AKP កំពង់ស្ពឺ ថ្ងៃទី៣១ ខែសីហា ឆ្នាំ២០២៥-- ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងលោកជំទាវ ម៉េង វ៉ាន់ដានីន បានអញ្ជើញជាអធិបតីភាពក្នុងពិធីបុណ្យបញ្ចុះបឋមសិលាកសាងសាលាធម្មសភា វត្តសាមគ្គីរាជវរារាម ហៅវត្តថ្មី ស្ថិតនៅភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ នៅថ្ងៃទី៣១ ខែសីហា ឆ្នាំ២០២៥។

ក្នុងពិធីបុណ្យនេះផងដែរមានវត្តមានព្រះគ្រូធម្មានុរក្ខមុនី កែម ប៊ុន ព្រះវិន័យធម៌គណខេត្ត គណៈធម្មយុត្តិកនិកាយ និងជាព្រះចៅអធិការវត្តសាមគ្គីរាជវរារាម ហៅវត្តថ្មី និងមានវត្តមានអញ្ជើញចូលរួមពីសំណាក់ឯកឧត្តមសមាជិកក្រុមប្រឹក្សាខេត្ត ឯកឧត្តម លោកជំទាវអភិបាលរងខេត្ត លោកអភិបាលក្រុង លោក លោកស្រីប្រធាន អនុប្រធានមន្ទីរជុំវិញខេត្ត ព្រមទាំងព្រះសង្ឃ លោកអាចារ្យយាយជីព្រមទាំងពុទ្ធបរិស័ទជិតឆ្ងាយចូលរួមយ៉ាងច្រើនកុះករ។

ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានធ្វើការកោតសរសើរ និងថ្លែងអំណរគុណដោយស្មោះចំពោះព្រះថេរានុថេរៈគ្រប់ព្រះអង្គ និងគណៈកម្មការអាចារ្យវត្តទាំងអស់ ដែលបានខិតខំប្រឹងប្រែងកៀរគរ បច្ច័យពីសប្បុរជន និងពុទ្ធបរិស័ទគ្រប់ទិសទី ដែលបានលះបង់ទាំងកម្លាំង កាយចិត្ត និងសម្ភារចូលរួមចាប់មគ្គផលកសាងសមិទ្ធផលយ៉ាងច្រើនសន្ធឹកសន្ធាប់ នៅក្នុងទីវត្តអារាមនេះ ក្នុងការជួយលើកម្ពស់វិស័យព្រពុទ្ធសាសនា ដែលជាសាសនារបស់រដ្ឋ។ ឯកឧត្តមបណ្ឌិតអភិបាលខេត្ត និងលោកជំទាវ បានប្រគេនជូនស៊ីម៉ង់ត៍ចំនួន ៥០តោន ជូនដល់ព្រះចៅអធិការវត្តសម្រាប់កសាង និងបល្ល័ង្គព្រះពុទ្ធរូបស្ពាន់ផងដែរ៕

ដោយ លឹម សាន្ត