AKP ភ្នំពេញ ថ្ងៃទី០១ ខែកញ្ញា ឆ្នាំ២០២៥-- ឯកឧត្តមសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃបានថ្លែងថា ការរក្សាការពារបានល្អប្រសើរលើការងារសន្តិសុខសណ្តាប់សាធារណៈ និងសុវត្ថិភាពសង្គមក្នុងដែនសមត្ថកិច្ចរបស់ខេត្ត គឺកើតចេញពីការយកចិត្តទុកដាក់អនុវត្តជាប់ជាប្រចាំនូវបណ្តាវិធានការនានា ក្នុងការពង្រឹងការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាពនៅគ្រប់មូលដ្ឋាន រួមនិងការយកចិត្តទុកដាក់ក្នុងការចាត់វិធានការទប់ស្កាត់បទល្មើសនានា និងសកម្មភាពអសកម្មមួយចំនួន សំដៅបង្កលក្ខណៈសុខដុមរមនាដល់ការរស់នៅ និងការប្រកបមុខរបរក្នុងជីវភាពប្រចាំថ្ងៃរបស់ប្រជាពលរដ្ឋបានល្អប្រសើរ។  ការលើកឡើងយ៉ាងដូច្នេះរបស់ឯកឧត្តមសន្តិបណ្ឌិត ចាន់ អ៊ាន ធ្វើឡើងក្នុងកិច្ចប្រជុំបូកសរុបលទ្ធផលការងារភូមិឃុំ សង្កាត់ មានសុវត្ថិភាព ប្រចាំឆមាសទី១ ឆ្នាំ២០២៥ នៅខេត្តព្រៃវែង នាព្រឹកថ្ងៃទី០១ ខែកញ្ញា ឆ្នាំ២០២៥។

ឯកឧត្តមសន្តិបណ្ឌិតបានណែនាំដល់គណៈបញ្ជាការឯកភាពរដ្ឋបាលខេត្ត និងស្នងការដ្ឋាននគរបាល ខេត្តត្រូវខិតខំប្រឹងប្រែង និងយកចិត្តទុកដាក់បន្ថែមទៀតក្នុងការបង្ក្រាបបទល្មើសព្រហ្មទណ្ឌ ការងារប្រយុទ្ធប្រឆាំងគ្រឿងញៀន បង្ក្រាបក្មេងទំនើង ល្បែងស៊ីសង និងការកាត់បន្ថយគ្រោះថ្នាក់ចរាចរណ៍ ជាមួយនោះត្រូវជំរុញនូវការផ្សព្វផ្សាយ និងការៀបចំវេទិការសាធារណៈនៅមូលដ្ឋាន ដើម្បីបង្កើននូវការស្រឡាញ់ជឿទុកចិត្តពីប្រជាពលរដ្ឋមកលើកម្លាំងសមត្ថកិច្ច និងអាជ្ញាធរគ្រប់លំដាប់ថ្នាក់ ព្រមទាំងចូលរួមក្នុងការអនុវត្តគោលនយោបាយភូមិ ឃុំ សង្កាត់ មានសុវត្ថិភាព និងស្ម័គ្រចិត្តចូលរួមក្នុងចលនាប្រជាការពារយាមកាមការពារភូមិ ឃុំ។

បើតាមការលើកឡើងរបស់លោកឧត្ដមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននគរបាលខេត្តព្រៃវែង បានឱ្យដឹងថា ក្នុងឆមាសទី១ ឆ្នាំ២០២៥នេះ គណៈបញ្ជាការឯកភាពរដ្ឋបាលខេត្តបានយកចិត្តទុកដាក់ដឹកនាំ ជំរុញសកម្មភាពការងាររបស់ក្រុមការងារខេត្តចុះតាមមូលដ្ឋានឃុំ សង្កាត់ បន្តការងារដឹកនាំត្រួតពិនិត្យកែលម្អការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាពរបស់ថ្នាក់ស្រុក ក្រុង ឃុំ សង្កាត់ តាមផែនការសកម្មភាព និងទិសដៅត្រូវអនុវត្ត បានបន្តបង្កើនការយកចិត្តទុកដាក់ពង្រឹងការងារត្រួតពិនិត្យសកម្មភាពក្រុមប្រចាំការអចិន្ត្រៃយ៍នៅសាលាខេត្ត ស្រុក ក្រុង ក៏ដូចជាកម្លាំងក្រុមអន្តរាគមន៍នៅថ្នាក់ខេត្ត ស្រុក ក្រុង រួមមាន នគរបាល អាវុធហត្ថ និងយោធា ពិសេសនៅថ្នាក់ឃុំ សង្កាត់ និងបានជំរុញសកម្មភាពក្រុមការងារចុះមូលដ្ឋានឃុំ សង្កាត់របស់គណៈបញ្ជាការឯកភាពខេត្ត រួមជាមួយក្រុមការងារគណៈបញ្ជាការឯកភាពរដ្ឋបាល ស្រុក ក្រុង បានចុះត្រួតពិនិត្យពង្រឹងក្រុមប្រជាការពារធ្វើសកម្មភាពចូលរួមយាមកាមការពារភូមិ ឃុំ និងណែនាំដល់ប្រជាពលរដ្ឋឱ្យយកចិត្តទុកដាក់ប្រុងប្រយ័ត្នថែរក្សាការពារទ្រព្យសម្បត្តិ ត្រួតពិនិត្យ និងពង្រឹងកម្លាំងប៉ុស្តិ៍រដ្ឋបាលបង្កើនសកម្មភាពចុះប្រចាំការជាមួយក្រុមប្រជាការពារ អាជ្ញាធរមូលដ្ឋានរួមធ្វើសកម្មភាពយាមកាមពេលយប់ជាដើម៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)