AKP សៀមរាប ថ្ងៃទី០៤ ខែកញ្ញា ឆ្នាំ២០២៥-- លោកស្រី ម៉ននី រង្សី អភិបាលរងខេត្តសៀមរាប បានថ្លែងបើកសិក្ខាសាលាស្ដីពីការលើកកម្ពស់ការយល់ដឹងអំពីដំណើរការរឿងក្ដីនៃអំពើជួញដូរមនុស្សដល់មន្ត្រីនគរបាលយុត្តិធម៌ មន្ត្រីសាធារណៈ វិស័យឯកជន និងសង្គមស៊ីវិល នៅថ្ងៃទី០៤ ខែកញ្ញា ឆ្នាំ២០២៥ថា សិក្ខាសាលានេះគឺមានគោលបំណងដើម្បីចូលរួមចំណែកក្នុងការពង្រឹងកិច្ចអនុវត្តរបស់មន្ត្រីនគរបាលយុត្តិធម៌ និងកិច្ចសហប្រតិបត្តិការជាមួយអ្នកពាក់ព័ន្ធ ជាគុណប្រយោជន៍ដល់ជនរងគ្រោះដោយអំពើជួញដូរមនុស្ស និងអំពើហិង្សាទាក់ទងនឹងយេនឌ័រ លើគ្រប់ទម្រង់ គ្រប់ប្រភេទ ស្របតាមនីតិវិធី និងបានឆ្លើយតបទៅនឹងបញ្ហាជាក់ស្តែងពិតប្រាកដ នៅក្នុងមូលដ្ឋានរបស់យើង ក៏ដូចជាការបង្ហាញអំពីការចូលរួមលើការប្រយុទ្ធប្រឆាំងអំពើជួញដូរមនុស្សគ្រប់ទម្រង់ ព្រមទាំងបានឆ្លើយតបទៅនឹងផែនការយុទ្ធសាស្ត្រជាតិរបស់គណៈកម្មាធិការជាតិ គោលនយោបាយ របស់រាជរដ្ឋាភិបាលកម្ពុជា។

លោកស្រីបានបន្តថា អំពើជួញដូរមនុស្សគឺជាវិបត្តិសកលមួយដែលបណ្តាប្រទេសជាច្រើនបានជួបប្រទះ ហើយក្នុងនោះប្រទេសកម្ពុជារបស់យើង ក៏បានទទួលរងនូវវិបត្តិនេះផងដែរ ដែលធ្វើឱ្យរាជរដ្ឋាភិបាល ក៏ដូចជាប្រជាពលរដ្ឋទាំងអស់មានការព្រួយបារម្ភជាខ្លាំង។ ទន្ទឹមនឹងនោះ រាជរដ្ឋាភិបាលក៏ដូចជាដៃគូសហការទាំងអស់ ជាពិសេសអង្គការដៃគូមិនមែនរដ្ឋាភិបាលជាតិ និងអន្តរជាតិ បាន និងកំពុងខិតខំប្រឹងប្រែងរិះរកគ្រប់វិធានការក្នុងន័យរួមគ្នាដោះស្រាយលើបញ្ហានេះ ឈានទៅសម្រេចឱ្យបាននូវការលុបបំបាត់គ្រប់ទម្រង់នៃអំពើជួញដូរមនុស្ស ព្រមទាំងបានរៀបចំនូវយន្តការការពារចំពោះប្រជាពលរដ្ឋទូទៅ ពលករ ធុរកិច្ចជន ភ្ញៀវជាតិ និងអន្តរជាតិទាំងអស់ ដោយមិនប្រកាន់នូវជាតិសាសន៍អ្វីទាំងអស់ សំដៅប្រែក្លាយទៅជាប្រទេសដែល មានសុខសុវត្ថិភាព។

លោកស្រីអភិបាលរងខេត្តសៀមរាប និងអនុប្រធានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត បានមានប្រសាសន៍ណែនាំដល់គ្រប់ស្ថាប័នពាក់ព័ន្ធ ត្រូវតែយកចិត្តទុកដាក់ខ្ពស់បន្ថែមទៀត ក្នុងការពង្រឹងការអនុវត្តផែនការប្រតិបត្តិការ បង្កើនការប្រយុទ្ធប្រឆាំង គ្រប់ទម្រង់នៃអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ ឱ្យឆ្លើយតបទៅនឹងទៅនឹង ស្ថានភាពនៃអំពើជួញដូរមនុស្សនៅកម្ពុជា ពិសេសនៅក្នុងខេត្តសៀមរាប  ឱ្យបានម៉ឺងម៉ាត់ និងមានការទទួលខុសត្រូវខ្ពស់ ដោយក្នុងនោះលោក លោកស្រី ត្រូវធ្វើឱ្យសាធារណជនទូទៅ យល់ជ្រួតជ្រាបអំពីសកម្មភាព ល្បិចកល និងច្បាប់ លិខិតបទដ្ឋាន គតិយុត្តនានា និងចូលរួមក្នុងចលនាប្រយុទ្ធប្រឆាំងការជួញដូរមនុស្ស ជួញដូរពលកម្ម ជាមួយ អាជ្ញាធរមានសមត្ថកិច្ច ជាពិសេសម្ចាស់ ឬ អ្នកគ្រប់គ្រង (អាជីវកម្មផ្លូវភេទ) លំនៅឋានគ្រប់ប្រភេទ ដែលជាគោលដៅងាយរងគ្រោះ សំដៅបង្ការទប់ស្កាត់បទល្មើសជួញដូរមនុស្ស ជួញដូរពលកម្ម និងអាជីវកម្មផ្លូវភេទឱ្យមានប្រសិទ្ធភាពខ្ពស់។ កំណត់ឱ្យបាននូវអត្តសញ្ញាណគោលដៅសង្ស័យមានជនបរទេសស្នាក់នៅខុសច្បាប់ ដើម្បីចាត់វិធានការត្រួតពិនិត្យប្រកបដោយប្រសិទ្ធភាព និងអនុវត្តនីតិវិធីបានទាន់ពេលវេលា។ រកឱ្យឃើញទីតាំងសង្ស័យមានសកម្មភាពជួញដូរមនុស្ស ជួញដូរពលកម្ម និងអាជីវកម្មផ្លូវភេទ ដើម្បីបង្ក្រាប ផ្តន្ទាទោសតាមច្បាប់ ដោយគ្មានការលើកលែង។រកឱ្យឃើញបណ្តារបៀងខ្សែរយៈនាំមនុស្សឆ្លងកាត់ព្រំដែន (មេខ្យល់) ដើម្បីបម្រើឱ្យការជួញដូរមនុស្សរ ជួញដូរពលកម្ម និងអាជីវកម្មផ្លូវភេទ និងប្រមែប្រមូលភស្តុតាង ដើម្បីមានវិធានការបង្ក្រាប លុបបំបាត់ប្រភពនៃបទល្មើសនេះឱ្យមានប្រសិទ្ធភាព។ សវនាការជំនុំជម្រះបណ្តារឿងក្តីពាក់ព័ន្ធបទល្មើសជួញដូរមនុស្ស ជួញដូរពលកម្ម និងអាជីវកម្មផ្លូវភេទ ជាពិសេសរឿងក្ដីក្នុងប្រតិបត្តិការនេះ ត្រូវបានធ្វើលឿនរហ័ស ដើម្បីបង្ហាញសាធារណៈជនពីលទ្ធផល ឆន្ទៈ និងការប្តេជ្ញាចិត្តដ៏មុតមាំរបស់រាជរដ្ឋាភិបាល និងសូមឱ្យសាធារណជន វិស័យឯកជន ចូលរួមសហការនៅក្នុងគ្រប់រូបភាព ដើម្បីចូលរួមបង្ការ ទប់ស្កាត់អំពើជួញដូរមនុស្ស ការជួញដូរពលកម្ម ការអាជីវកម្មផ្លូវភេទ និងការកេងប្រវ័ញ្ច តាមប្រព័ន្ធអនឡាញ៕

ដោយ ឃុត សៅ