AKP ភ្នំពេញ ថ្ងៃទី០២ ខែកញ្ញា ឆ្នាំ២០២៥-- លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានអញ្ជើញជួបសំណេះសំណាល និងទទួលអំណោយកញ្ចប់ឃីតសម្រាប់ស្ត្រីចំនួន ៦៨០ឃីត ពីលោកស្រី សាន់ដ្រា ប៊ឺនក្លាវ (Ms. Sandra Bernklau) តំណាង អង្គការសហប្រជាជាតិសម្រាប់មូលនិធិប្រជាជន (UNFPA) ប្រចាំនៅកម្ពុជា នាព្រឹកថ្ងៃទី០២ ខែកញ្ញា ឆ្នាំ២០២៥។

ក្នុងនាមកាកបាទក្រហមកម្ពុជា លោកជំទាវអគ្គលេខាធិការបានថ្លែងអំណរគុណយ៉ាងជ្រាលជ្រៅចំពោះអង្គការ UNFPA ដែលបាននាំមកនូវកញ្ចប់ឃីតសម្រាប់ស្ត្រីជាលើកទី២ កាកបាទក្រហមកម្ពុជានឹងចាត់ចែងកញ្ចប់ឃីតទាំងនេះជូនស្ត្រីដែលជាមុខសញ្ញាត្រឹមត្រូវ និងសង្គតិភាពពេលមានគ្រោះមហន្តរាយ ជាពិសេសស្ត្រីជាជនភៀសសឹកដែលកំពុងស្នាក់នៅក្នុងជំរំនានា។

លោកជំទាវក៏បានជម្រាបជូនគណៈប្រតិភូអំពីយុទ្ធសាស្ត្រកាកបាទកម្ពុជា២០២០-២០៣០ និងសកម្មភាពការងារសំខាន់ៗថ្មីៗដែលកាកបាទក្រហមកម្ពុជាបានធ្វើនាពេលកន្លងមកដូចជា ជាពិសេសសកម្មភាពថ្មីនៅជំរំជនភៀសសឹកដូចជាការអប់រំផ្សព្វផ្សាយ ចែកអំណោយ ការថែរក្សាអនាម័យ ។ល។

លោកស្រី សាន់ដ្រា ប៊ឺនក្លាវ តំណាងអង្គការ UNFPA បានថ្លែងនូវការកោតសរសើរចំពោះកាកបាទក្រហមកម្ពុជា ដែលតែងតែមានវត្តមានមុនគេក្នុងការឆ្លើយតបភាពងាយរងគ្រោះទាំងឡាយ។ ជាមួយគ្នានេះ អង្គការ UNFPA នឹងនៅតែបន្តជាដៃគូសហប្រតិបត្តិការដ៏ល្អជាមួយកាកបាទក្រហមកម្ពុជា ដែលមានការប្តេជ្ញាចិត្ត និងបេះដូងមនុស្សធម៌ ហើយតែងតែមានវត្តមានជួយដល់ជនរងគ្រោះនិងងាយរងគ្រោះបានទាន់ពេលវេលា ហើយការផ្តល់អំណោយលើកទី២ឃីតចំនួន៦៨០នេះ សម្រាប់កាកបាទក្រហមកម្ពុជា ចាត់ចែងតាមតម្រូវការចាំបាច់។

សូមបញ្ជាក់ថា អង្គការសហប្រជាជាតិសម្រាប់មូលនិធិប្រជាជន (UNFPA) ប្រចាំនៅកម្ពុជា បានឧបត្ថម្ភ កញ្ចប់ឃីតសម្រាប់ស្ត្រីចំនួន ៦០០ ជូនកាកបាទក្រហមកម្ពុជា កាលពីថ្ងៃទី១១ ខែវិច្ឆិកា ឆ្នាំ២០២៤៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)