‎AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៥--  ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក និងឧតុនិយម និងជាប្រធានក្រុមការងារដឹកនាំ និងជំរុញការងារចុះបញ្ជីអាងស្តុកទឹក និងទំនប់អាងទឹកនៃប្រព័ន្ធធារាសាស្ត្រ បានអញ្ជើញដឹកនាំកិច្ចប្រជុំ ដើម្បីជំរុញ និងតាមដានវឌ្ឍនភាពការងារចុះបញ្ជីអាងស្តុកទឹក និងទំនប់អាងទឹកនៅទូទាំងប្រទេស តាមប្រព័ន្ធវីដេអូ នៅទីស្តីការក្រសួង ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ  អគ្គនាយករងនៃអគ្គនាយកដ្ឋានកិច្ចការបច្ចេកទេស នាយកដ្ឋានជំនាញពាក់ព័ន្ធ សមាជិកនៃក្រុមការងារ និងមន្ទីរធនធានទឹក និងឧតុនិយមទាំង២៥ រាជធានី-ខេត្ត។

ឯកឧត្តមរដ្ឋលេខាធិការប្រចាំការបានមានប្រសាសន៍ថា គោលបំណងនៃកិច្ចប្រជុំ គឺដើម្បីពិនិត្យវឌ្ឍនភាព និងជំរុញការងារចុះបញ្ជីអាងស្តុកទឹក និងទំនប់អាងទឹកនៃប្រព័ន្ធធារាសាស្រ្តនៅទូទាំងប្រទេសឱ្យបានលឿន ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

ឯកឧត្តមក៏បានកោតសរសើរ និងវាយតម្លៃខ្ពស់ចំពោះក្រុមការងារ ជាពិសេសមន្ទីរធនធានទឹក និងឧតុនិយមរាជធានី-ខេត្តដែលបានខិតខំប្រឹងប្រែងអនុវត្តការងារចុះបញ្ជីអាងស្តុកទឹក និងអាងទឹកនាពេលកន្លងមក ព្រមទាំងបានណែនាំឱ្យមន្ទីរបន្តយកចិត្តទុកដាក់ពន្លឿនការងារចុះបញ្ជីអាងស្តុកទឹក និងអាងទឹកឱ្យបានឆាប់ ចៀសវាងនូវការទន្រ្ទានកាន់កាប់ដីទាំងនោះដោយខុសច្បាប់៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)