AKP ភ្នំពេញ ថ្ងៃទី៣១ ខែសីហា ឆ្នាំ២០២៥–អង្គភាពប្រឆាំងអំពើពុករលួយឬហៅថា ACU កំពុងដំណើរស្រាវជ្រាវករណីមានការបង្ហោះ”បែកធ្លាយវិញ្ញាសាគណិតវិទ្យា”ក្នុងការប្រឡងបាក់ឌុប ដែលទើបបញ្ចប់កាលពីថ្មីៗមកនេះដែលនាំឱ្យមានការភាន់ច្រឡំ។
      ការប្រឡងសញ្ញាបត្រមធ្យមសិក្សាទុតិយភូមិ ឬហៅថាបាក់ឌុប បានដំណើរការប្រឡងរយៈពេល២ថ្ងៃពោលគឺចាប់ពីថ្ងៃទី២៨ និងទី២៩ ខែសីហា ឆ្នាំ ២០២៥កន្លងមក។
   បើតាមអង្គភាពប្រឆាំងអំពើពុករលួយបានឱ្យដឹងថា៖ ក្រុមការងារនៅតែរកមិនឃើញរូបពិត ប្រាកដនៃវិញ្ញាសាគណិតវិទ្យានេះនៅតាមការបង្ហោះនានានៅឡើយទេ ហើយឃើញតែរូបថតវិញ្ញា សាវាយអក្សរឡើងវិញ ហើយថតដោយកាត់គែម (Crop) និងរូបថត ជាវិញ្ញាសាគណិតវិទ្យាដែលថត ផ្សាយព្រាលៗ រូបខ្លះមានឃើញហត្ថលេខាសង្ខេប ដែលទាំងនោះមិនមែនជារូបវិញ្ញាសាគណិតវិទ្យារូបរាងពិតឡើយ។ 
          ជាមួយគ្នានេះអង្គភាពប្រឆាំងអំពើពុករលួយក៏បានស្នើសុំសហការផងដែរ ពីអ្នកប្រើប្រាស់បណ្ដាញសង្គម   ដើម្បីឱ្យការស្រាវជ្រាវអាចសម្រេចជោគជ័យ និងរកការពិតឃើញយ៉ាងពិតប្រាកដ។
         គួរបញ្ជាក់ថា ក្រសួងអប់រំយុវជន និង កីឡាបានបញ្ជាក់ថាមិនមានធ្លាយវិញ្ញាសាការប្រឡងបាក់ឌុបឡើយ ហើយករណីបង្ហោះនេះតាមបណ្តាញសង្គមហ្វេសប៊ុកនេះជាជាការមិនពិតនោះទេ៕

ដោយ៖មករា