AKP សៀមរាប ថ្ងៃទី០៣ ខែកញ្ញា ឆ្នាំ២០២៥-- ក្នុងកិច្ចប្រជុំពិភាក្សាស្តីពីការទប់ស្កាត់ និងបង្ក្រាបបទល្មើសធនធានធម្មជាតិ និងព្រៃឈើ ក្នុងភូមិសាស្ត្រខេត្តសៀមរាប នៅថ្ងៃទី០៣ ខែកញ្ញា ឆ្នាំ២០២៥ លោក អ៉ឺង គឹម
លាង អភិបាលរងខេត្តសៀមរាប បានណែនាំដល់មន្រ្តីជំនាញ នៃមន្ទីរកសិកម្ម រុក្ខាប្រមាញ់ និងនេសាទ និងមន្ទីរបរិស្ថានខេត្ត ត្រូវបង្កើនការគ្រប់គ្រងរោងសិប្បកម្ម, រោងស្តុក និងឡដុតធ្យូងដែលមានច្បាប់អនុញ្ញាតប្រើប្រាស់ផលអនុផលព្រៃឈើ ដោយត្រូវមានប្រភពច្បាស់លាស់ និងមានច្បាប់អនុញ្ញាត។

លោក អ៉ឺង គឹមលាង ក៏បានជំរុញឱ្យមន្ត្រីជំនាញ ត្រូវបន្តកិច្ចសហការជាមួយគណៈបញ្ជាការឯកភាពក្រុងស្រុក និងស្ថាប័នអយ្យការអមសាលាដំបូងខេត្ត ដើម្បីទប់ស្កាត់, តាមដាន, ស្រាវជ្រាវ និងបង្ក្រាបបទល្មើសព្រៃឈើ, សត្វព្រៃ និងដីព្រៃឈើឱ្យបានទាន់ពេលវេលា។ ទន្ទឹមនឹងនេះ ត្រូវបង្កើនការផ្សព្វផ្សាយដល់អាជ្ញាធរមូលដ្ឋាន និងស្ថាប័នពាក់ព័ន្ធពីផលប៉ះពាល់នៃការបង្កើតឡធ្យូង និងការកាប់បំផ្លាញព្រៃឈើ។ លើសពីនេះ ត្រូវមានវិធានការចំពោះពលរដ្ឋដែលរស់នៅក្នុង និងក្រៅតំបន់ ដែលបន្តចូលអាស្រ័យផលក្នុងតំបន់ការពារធម្មជាតិ និងត្រូវចូលរួមសហការទប់ស្កាត់បទល្មើសក្នុងតំបន់ការពារធម្មជាតិ។

លោកអភិបាលរងខេត្តបានបញ្ជាក់ថា ការកាប់ទន្ទ្រានព្រៃយកដី និងការកាប់ឈើដឹកជញ្ជូនខុសច្បាប់នៅក្នុងភូមិសាស្ត្រខេត្តសៀមរាប នៅតែកើតមាន ជាពិសេសការទន្ទ្រានដីក្នុងតំបន់ការពារ, តំបន់ដែនជម្រកសត្វព្រៃ និងឧទ្យានជាតិ។ ក្នុងបរិបទនេះ យើងត្រូវរួមគ្នាស្វែងរកមធ្យោបាយ ដើម្បីបញ្ចប់ការទន្ទ្រានព្រៃយកដី។ ជាមួយគ្នានេះ អាជ្ញាធរមូលដ្ឋានត្រូវសហការគ្នាក្នុងការទប់ស្កាត់ និងបង្ក្រាបឱ្យបានការដឹកជញ្ជូនឈើខុសច្បាប់ ទោះបីក្នុងរូបភាពណាក៏ដោយ។ ម្យ៉ាងទៀតការដឹកជញ្ជូនឈើពីខេត្តផ្សេងឆ្លងកាត់ខេត្តសៀមរាប ក៏ជាបញ្ហាដែលកើតមានឡើងផងដែរ ដូច្នេះសូមសមត្ថកិច្ចពាក់ព័ន្ធត្រូវបង្ក្រាបឱ្យបាន។

បើតាមលោក ម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានបង្ហាញថា ក្នុងឆ្នាំ២០២៥នេះ សហគមន៍ព្រៃឈើមានចំនួន ៥៩ កន្លែងលើផ្ទៃដី ១៨ ៧៤៣ ហិកតា, រោងសិប្បកម្មមាន ១៤ កន្លែង, រោងស្តុកមាន ១៤ កន្លែង និងទីតាំងលក់គ្រឿងសង្ហារិមមាន ៣១ កន្លែង។ រោងសិប្បកម្មខ្លះបានប្រើប្រាស់ឈើដែលបានទិញពីរាជធានីភ្នំពេញ និងទីតាំងលក់គ្រឿងសង្ហារិមខ្លះបានទិញពីខេត្តផ្សេងៗយកមកដុសខាត់ លាប និងលក់បន្តឱ្យអ្នកប្រើប្រាស់។ ចំពោះឡធ្យូងប្រើប្រាស់ផលអនុផលព្រៃឈើដែលគ្មានច្បាប់អនុញ្ញាតមាន ១ ០១០ ឡធ្យូង ដែលប្រើប្រាស់ប្រភពថាមពលពីដើមស្វាយចន្ទី ដើមស្វាយ ដើមអាកាស្យាជាដើម។ ដោយឡែកការងារបង្ក្រាបបទល្មើសព្រៃឈើក្នុងឆ្នាំ២០២៥នេះ កម្លាំងជំនាញបង្ក្រាបបាន ២៤ ករណី ដោយបានបញ្ជូនទៅរដ្ឋបាលព្រៃឈើ ៧ ករណី, បញ្ជូនទៅតុលាការ ៧ ករណី និងកំពុងចាត់ចែង ១០ ករណី៕

ដោយ ឃុត សៅ