AKP ភ្នំពេញ ថ្ងៃទី០២ ខែកញ្ញា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា  និងលោកសាស្ត្រាចារ្យបណ្ឌិត Devin Lu Dan អគ្គនាយក និងជានាយកប្រតិបត្តិក្រុមហ៊ុន Geely Talent Development Group នៃសាធារណរដ្ឋប្រជាមានិតចិន ព្រឹកថ្ងៃទី០២ ខែកញ្ញា ឆ្នាំ២០២៥ បានជួបពិភាក្សាការងារក្នុងគោលបំណងពិនិត្យលទ្ធភាពបង្កើតកិច្ចសហប្រតិបត្តិការលើវិស័យអប់រំសម្រាប់គម្រោងអប់រំ "3-TransX Campus” ដែលជាកម្មវិធី Online smart learning platform និងការពិនិត្យលទ្ធភាពដើម្បីកំណត់គោលដៅរួមគ្នា និងកំណត់គម្រោងសហការសាកល្បងដែលមានសក្តានុពល ជាពិសេសរួមសហការគ្នារៀបចំផែនទីបង្ហាញផ្លូវសម្រាប់កិច្ចសហប្រតិបត្តិការជាយុទ្ធសាស្ត្រ ក្នុងការបណ្តុះបណ្តាលការអប់រំឌីជីថល។

ក្នុងជំនួបនោះ លោកសាស្ត្រាចារ្យបណ្ឌិត Devin Lu Dan បានឱ្យដឹងថា ក្រុមហ៊ុន Geely Talent Development Group និងជាសហគ្រាសផលិតរថយន្ត Geely Auto Group ជាបុត្រសម្ព័ន្ធរបស់ក្រុមហ៊ុន Geely Holding Group ដែលស្ថិតក្នុងចំណោមសហគ្រាសលំដាប់កំពូលទាំង៥០០នៅលើពិភពលោក មានគ្រឹះស្ថានផ្តល់សេវាកម្មអប់រំកម្រិតឧត្តមសិក្សា និងគ្រឹះស្ថាននវានុវត្តន៍ ស្របតាមទិសដៅ យុទ្ធសាស្ត្របន្ស៊ីគ្នារវាងសហគ្រាស និងគ្រឹះស្ថានសិក្សា ដោយក្នុងនោះរួមមាន វិទ្យាស្ថាន AI ដែលបណ្ដុះបណ្ដាលធនធាមនុស្សតាមរយៈអនឡាញ និងនៅក្នុងថ្នាក់រៀនផ្ទាល់ ជាពិសេសសម្រាប់កិច្ចសហប្រតិបត្តិការជាមួយកម្ពុជា ក្រុមហ៊ុនបានរៀបចំមូលនិធិសម្រាប់គាំទ្រដល់គម្រោងរបស់និស្សិតកម្ពុជាដែលមានសក្ដានុពល និងថ្នាលឌីជីថលអនឡាញ ដែលអនុញ្ញាតឱ្យនិស្សិតកម្ពុជាប្រើប្រាស់បានដោយមិនគិតថ្លៃ។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្វាគមន៍យ៉ាងកក់ចំពោះការអញ្ជើញមកដល់កម្ពុជារបស់ប្រតិភូក្រុមហ៊ុន Geely Talent Development Group ដោយបានគូសបញ្ជាក់ពីទំនាក់ទំនងមិត្តភាពដែកថែបរវាងកម្ពុជា និងចិនដែលបានឈានដល់កម្រិតជាយុទ្ធសាស្ត្រក្នុងការបង្កើតកិច្ចសហប្រិតិបត្តិការរួមគ្នាលើគ្រប់វិស័យ។

ឯកឧត្តមបានគូសបញ្ជាក់ថា បច្ចុប្បន្នរាជរដ្ឋាភិបាលកម្ពុជាបានកំណត់អាទិភាពលើការបណ្ដុះបណ្ដាលធនធានមនុស្ស ខណៈកម្ពុជាមានចំនួនយុវជនច្រើនដែលត្រូវការជំនាញខ្ពស់សម្រាប់ចូលរួមអភិវឌ្ឍន៍ប្រទេសជាតិ ព្រមទាំងកំពុងផ្តោតការយកចិត្តទុកដាក់បង្កើតប្រព័ន្ធអេកូឡូស៊ីឧស្សាហកម្ម និងមានបំណងចង់សហការជាមួយសហគ្រាសធំៗដែលមានទំនួលខុសត្រូវខ្ពស់។ ក្នុងន័យនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានផ្តល់អនុសាសន៍ចំនួន២ជូនទៅក្រុមហ៊ុន Geely Talent Development  Group ទី១. ពិនិត្យលទ្ធភាពគម្រោងសាកល្បងដែលគាំទ្រដល់ថាមពលបៃតងក្នុងកិច្ចសហប្រតិបត្តិការជាមួយសាកលវិទ្យាល័យនៅកម្ពុជា ទី២. ពង្រីកវិសាលភាពក្នុងវិស័យសហប្រតិបត្តិការ តាមរយៈការបណ្តុះបណ្ដាលរួមគ្នា ដើម្បីបន្ស៉ីគ្នាជាមួយផែនការយុទ្ធសាស្ត្រអភិវឌ្ឍន៍ធនធានមនុស្សរបស់រាជរដ្ឋាភិបាលកម្ពុជា។

ក្នុងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណដល់ Geely Talent Development Group ចំពោះគំនិតផ្តួចផ្តើមផ្សារភ្ជាប់ទំនាក់ទំនង និងកិច្ចសហប្រតិបត្តិការនានាគាំទ្រដល់ការលើកកម្ពស់វិស័យអប់រំនៅកម្ពុជា ដែលពិតជាបានចូលរួមចំណែកយ៉ាងសំខាន់ដល់ការអភិវឌ្ឍធនធានមនុស្ស ឆ្លើយតបនឹងចក្ខុវិស័យរាជរដ្ឋាភិបាលក្នុងការជំរុញឱ្យពលរដ្ឋម្នាក់ត្រូវមានជំនាញមួយយ៉ាងតិចប្រចាំជីវិត ឆ្ពោះទៅសម្រេចចក្ខុវិស័យកម្ពុជាឆ្នាំ ២០៣០ និង២០៥០៕

ដោយ៖ ចាន់ សុភឿន (ប្រភព៖ ក្រសួងអប់រំ)