AKP កំពង់ធំ ថ្ងៃទី០២ ខែកញ្ញា ឆ្នាំ២០២៥-- ឯកឧត្តម អេង ទូច រដ្ឋលេខាធិការ និងជានាយកខុទ្ទការល័យឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី អញ្ជើញចូលរួមក្នុងពិធីរៀបចំវគ្គបណ្តុះបណ្តាលស្តីពីកិច្ចការលេខាធិការដ្ឋានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ នាព្រឹកថ្ងៃទី០២ ខែកញ្ញា ឆ្នាំ២០២៥ នៅសាលប្រជុំសាលាខេត្តដោយមានការអញ្ជើញចូលរួមពីលោក លី វេត អភិបាលរងខេត្តកំពង់ធំ មន្ត្រីបង្គោលនៅតាមក្រសួង ស្ថាប័នមន្ត្រីនៃលេខាធិការដ្ឋានក្រុមការងាររាជរដ្ឋាភិបាលចុះមូលដ្ឋានរាជធានី/ខេត្ត ក្រុង/ស្រុក និងមន្ត្រីបង្គោលនៃក្រុមការងាររាជរដ្ឋាភិបាលចុះឃុំ/សង្កាត់។

លោក លី វេត បានមានប្រសាសន៍ថា ដើម្បីពង្រឹងការបូកសរុបរបាយការណ៍ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំឱ្យបានឆាប់រហ័ស និងទាន់ពេលវេលាបង្កើនប្រសិទ្ធភាពការងាររាជរដ្ឋាភិបាលកម្ពុជានិងក្រុមការងាររាជរដ្ឋាភិបាល ស្រង់របាយការណ៍ បញ្ហាប្រឈម សំណូមពរ ទាមទាររកដំណោះស្រាយ បញ្ហារបស់ប្រជាពលរដ្ឋ និងត្រូវបានដោះស្រាយបញ្ហានោះឱ្យបានជោគជ័យរបស់រាជរដ្ឋាភិបាល ដោះស្រាយបញ្ហាប្រឈមរបស់ប្រជាជន និងជំរុញការអភិវឌ្ឍក្នុងខេត្តកំពង់ធំ ដែលជាខេត្តគោលដៅប្រែក្លាយខេត្តកំពង់ធំជាខេត្តអភិវឌ្ឍន៍លើគ្រប់វិស័យ។ ជំរុញបញ្ហាសេដ្ឋកិច្ច ដោះស្រាយបញ្ហាសង្គម រក្សាស្ថេរភាពឱ្យមានការរីកចម្រើន។ ខេត្តកំពង់ធំមានប្រជាពលរដ្ឋច្រើន ធនធានធម្មជាតិច្រើន ប៉ុន្តែការអភិវឌ្ឍមានកម្រិត យើងត្រូវតែអភិវឌ្ឍ ដើម្បីឱ្យប្រជាពលរដ្ឋទទួលបានចំណូលសមរម្យ និងសូមអរគុណដល់ថ្នាក់ដឹកនាំខេត្ត ធ្វើឱ្យខេត្តកំពង់ធំ មានការទទួលស្គាល់ និងចាប់អារម្មណ៍ពីបណ្តាខេត្តជុំវិញ។ បងប្អូនទាំងអស់ជាលេខាធិការ សម្រាប់កត់ត្រាបញ្ហាប្រឈមនៅតាមមូលដ្ឋានវិធីស្រាស្ត្រក្នុងស្រង់នូវបញ្ហាប្រឈម ការរៀបចំវគ្គបណ្តុះបណ្តាលនេះសំខាន់ណាស់។

ឯកឧត្តម អេង ទូច បានលើកឡើងពីគោលបំណងលើកកម្ពស់ការផ្សារភ្ជាប់ទំនាក់ទំនងរវាងប្រជាពលរដ្ឋជាមួយរាជរដ្ឋាភិបាល តាមរយៈសកម្មភាពថ្នាក់ដឹកនាំមន្ត្រីរាជការគ្រប់លំដាប់ថ្នាក់ ក្នុងការចុះជួបប្រាស្រ័យដោយផ្ទាល់ជាមួយប្រជាពលរដ្ឋគ្រប់មជ្ឈដ្ឋាន ដើម្បីស្វែងយល់អំពីជីវភាពរស់នៅនិងស្ដាប់នូវកង្វល់សំណើ សំណូមពរ បញ្ហាប្រឈមនានានៅតាមមូលដ្ឋាន។ ផ្សព្វផ្សាយអំពីកម្មវិធីនយោបាយយុទ្ធសាស្ត្របញ្ចកោណនិងសមិទ្ធផលនានា របស់រាជរដ្ឋាភិបាលជូនប្រជាពលរដ្ឋជ្រាបនិងស្វែងរកការគាំទ្រចូលរួមអនុវត្ត។ ដោះស្រាយ និងបូកសរុបសំណើ សំណូមពរ បញ្ហាប្រឈមនានានៅមូលដ្ឋាន ដើម្បីកំណត់ពីវិធានការដោះស្រាយឆ្លើយតបទៅនឹងតម្រូវការរបស់ប្រជាពលរដ្ឋ។

ឯកឧត្តម អេង ទូច ជាប្រធានលេខាធិការក្រុមងារចុះមូលដ្ឋានខេត្តកំពង់ធំ បានបញ្ជាក់បន្ថែមទៀតថា ក្រុមការងាររាជរដ្ឋាភិបាលគឺជាយន្តការអន្តរក្រសួង លេខាធិការដ្ឋានក្រុងស្រុក សូមឱ្យក្រុមការងារលេខាធិការដ្ឋានអនុវត្តតាមតួនាទី ភារកិច្ចតម្រង់ទិសគាំទ្រនិងជំរុញការលើកកម្ពស់សមត្ថភាពស្ថាប័ននៅមូលដ្ឋាន ដើម្បីពង្រឹងការទទួលខុសត្រូវ និងជាភាពម្ចាស់របស់មូលដ្ឋានក្នុងការអនុវត្តកម្មវិធីនយោបាយយុទ្ធសាស្ត្របញ្ចកោណដំណាក់កាលទី១ គោលនយោបាយ និងកម្មវិធីកំណែទម្រង់នានារបស់រាជរដ្ឋាភិបាលសំដៅធ្វើការវត្តមូលដ្ឋាន ការលើកកម្ពស់ការផ្ដល់សេវាសាធារណៈនិងដោះស្រាយឆ្លើយតបសំណើ សំណូមពរ សេចក្តីត្រូវការរបស់ប្រជាពលរដ្ឋនៅតាមមូលដ្ឋាននីមួយៗប្រកបដោយប្រសិទ្ធភាពតម្លាភាព និងគណនេយ្យភាព៕

ដោយ ស៊ុម វណ្ណា