AKP ភ្នំពេញ ថ្ងៃទី០២ ខែកញ្ញា ឆ្នាំ២០២៥-- លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងក្រុមការងារ បានអញ្ជើញសំណេះសំណាលសួរសុខទុក្ខ និងផ្ដល់អំណោយជូនប្រជាពលរដ្ឋ ដែលមានជីវភាពខ្វះខាតសរុបចំនួន១៥០គ្រួសារ ក្នុងបរិវេណវត្តវារីផាសុខារាម ហៅវត្តទឹកជុំ ស្ថិតក្នុងឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង កាលពីព្រឹកថ្ងៃចន្ទ ទី០១ ខែកញ្ញា ឆ្នាំ២០២៥។ 

ពិធីសំណេះសំណាលសួរសុខទុក្ខ និងផ្ដល់អំណោយនេះ រៀបចំឡើងក្រោមគំនិតផ្ដួចផ្ដើមរបស់ព្រះមុនីសីលវង្សា ខុន ឆុន ព្រះរាជាគណៈថ្នាក់កិត្តិយស ព្រះចៅអធិការវត្តវារីផាសុខារាម ហៅទឹកជុំ និងជាព្រះជំនួយការសាលាខេត្តកំពង់ឆ្នាំង និងមានការចូលរួមចំណែកពីក្រសួងកិច្ចការនារី ក្នុងគោលបំណងជួយសម្រួល និងសម្រាលបន្ទុកជីវភាពបណ្ដោះអាសន្នជូនដល់ប្រជាពលរដ្ឋដែលរស់នៅទីនោះ។ 

សូមជម្រាបជូនថា អំណោយដែលគ្រួសារនីមួយៗទទួលបានមានអង្ករ២៥គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ ក្រម៉ា១ សារ៉ុង១ ម្សៅសាប៊ូ១គីឡូក្រាម និងថវិកា៥ម៉ឺនរៀល៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)