AKP ភ្នំពេញ ថ្ងៃទី០២ ខែកញ្ញា ឆ្នាំ២០២៥-- ឯកឧត្តម ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម និងជានាយកគម្រោងស្តង់ដាជាតិប្រព័ន្ធធារាសាស្ត្រ បានអញ្ជើញដឹកនាំកិច្ចប្រជុំលើកទី៣ របស់គណៈកម្មាធិការតាមដាន និងត្រួតពិនិត្យការអនុវត្តគម្រោងស្តង់ដាជាតិប្រព័ន្ធធារាសាស្ត្រ នាថ្ងៃអង្គារ ទី០២ ខែកញ្ញា ឆ្នាំ២០២៥ ដោយមានការចូលរួមមន្ត្រីជាន់ខ្ពស់ និងមន្ត្រីបច្ចេកទេសក្រសួងធនធានទឹក និងឧតុនិយម តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ជំនាញការជប៉ុនប្រចាំគម្រោង តំណាងក្រសួងសាធារណការ និងដឹកជញ្ជូន ក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ និងសាកលវិទ្យាល័យភូមិន្ទកសិកម្ម។

ឯកឧត្តមរដ្ឋលេខាធិការបានឱ្យដឹងថា គោលបំណងនៃកិច្ចប្រជុំគឺដើម្បីពិនិត្យ និងផ្តល់អនុសាសន៍លើសេចក្តីព្រាងឯកសារស្តង់ដាជាតិប្រព័ន្ធធារាសាស្ត្រដែលបានរៀបចំកន្លងមកដោយសមាជិក សមាជិការបស់គណៈកម្មាធិការតាមដាន និងត្រួតពិនិត្យការអនុវត្តស្តង់ដាជាតិប្រព័ន្ធធារាសាស្ត្រ។ ទន្ទឹមនឹងនេះ ក៏សំណូមពរដល់សមាជិក សមាជិកា ចូលរួមពិភាក្សាឱ្យបានផុសផុល និងផ្តល់អនុសាសន៍ល្អៗ ដើម្បីជាធាតុចូលក្នុងការកែលម្អសេចក្តីព្រាងឯកសារស្តង់ដាជាតិប្រព័ន្ធធារាសាស្ត្រឱ្យមានលក្ខណៈគ្រប់ជ្រុងជ្រោយ ព្រមទាំងចូលរួមប្រើប្រាស់ឱ្យអស់លទ្ធភាព និងផ្សព្វផ្សាយដល់អ្នកប្រើប្រាស់ឱ្យបានទូលំទូលាយ។

សូមបញ្ជាក់ថា គម្រោងស្ដង់ដាជាតិប្រព័ន្ធធារាសាស្ត្រ មានរយៈពេល ៤ឆ្នាំ ដោយបានចាប់ផ្តើមដំណើរការសកម្មភាពគម្រោងនៅក្នុងខែមីនា ឆ្នាំ២០២២ ហើយគ្រោងនឹងបញ្ចប់នៅក្នុងខែមីនា ឆ្នាំ២០២៦ ខាងមុខ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)