AKP តាកែវ ថ្ងៃទី០១ ខែកញ្ញា ឆ្នាំ២០២៥-- នៅសាលប្រជុំរដ្ឋបាលស្រុកព្រៃកប្បាស ខេត្តតាកែវ បានរៀបចំពិធីជួបសំណេះ និងនាំយកអំណោយផ្ដល់ជូនក្រុមគ្រួសារវីរកងទ័ពជួរមុខការពារព្រំដែនកម្ពុជា-ថៃចំនួន៥៤គ្រួសាររស់នៅក្នុងស្រុកព្រៃកប្បាស ខេត្តតាកែវ កាលពីព្រឹកថ្ងៃអាទិត្យ ទី៣១ ខែសីហា ឆ្នាំ២០២៥ ក្រោមអធិបតីភាពឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងដោយមានការចូលរួមពីសមាជិកក្រុមប្រឹក្សាខេត្តតាកែវ អភិបាលរងខេត្តតាកែវ ប្រធានអនុប្រធានមន្ទីរអង្គភាពជុំវិញខេត្ត ថ្នាក់ដឹកនាំមន្ត្រីរាជការកងកម្លាំងប្រដាប់អាវុធចំណុះរដ្ឋបាលស្រុកព្រៃកប្បាស និងក្រុមគ្រួសារយោធិនជួរមុខចំនួន៥៤គ្រួសាររស់នៅក្នុងភូមិសាស្ត្រស្រុកព្រៃកប្បាស ខេត្តតាកែវ។

ថ្លែងចំពោះមុខក្រុមគ្រួសារវីរកងទ័ពជួរមុខ ឯកឧត្តម វ៉ី សំណាង អភិបាលខេត្តតាកែវ បានសម្ដែងការកោតសរសើរដល់បងប្អូនវីរកងទ័ពទាំងអស់ ដែលបានលះបង់សាច់ស្រស់ឈាមស្រស់ ក្នុងការប្រយុទ្ធ ជាមួយកងទ័ពសៀមឈ្លានពាន និងបានធ្វើការទប់ស្កាត់មិនឱ្យក្រុមទាហានឈ្លានពានសៀម ចូលមករំលោភបូរណភាពទឹកដីខ្មែរយើងបានឡើយ គំរូវីរភាពដ៏អង់អាចក្លាហានរបស់កងទ័ពធ្វើឱ្យយើងទាំងអស់គ្នា មានការកោតស្ញប់ស្ញែង និងចងចាំគ្មានថ្ងៃបំភ្លេចចំពោះគំរូវីរភាពនេះ។

ឯកឧត្តម វ៉ី សំណាង ក៏បានគោរពថ្លែងអំណរគុណ និងដឹងគុណយ៉ាងជ្រាលជ្រៅចំពោះក្រុមគ្រួសារកងទ័ពទាំងអស់ ដែលបានលះបង់ប្ដី ឪពុក បង ប្អូន កូន ក្មួយ ឱ្យទៅប្រយុទ្ធតតាំងជាមួយពួកសត្រូវ សៀមឈ្លានពាននៅសមរភូមិមុខ ហើយយើងទាំងអស់គ្នាដែលនៅសមរភូមិក្រោយ នឹងធ្វើជាកម្លាំងចលករ ជំរុញអ្នកនៅសមរភូមិមុខ តាមរយៈការលើកទឹកចិត្តផ្ដល់សម្ភារស្បៀងអាហារជូនទៅសមរភូមិមុខ ជាពិសេសយកចិត្តទុកដាក់ដល់ក្រុមគ្រូសារកងទ័ពគ្រប់បែបយ៉ាង។

ឯកឧត្តម វ៉ី សំណាង ក៏បានលើកឡើងប្រាប់ក្រុមគ្រូសារកងទ័ពពីបងប្អូនប្រជាពលរដ្ឋក្នុងខេត្តតាកែវ ដែលមានទឹកចិត្តស្នេហាជាតិ ដោយបានចំណាយនូវធនធានផ្ទាល់ខ្លួន ទាំងថវិកា និងសម្ភារជាស្បៀងអាហារ ផ្ដល់ជូនបងប្អូនជនភៀសសឹកជាពិសេសបានឧបត្តម្ភដលវីរកងទ័ពនៅសរភូមិមុខផងដែរ និងបានចែកអំណោយជូនក្រុមគ្រួសារកងទ័ពជួរមុខការពារព្រំដែនកម្ពុជា-ថៃទាំង៥៤គ្រួសារ ដោយក្នុងមួយគ្រួសារៗទទួលបាន អង្ករ២៥គីឡូក្រាម មីខ្លាឃ្មុំ១កេស ទឹកស៊ីអ៊ីវ១យួរ ទឹកត្រី១យួរ ត្រីខ១យួរ និងថវិកាមួយចំនួនផងដែរ៕

ដោយ អ៊ុច សៀង