅពីថ្ងៃ១រោច ដល់ថ្ងៃ១៥រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី០៨ ដល់ថ្ងៃទី២២ ខែកញ្ញា ឆ្នាំ២០២៥ ដូចនេះផ្សព្វផ្សាយនូវមេត្តាធម៌ ចំពោះមនុស្សទូទៅ និងសុំសេចក្តីសុខសន្តិភាព សម្រាប់មនុស្ស ជាតិ ព្រមទាំងរំលឹកគ្រប់វត្តអារាមរក្សាអោយបាននូវប្រពៃណីជាតិដែលបានគោរពជារៀងរាល់ឆ្នាំ៕

ដោយ ស៊ុម វណ្ណា