AKP កំពង់ឆ្នាំង ថ្ងៃទី០៤ ខែកញ្ញា ឆ្នាំ២០២៥-- ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកកម្មពិសេស ប្រធានក្រុមប្រឹក្សាស្តារអភិវឌ្ឍន៍ វិស័យ កសិកម្ម និងជនបទ បានអញ្ជើញចុះសួរសុខទុក្ខគ្រួសារកងទ័ព និងពលករទើបត្រឡប់មកពីថៃកាលពីថ្ងៃទី០៣ ខែកញ្ញា ឆ្នាំ២០២៥ នៅស្រុកកំពង់លែង ខេត្តកំពង់ឆ្នាំង។

ការអញ្ជើញរបស់ឯកឧត្តមក៏មានការចូលរួមពីឯកឧត្តម លោកជំទាវក្រុមការងារថ្នាក់កណ្តាល ឯកឧត្តម ស៊ីវ រុន ប្រធានក្រុមប្រឹក្សាខេត្ត  ឯកឧត្តម ស៊ុន សុវណ្ណារិទ្ធិ អភិបាលខេត្ត  តំណាងរាស្ត្រមណ្ឌលកំពង់ឆ្នាំង ឯកឧត្តម លោកជំទាវ ក្រុមការងារថ្នាក់ខេត្ត  អភិបាលស្រុក អង្គភាពចំណុះរដ្ឋបាលស្រុក និង អាជ្ញាធរមូលដ្ឋានចូលរួមផងដែរ។

ថ្លែងក្នុងឱកាសនោះឯកឧត្តមបណ្ឌិតសភាចារ្យ អ៊ុក រ៉ាប៊ុន បានពាំនាំនូវការផ្ដាំផ្ញើសួរសុខទុកពីប្រមុខរារដ្ឋាភិបាលបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជានាចក្រកម្ពុជានិងលោកជំទាវបណ្ឌិត តែងតែយកចិត្តទុកដាក់ដល់គ្រួសារកងទ័ព ប្រជាពលរដ្ឋនិងពលករភៀសឹកមកពីប្រទេសថៃនិងកំពង់ចាកចេញពីខេត្តជាប់ព្រំដែនកម្ពុជា-ថៃ ដោយសៀមឈ្លានពាន។ ការអោយទទួលបាននៅភាពកក់ក្តៅ ទាំងស្នាក់នៅ សម្លៀកបំពាក់និងការហូបចុក។ ថ្នាក់ដឹកនាំគ្រប់លំដាប់ថ្នាក់ មិនដែលព្រងើយកន្តើយ ឬនៅឆ្ងាយពីបងប្អូនទាំងអស់គ្នានោះទេ គឺតែងនឹករលឹកជានិច្ច ទោះបីមិនបានរស់នៅជាមួយគ្នា ពិតមែនក៏ប៉ុន្តែសុខទុក្ខទាំងឡាយរបស់បងប្អូនទំាងអស់ក៏ជាសុខទុក្ខរបស់ថ្នាក់ដឹកនាំផងដែរ។

ទន្ទឹមនឹងនេះឯកឧត្តមបណ្ឌិតសភាចារ្យ សូមអំពាវនាវដល់សប្បុរសជនទាំងអស់ ចូលរួមជាមួយរដ្ឋបាលខេត្តជួយបឧបត្ថម្ភជា ថវិកា សម្ភារប្រើប្រាស់ សម្ភារបរិក្ខាពេទ្យ គ្រឿងទេស ថ្នាំមូស និងគ្រឿងឧបភោគបរិភោគផ្សេងៗ តាមលទ្ធភាព ដើម្បីរួមចំណែកក្នុងការគាំទ្រ និងលើកទឹកចិត្តដល់វីរៈកងទ័ពជួរមុខ ដែលកំពុងបំពេញបេសកកម្មដ៏ឧត្តុងឧត្តម ការពារបូរណភាពទឹកដី និងអធិបតេយ្យជាតិ និងឧបត្ថម្ភដល់ជនភៀសសឹក ពលករ ពលការនីដែលបានត្រឡប់ពីប្រទេសថៃកំពុងត្រូវការជំនួយជាចាំបាច់។ បច្ចុប្បន្ន មានរោងចក្រ សហគ្រាសជាច្រើន កំពុងមានតម្រូវការកម្លាំងពលកម្មសម្រាប់បម្រើការងារទាំងនៅក្នុងខេត្ត និង នៅភ្នំពេញ ឱកាសការងារដ៏ច្រើនសន្ធឹកសន្ធាប់នៅកម្ពុជា ក៏ដូចជាការបណ្តុះបណ្តាល ជំនាញបច្ចេកទេសនិងវិជ្ជាជីវៈ និងអត្ថប្រយោជន៍ ដែលជាការគិតគូរ របស់រាជរដ្ឋាភិបាល។

ក្នុងបរិបទនេះឯកឧត្តមបណ្ឌិតសភាចារ្យ បានបញ្ជាក់ពីគោលនយោបាយរបស់រដ្ឋាភិបាលដែលមានសម្តេចតេជោ-ធិបតី បានអំពាវនាវអោយបងប្អូនពលករខ្មែរទាំងអស់នៅប្រទេសថៃ វិលត្រលប់មកធ្វើការនៅក្នុងប្រទេសវិញ ស្របពេលដែលកម្ពុជាកំពុងត្រូវការកម្លាំងពលកម្មរាប់សិបម៉ឺនកន្លែង តាមរយះក្រសួងការងារ និងបណ្តុះ បណ្តាលវិជ្ជាជីវ:។

ឯកឧត្តមបណ្ឌិតសភាចារ្យ អ៊ុក រ៉ាប៊ុន ឯកឧត្តម លោកជំទាវ លោក លោកស្រី មន្ត្រីអមដំណើរ ក្រុមការងារ និងសប្បុរសជនបានឧបត្ថម្ភជួយដល់កម្មករ កម្មការានី និងគ្រួសារកងទ័ពចំនួនជាង៤០០នាក់ ក្នុងម្នាក់ៗទទួលបានអង្ករចំនួន២០គ.ក, មី១កេស, ទឹកត្រី១យួរ, ទឹកស៊ីអ៊ីវ១យួរ និងថវិកា៥ម៉ឺនរៀលផងដែរ ៕

ដោយ៖ បៃ ស៊ីថុន