AKP កំពង់ឆ្នាំង ថ្ងៃទី០៣ ខែកញ្ញា ឆ្នាំ២០២៥-- លោក ជា សុខរិទ្ធ អភិបាលរងខេត្តកំពង់ឆ្នាំង បានបើកកិច្ចប្រជុំស្ដីពីការត្រៀមរៀបចំការពារសណ្ដាប់ធ្នាប់សាធារណៈក្នុងឱកាសបុណ្យកាន់បិណ្ឌនិងភ្ជុំបិណ្ឌ កាលពីថ្ងៃទី០២ ខែកញ្ញា ឆ្នាំ២០២៥ នៅសាលប្រជុំសាលាខេត្តកំពង់ឆ្នាំង ដោយមានការអញ្ជើចូលរួមពីអភិបាលរងខេត្ត នាយករងរដ្ឋបាលសាលាខេត្ត ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងទាំងបីប្រភេទ និងអភិបាលក្រុង ស្រុក ជុំវិញខេត្តផងដែរ។

ក្នុងឱកាសនោះ លោក ជា សុខរិទ្ធ បានមានប្រសាសន៍ថា មន្ទីរអង្គភាពស្ថាប័នជុំវិញខេត្ត រដ្ឋបាលខេត្តនឹងរៀបចំបុណ្យកាន់បិណ្ឌនិងភ្ជុំបិណ្ឌ នៅគ្រប់ទីវត្តអារាមទូទាំងខេត្តដែលជាបេះដូង ជាប្រពៃណីទំនៀមទម្លាប់របស់ខ្មែរយើង ដើម្បីឱ្យបងប្អូនប្រជាពលរដ្ឋបានចូលរួមប្រារព្ធរំលឹកដល់វិញ្ញាណក្ខន្ធសាច់ញាតិ និងវីរកងទ័ពដែលបានពលីក្នុងបុព្វហេតុជាតិមាតុភូមិនៃយើង។

ទន្ទឹមនឹងនេះ លោកបានបន្តថា ការងារការពារសន្តិសុខទាំងយប់ទាំងថ្ងៃ ពោលគឺការពារ២៤ម៉ោងលើ២៤ម៉ោង ចុះរៀបចំធ្វើសណ្ដាប់ធ្នាប់ជាប្រចាំ ដើម្បីឱ្យមានរបៀបរៀបរយល្អប្រសើរ ខណៈពេលចាប់ពីថ្ងៃនេះតទៅរហូតដល់ថ្ងៃបុណ្យ ព្រោះបងប្អូនប្រជាពលរដ្ឋដែលនៅស្រុកឆ្ងាយបានធ្វើដំណើរទៅលេងស្រុកកំណើតរបស់ខ្លួន។ អាជ្ញាធរគ្រប់លំដាប់ថ្នាក់សហការជាមួយសមត្ថកិច្ចត្រូវរក្សាសន្តិសុខសុវត្ថិភាពជូនប្រជាពលរដ្ឋឱ្យបានល្អ ក្នុងឱកាសបុណ្យកាន់បិណ្ឌ និងភ្ជុំបិណ្ឌប្រពៃណីខ្មែរខាងមុខនេះ។

លោកអភិបាលរងខេត្តកំពង់ឆ្នាំងបានជំរុញដល់អាជ្ញាធរក្រុងស្រុក និងមន្ទីរអង្គភាពជុំវិញខេត្តទាំងអស់ត្រូវចុះរៀបចំសណ្តាប់ធ្នាប់នៅតាមដងផ្លូវសាធារណៈឱ្យបានស្អាតល្អ និងសហការជាមួយសមត្ថកិច្ច ត្រូវរក្សាសន្តិសុខ សុវត្ថិភាពជូនប្រជាពលរដ្ឋ  គ្រប់បណ្ដាអង្គភាពទាំងអស់ចូលរួមសហការគ្នាជាមួយខាងគណៈកម្មការអនាម័យ ដើម្បីរួមចំណែករក្សាការពារនូវសន្តិសុខ សុវត្ថិភាព និង កែលម្អរសោភ័ណភាពក្នុងមណ្ឌលកម្សាន្តនានា និងវត្តអារាមឱ្យបានល្អផងដែរ៕

ដោយ បៃ ស៊ីថុន