‎AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៥-- ឯកឧត្តម ញ៉ឹក វណ្ណារ៉ា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគម្រោង JCC ចូលរួមជាអធិបតីបើកកិច្ចប្រជុំគណៈកម្មាធិការសម្របសម្រួលរួមលើកទី៣ ជាមួយ លោក យ៉ូ ហ្ស៊ីតូ យ៉ាកូ តំណាងជាន់ខ្ពស់ការិយាល័យ JICA ប្រចាំនៅកម្ពុជា សម្រាប់គម្រោង TRUST ជាគម្រោងការអភិវឌ្ឍន៍សមត្ថភាពដើម្បីជួយជនរងគ្រោះដែលរួចពីការជួញដូរមនុស្ស នៅសណ្ឋាគារ NOVOTEL កាលពីថ្ងៃទី០២ ខែកញ្ញា ឆ្នាំ២០២៥។

ឯកឧត្តម ញ៉ឹក វណ្ណា បានមានប្រសាសន៍ថា កិច្ចប្រជុំនេះមានគោលបំណងពីសំខាន់គឺ ទី១. ដើម្បីពិនិត្យឡើងវិញនូវវឌ្ឍនភាព និងពិភាក្សាអំពីបញ្ហាប្រឈមដែលគម្រោងជួបប្រទះ និងវិធានការចាំបាច់ដែលត្រូវអនុវត្ត ដើម្បីកាត់បន្ថយហានិភ័យ និងបញ្ហាប្រឈមទាំងនេះ និងទី២. ដើម្បីពិនិត្យឡើងវិញនូវការកែប្រែដែលបានដាក់ស្នើឡើងនៃសកម្មភាព និងសូចនាករនៅក្នុងតារាងម៉ាទ្រីសរចនាគម្រោង (PDM) ក៏ដូចជាតម្លៃគោលដៅសម្រាប់សូចនាករនៅក្នុង PDM ដើម្បីឈានដល់ការឯកភាពគ្នាក្នុងចំណោមសមាជិក JCC។

ឆ្លៀតនាឱកាសនេះផងដែរ លោក យ៉ូហ្ស៊ីតូ យ៉ាកូ  តំណាងជាន់ខ្ពស់ទីភ្នាក់ងារសហប្រតិបត្តិការអន្តរជាតិនៃ ប្រទេសជប៉ុន(JICA)បានប្រគល់កញ្ចប់ជំនួយ ចំនួន ១០០កញ្ចប់ មកក្រសួងសង្គមកិច្ច អតីតយុទ្ធជន និងយុវនីតិ សម្បទា ដើម្បីគាំទ្រដល់ជីវភាពប្រជាជនដែលកំពុងប្រឈមមុខនឹងបញ្ហានៅតំបន់ព្រំដែននៃប្រទេសកម្ពុជា។

ក្នុងឱកាសនោះក៏មានការអញ្ជើញចូលរួមពីលោកជំទាវ អនុរដ្ឋលេខាធិការ ឯកឧត្តមអគ្គនាយក អគ្គនាយករងសេវាសង្គមកិច្ច លោក អាន់ដូ ខេនតា លេខាទី១នៃតំណាងស្ថានទូតជប៉ុនប្រចាំកម្ពុជា  ប្រធាននាយកដ្ឋានគាំពារជនរងគ្រោះ ប្រធានមន្ទីរ ស.អ.យ ខេត្តសៀមរាប ត្បូងឃ្មុំ តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA)  និងមន្ត្រីជំនាញ លោកលោកស្រី ប្រធានមជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែតផងដែរ៕

ដោយ ណយ នឿន (ប្រភព៖ ក្រសួងសង្គមកិច្ច)