AKP ភ្នំពេញ ថ្ងៃទី០២ ខែកញ្ញា ឆ្នាំ២០២៥--
បន្ទាប់ពីបានអញ្ជើញបំពេញទស្សនកិច្ច និងចូលរួមពិធីរម្លឹកខួបអនុស្សាវរីយ៍លើកទី៨០ នៃបដិវត្តន៍ ខែសីហា និងទិវាបុណ្យឯករាជ្យជាតិវៀតណាម នៅទីក្រុងហណូយ សាធារណរដ្ឋសង្គមនិយមវៀតណាម ដែលជាការតបតាមការអញ្ជើញរបស់ឯកឧត្ដម តូ ឡឹម អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាមនោះ នារសៀល ថ្ងៃទី០២ ខែកញ្ញា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានអញ្ជើញដឹកនាំគណៈប្រតិភូកម្ពុជាធ្វើដំណើរមាតុភូមិនិវត្តន៍មកដល់កម្ពុជាវិញប្រកបដោយសុវត្ថិភាព។

គួរបញ្ជាក់ដែរថា ពិធីខួបអនុស្សាវរីយ៍លើកទី៨០ នៃបដិវត្តន៍ខែសីហា និងទិវាបុណ្យជាតិរបស់វៀតណាម ត្រូវបានរៀបចំធ្វើយ៉ាងអធិកអធមនៅទីលានបាឌិញ ក្នុងរដ្ឋធានីហាណូយ នៅថ្ងៃ ទី០២ ខែ សីហានេះ។ វត្តមានរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជានិងជាប្រធានព្រឹទ្ឋសភានៅក្នុងព្រឹត្តិការណ៍ដ៍សំខាន់របស់វៀតណាមនៅពេលនេះ បង្ហាញឱ្យឃើញពីការឱ្យតំលៃខ្ពស់របស់ថ្នាក់ដឹកនាំវៀតណាមចំពោះភាពរឹងមាំនៃទំនាក់ទំនងទ្វេភាគីរវាងប្រទេសទំាងពីរ កម្ពុជា-វៀតណាម។ 

ក្នុងអំឡុងពេលធ្វើទស្សនកិច្ច និងចូលរួមពិធីរម្លឹកខួបអនុស្សាវរីយ៍លើកទី៨០ នៃបដិវត្តន៍ខែសីហា និងទិវាបុណ្យឯករាជ្យជាតិនៃសាធារណរដ្ឋសង្គមនិយមវៀតណាម ពីថ្ងៃទី០១-០២ ខែកញ្ញា ឆ្នាំ២០២៥នេះ សម្តេចតេជោប្រធានព្រឹទ្ធសភា ក៏បានពិភាក្សាការងារដាច់ដោយឡែកពីគ្នា ជាមួយថ្នាក់ដឹកនាំវៀតណាមផងដែររួមមាន ឯកឧត្តម តូ ឡឹម អគ្គលេខាធិការបក្សកុម្មុយនីស្តវៀតណាម ឯកឧត្តម ជិន ថាញ់មិន ប្រធានរដ្ឋសភា និងឯកឧត្តម ផាម មិញជិញ នាយករដ្ឋមន្ត្រីនៃសាធារណរដ្ឋសង្គមនិយមវៀតណាមផងដែរ៕

ដោយ៖ ជឹម ណារី