AKP តាកែវ ថ្ងៃទី០២ ខែកញ្ញា ឆ្នាំ២០២៥-- រដ្ឋបាលខេត្តតាកែវបានរៀបចំពិធីជួបជុំគ្នាជាក្បួនដង្ហែធម្មយាត្រាដើម្បីសន្តិភាព ទាមទារឱ្យដោះលែងវីរកងទ័ព១៨រូប ដែលសៀមចាប់ខ្លួនក្រោយពីមានបទឈប់បាញ់ និងធ្វើពិធីបង្សុកូលឧទ្ទិសកុសលផលបុណ្យ ជូនដួងវិញ្ញាណក្ខន្ធវីរកងទ័ពដែលបានពលីនៅសមរភូមិមុខ ដោយពិធីនេះចាប់ផ្ដើមធ្វើឡើងពីសួនច្បារមាត់បឹងតាកែវ ឆ្ពោះទៅវិមានឯករាជ្យ ស្ថិតនៅក្នុងក្រុងដូនកែវខេត្តតាកែវ កាលពីព្រឹកថ្ងៃទី០១ ខែកញ្ញា ឆ្នាំ២០២៥ ក្រោមអធិបតីភាពឯកឧត្តម យស ណាស៊ី ប្រធានក្រុមប្រឹក្សាខេត្តតាកែវ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ព្រមទាំងមានការនិមន្តនិងអញ្ជើញចូលរួម ពីព្រះសង្ឃ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋ សរុបប្រមាណជាង១ម៉ឺនអង្គ/នាក់។

ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ដែលបានដឹកនាំក្បួនដង្ហែធម្មយាត្រា បានថ្លែងឱ្យដឹងថា ការជួបជុំគ្នាធ្វើធម្មយាត្រានៅថ្ងៃនេះ បានបង្ហាញឲ្យឃើញនូវស្មារតីស្នេហាជាតិ សាមគ្គីឯកភាពជាតិ របស់បងប្អូនប្រជាពលរដ្ឋមហាគ្រួសារអ្នកខេត្តតាកែវទាំងអស់។ជាពិសេសគឺបង្ហាញឲ្យឃើញ ពីស្មារតីជាតិនិយមពីសមរភូមិក្រោយ ក្នុងន័យផ្ដល់កម្លាំងចិត្ត និងជំនឿជឿជាក់ឥតងាករេលើរាជរដ្ឋាភិបាលកម្ពុជា។ ក្នុងនាមមន្ត្រីរាជការ កងកម្លាំងប្រដាប់អាវុធ ព្រមទាំងប្រជាពលរដ្ឋ ក្នុងខេត្តតាកែវទាំងមូល សូមប្រកាសគាំទ្រយ៉ាងពេញទំហឹងចំពោះយន្ដការដោះស្រាយបញ្ហាព្រំដែន របស់រាជរដ្ឋាភិបាលកម្ពុជា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការលើកយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ។ ការដោះស្រាយបញ្ហាព្រំដែនកម្ពុជា-ថៃដោយសន្តិវិធីបានធ្វើឡើងដើម្បីបង្ហាញឱ្យឃើញថា ប្រជាពលរដ្ឋកម្ពុជា ទាំងព្រះសង្ឃទាំងគ្រហស្ថគឺស្រឡាញ់សន្តិភាព ចង់ឃើញប្រទេសជាតិមានការអភិវឌ្ឍរីកចម្រើនគឺមិនត្រូវការសង្គ្រាមឡើយ។

ឯកឧត្តមអភិបាលខេត្តក៏បានកោតសរសើរដល់វីរកងទ័ពជួរមុខទាំងអស់ដែលបានលះបង់អស់ពីកម្លាំងកាយចិត្ត ដើម្បីបុព្វហេតុការពារបូរណភាពទឹកដីឱ្យបានគង់វង្ស និងបានថ្លែងអំណរគុណយ៉ាងជ្រាលជ្រៅចំពោះលោកប្រធានាធិបតីសហរដ្ឋអាមេរិក ដូ ណាល់ត្រាំ ដែលបានផ្ដួចផ្ដើម និងជំរុញឱ្យមានបទឈប់បាញ់ ជាពិសេសលោកបានអំពាវនាវឱ្យមានការដោះលែងកងទ័ពខ្មែរទាំង១៨រូប ដែលទាហានសៀមចាប់យកទៅក្រោយបទឈប់បាញ់ ដោយគ្មានលក្ខខណ្ឌផងដែរ៕

ដោយ អ៊ុច សៀង