AKP កំពង់ធំ ថ្ងៃទី៣១ ខែសីហា ឆ្នាំ២០២៥-- ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំប្រឡាយនិងឃុំពពក បានមានប្រសាសន៍ថាប្រជាការពារគឺជាកត្តាលិករដ៏សំខាន់ដែលជំរុញឱ្យគោលនយោបាយភូមិឃុំមានសុវត្ថិភាពកាន់តែមានប្រសិទ្ធភាពខ្ពស់ ក្នុងឱកាសអញ្ជើញជាអធិបតីក្នុងពិធីប្រគល់ឯកសណ្ឋានប្រជាការពារចំនួន១៣៣កំប្លេចែកជូនប្រជាការពារនៅមូលដ្ឋានឃុំប្រឡាយ ស្រុកស្ទោង ខេត្តកំពង់ធំ នាព្រឹកថ្ងៃទី៣១ ខែសីហា ឆ្នាំ២០២៥។

ឯកឧត្តម ចាន់ យុត្ថា បានសម្ដែងនូវមោទកភាពក្រៃលែងបំផុតដែលឯកសណ្ឋានប្រជាការពារចែកជូននៅក្នុងឱកាសនេះគឺជាការកាត់ដេ រនិងផលិតឡើងនៅក្នុងមូលដ្ឋានឃុំប្រឡាយគឺដើម្បីជំរុញកម្រិតជីវភាព និងគាំទ្រអាជីវកម្មខ្នាតតូចក្នុងឃុំ ដែលក្រុមការងាររាជរដ្ឋាភិបាលចុះឃុំប្រឡាយ និងឃុំពពក កន្លងមកតែងតែគាំទ្រ និងប្រើប្រាស់ផលិតផល ព្រមទាំងសេវាកម្ម នានាក្នុងឃុំផ្ទាល់សម្រាប់ឧបត្ថម្ភគាំទ្រដល់អ្នកមូលដ្ឋានក្នុងឃុំ ថ្វីដ្បិតការកាត់ដេរនៅពេលនេះប្រើរយៈពេលយូរជាង និងចំណាយច្រើនជាង ការបញ្ជាទិញពីក្រៅបន្តិចមែន តែវាបានជួយលើកកម្ពស់កម្រិតជីវភាពរបស់បងប្អូនដែលកំពុងប្រកបរបរក្នុងឃុំយ៉ាងប្រសើរ ហើយឯកឧត្តមបានសម្ដែងការអរគុណ និងលើកទឹកចិត្តខ្ពស់បំផុតដល់បងប្អូនប្រជាការពារដែលបានលះបង់សព្វបែបយ៉ាងក្នុងការចូលរួមចំណែករក្សា និងលើកកម្ពស់សុវត្ថិភាពមូលដ្ឋានបានល្អប្រសើរកន្លងមក។

សូមបញ្ជាក់ថាក្នុងឧកាសនេះឯកឧត្តមបានឧបត្ថម្ភដល់ប្រជាការពារក្នុង១នាក់ចំនួន២ម៉ឺនរៀល ហើយបានឆ្លៀតសួរសុខទុក្ខ និងលើកទឹកចិត្តវីរកងទ័ពជួរមុខ ពលបាលទោ ផាត សំណាង នៅភូមិក្រែក ឃុំប្រឡាយ ស្រុកស្ទោង ខេត្តកំពង់ធំ ប្រចាំការសមរភូមិមុខទិសប្រាសាទព្រះវិហារ និងបានឧបត្ថម្ភថវិកាចំនួន៥០ម៉ឺនរៀល៕

ដោយ ស៊ុម វណ្ណា