AKP បន្ទាយមានជ័យ ថ្ងៃទី០៤ ខែកញ្ញា ឆ្នាំ២០២៥-- ក្រុមប្រជាពលរដ្ឋខ្មែរ រួមជាមួយកម្លាំងសមត្ថកិច្ច បានរួមគ្នាប្រឈមមុខដោយអង់អាចក្លាហានជាមួយនឹងទាហានថៃ ដែលព្យាយាមចូលមកឈ្លានពានរំលោភបំពានបន្ថែមទៀតលើដីធ្លីរបស់ប្រជាពលរដ្ឋ នៅចំណុចភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នាព្រឹកថ្ងៃទី០៤ ខែកញ្ញា ឆ្នាំ២០២៥។ សកម្មភាពនេះបានបង្ខំឱ្យទ័ពថៃដកថយទៅវិញដោយជោគជ័យ បន្ទាប់ពីមានការតវ៉ាយ៉ាងគំហុកពីសំណាក់ពលរដ្ឋ។ ក្រុមពលរដ្ឋទាំងប្រុសស្រីបានប្រដាប់ដោយដំបងស្ទើរគ្រប់ដៃ ស្រែកជេរប្រមាថ និងដេញទាហានថៃ ដែលប្រដាប់ដោយអាវុធពេញដៃ មិនឱ្យចូលមកដាក់បង្គោលលួសបន្ថែមទៀតលើដីរបស់ពួកគេឡើយ។ ដើម្បីងាយស្រួលក្នុងការឃ្លាំមើលសកម្មភាពរបស់ទាហានថៃ ប្រជាពលរដ្ឋបាននាំគ្នាកាប់ដើមអំពៅចេញពីចំការនៅក្បែរនោះផងដែរ។

ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានបញ្ជាក់ថា សកម្មភាពរបស់ទាហានថៃនាពេលនេះ គឺជាការបំពានយ៉ាងធ្ងន់ធ្ងរទៅលើកិច្ចព្រមព្រៀង MOU ២០០០ ក៏ដូចជាកិច្ចព្រមព្រៀងឈប់បាញ់រវាងកម្ពុជា និងថៃ។ ឯកឧត្តមបានធ្វើការទាក់ទងទៅអភិបាលខេត្តស្រះកែវ ប្រទេសថៃ ដោយលើកឡើងថា បញ្ហាដីធ្លីរបស់ប្រជាពលរដ្ឋនៅតំបន់ព្រំដែនគឺជាសមត្ថកិច្ចរបស់គណៈកម្មាធិការព្រំដែនរួមរវាងប្រទេសទាំងពីរ មិនមែនជាការសម្រេចចិត្តឯកតោភាគីរបស់ភាគីណាមួយឡើយ។

ឯកឧត្តមអភិបាលខេត្តបានបន្ថែមថា កន្លងមក កងទ័ពថៃបានចូលមកឈ្លានពានរំលោភបំពានយកដី និងផ្ទះសម្បែងរបស់ប្រជាពលរដ្ឋខ្មែរនៅភូមិព្រៃចាន់ និងភូមិជោគជ័យ ក្នុងឃុំអូរបីជាន់ សរុបចំនួន១២គ្រួសារ ដែលមានប្រជាជនចំនួន ៥៩ នាក់ ក្នុងនោះមានជនពិការ៤នាក់ និងស្រ្តីមានផ្ទៃពោះ២នាក់ផងដែរ។ រដ្ឋបាលខេត្ត និងមន្ត្រីពាក់ព័ន្ធបានរួមគ្នាជួយដោះស្រាយបញ្ហាជាបណ្ដោះអាសន្ន ដូចជាការផ្ដល់ទីកន្លែងស្នាក់នៅ និងម្ហូបអាហារដល់ជនរងគ្រោះ ដើម្បីធានាសុវត្ថិភាព និងជីវភាពរស់នៅរបស់ពួកគាត់។

ជុំវិញបញ្ហានេះ អង្គភាពអ្នកនាំពាក្យរាជរដ្ឋាភិបាលបានចេញសេចក្តីប្រកាសព័ត៌មាន ដោយបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត បានខិតខំព្យាយាមការពារអធិបតេយ្យជាតិ និងបូរណភាពទឹកដីយ៉ាងប្ដូរផ្ដាច់។ រាជរដ្ឋាភិបាលបានប្រើប្រាស់យន្តការគ្រប់លំដាប់ថ្នាក់ ដើម្បីតវ៉ាទៅកាន់ភាគីថៃ និងជូនដំណឹងទៅភាគីពាក់ព័ន្ធតាមគ្រប់មធ្យោបាយការទូត ដើម្បីស្វែងរកដំណោះស្រាយដោយសន្តិវិធី។

សេចក្តីប្រកាសព័ត៌មានបានសង្កត់ធ្ងន់ថា ការការពារអធិបតេយ្យជាតិ និងបូរណភាពទឹកដី គឺជាអាទិភាពចម្បងរបស់រាជរដ្ឋាភិបាលកម្ពុជា តាំងពីអតីតកាល បច្ចុប្បន្ន រហូតដល់អនាគត។ រាជរដ្ឋាភិបាលនឹងបន្តខិតខំដោះស្រាយបញ្ហាព្រំដែនដោយសន្តិវិធី ស្របតាមច្បាប់អន្តរជាតិ ដើម្បីរក្សាសុខសន្តិភាព និងការពារផលប្រយោជន៍របស់ជាតិ និងប្រជាពលរដ្ឋ៕

ដោយ ឈុន សារ៉ាត