AKP ភ្នំពេញ ថ្ងៃទី០១ ខែកញ្ញា ឆ្នាំ២០២៥--ប្រទេសកម្ពុជាបានប្រកាសជំហរជាថ្មីថានៅតែគោរពបទឈប់បាញ់និងអនុវត្តការដោះស្រាយជម្លោះព្រំដែនជាមួយប្រទេសថៃដោយសន្តិវិធីនិងគោរពច្បាប់អន្តរជាតិ។ នេះបើតាមការបញ្ជាក់របស់អ្នកនាំពាក្យក្រសួងការពារជាតិកម្ពុជា នៅរសៀលថ្ងៃទី១ ខែកញ្ញាឆ្នាំ២០២៥។

ថ្លែងក្នុង សន្និសីទសារព័ត៌មានលោក ជំទាវ ឧត្តមសេនីយ៍ឯក ម៉ាលី សុជាតា បានគូសបញ្ជាក់ថា ជាថ្មីម្ដងទៀតកម្ពុជានៅតែប្រកាន់ជំហរដោះស្រាយបញ្ហាព្រំដែនកម្ពុជា-ថៃដោយសន្តិវិធីនិងគោរពច្បាប់អន្តរជាតិដែលមានជាធរមាននិងព្រមទាំងធម្មនុញ្ញអាស៊ាន។

លោកជំទាវអ្នកនាំពាក្យក្រសួងការពារជាតិក៏បានអះអាងថា នៅតាមបន្ទាត់ព្រំដែនកម្ពុជា-ថៃនៅខេត្តព្រះវិហារ ខេត្តបន្ទាយមានជ័យនិងខេត្តឧត្តរមានជ័យ មានសភាពស្ងប់ស្ងាត់ប៉ុន្តែកងកម្លាំងកម្ពុជានៅតែត្រៀមនិងប្រុងប្រយ័ត្នខ្ពស់ជានិច្ច។

អ្នកនាំពាក្យក្រសួងកម្ពុជាតិក៏បានបន្តអំពាវនាវដល់ភាគីថៃត្រូវតែគោរពបទឈប់បាញ់ដែលមានជាធរមាន ព្រមទាំងស្មារតីនិងការឯកភាពនៃកិច្ចប្រជុំវិសាមញ្ញគណៈកម្មការទូទៅព្រំដែនកម្ពុជា-ថៃ(GBC)នៅប្រទេសម៉ាឡេស៊ីកាលពីពេលកន្លងមក និងកិច្ចប្រជុំគណៈកម្មការព្រំដែនភូមិភាគ កម្ពុជា -ថៃ (RBC)កន្លងមកដោយភាគីទាំងពីរឯកភាពក្នុងការដោះស្រាយបញ្ហាដោយសន្តិវិធី ដើម្បីជៀសវាងការប៉ះទង្គិចគ្នានៅតាមបន្ទាត់ព្រំដែន ។
ជាមួយគ្នានោះដែរអ្នកនាំពាក្យក្រសួងការពារជាតិកម្ពុជាក៏បានឲ្យដឹងថាគិតមកត្រឹមថ្ងៃទី១ កញ្ញាឆ្នាំ២០២៥នេះ ទាហានថៃបានចាប់ទាហានកម្ពុជាចំនួន ១៨រូប មានរយៈពេល៣៤ថ្ងៃមកហើយ បន្ទាប់ពីទាហានកម្ពុជាបានគោរពបទឈប់បាញ់ហើយទាហានថៃបានធ្វើការចាប់ខ្លួន។

លើសពីនេះទៅទៀតទាំងរដ្ឋាភិបាលកម្ពុជា ក្រសួងការពារជាតិនៅតែបន្តទទូចឲ្យភាគីថៃឆាប់បញ្ជូនទាហានកម្ពុជាទាំង១៨ រូបមកឲ្យកម្ពុជាវិញឲ្យបានឆាប់រហ័សដើម្បី ឱ្យពួកគេបានជួបកុំគ្រួសារដែលកំពុងតែទន្ទឹងរង់ចាំទាំងថ្ងៃទាំងយប់៕

ដោយ៖ប៊ុនរិទ្ធ