AKP ភ្នំពេញ ថ្ងៃទី៣១ ខែសីហា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសបានលើកឡើងថា ការប្រឡងឆ្នាំនេះប្រព្រឹត្តិទៅក្នុងលក្ខណៈពិសេស ខណៈកម្ពុជាកំពុងមានជម្លោះព្រំដែនជាមួយប្រទេសថៃ ដែលបានធ្វើឱ្យប៉ះពាល់ដល់ស្ថានភាពរៀន និងបង្រៀននៅសាលារៀនជាប់ព្រំដែន និងសតិអារម្មណ៍របស់បេក្ខជនប្រឡងទាំងអស់។ 

ការលើកឡើងរបស់រដ្ឋមន្ត្រីក្រសួងអប់រំយ៉ាងដូច្នេះធ្វើឡើងក្នុងកិច្ចប្រជុំស្តីពីការបូកសរុប និងវាយតម្លៃដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ នារសៀលថ្ងៃទី៣០ ខែសីហា ឆ្នាំ២០២៥ នៅវិទ្យាស្ថានជាតិអប់រំ។

ឯកឧត្តមបណ្ឌិតសភាចារ្យបានគូសបញ្ជាក់ថា គោលបំណងនៃកិច្ចប្រជុំនេះគឺដើម្បីប្រមូលរបាយការណ៍ស្តីពីដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ របស់ឯកឧត្តម លោកជំទាវ ប្រធានគណៈមេប្រយោគទូទាំងប្រទេសប្រចាំរាជធានី-ខេត្ត ដោយផ្តោតលើចំណុចសំខាន់ៗចំនួន៤ រួមមាន ១.ចំនួនមណ្ឌលប្រឡង ចំនួនបេក្ខជនមានសិទ្ធប្រឡង និងចំនួនអវត្តមាន ២.ប្រសិទ្ធភាពនៃការបំពេញការងាររបស់គណៈមេប្រយោគ និងគណៈកម្មការនានា ៣.កិច្ចសហការរវាងគណៈមេប្រយោគ គណៈកម្មការនានា និងអ្នកពាក់ព័ន្ធ ៤. សន្និដ្ឋាន។

ក្នុងកិច្ចប្រជុំនេះ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់លើដំណើរការសំណេរទាំងពីរថ្ងៃដែលពុំមានឧបទ្ទវហេតុអ្វីកើតឡើងគួរឱ្យកត់សម្គាល់ ដោយគណៈមេប្រយោគគ្រប់លំដាប់ថ្នាក់មានការទទួលខុសត្រូវខ្ពស់ ក្នុងការបំពេញភារកិច្ចប្រកបដោយបទពិសោធន៍ ហើយចំពោះទិដ្ឋភាពរួមបេក្ខជនបានគោរពបទប្បញ្ញត្តិនៃការប្រឡងយ៉ាងល្អ។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន សូមថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំតាមបណ្ដារាជធានី-ខេត្ត និងភាគីពាក់ព័ន្ធទាំងអស់ ជាពិសេសក្រុមការងារអង្គភាពប្រឆាំងអំពើពុករលួយ អាជ្ញាធរដែនដី កងកម្លាំងមានសមត្ថកិច្ច សហភាពសហព័ន្ធយុវជនកម្ពុជា និងអ្នកសង្កេតការណ៍ទាំងអស់ ដែលបានផ្ដល់កិច្ចសហការយ៉ាងយកចិត្តទុកដាក់ និងទទួលខុសត្រូវខ្ពស់ ជាផ្នែកមួយដ៏សំខាន់ជំរុញឱ្យដំណើរការនៃការប្រឡងឆ្នាំនេះប្រព្រឹត្តទៅដោយរលូន និងបានគូសបញ្ជាក់ពីសារៈសំខាន់នៃការចូលរួមមតិយោបល់ និងចែករំលែកបទពិសោធន៍ជួបផ្ទាល់ក្នុងអំឡុង២ថ្ងៃនៃដំណើរការសំណេរកន្លងមកនេះ ពីសំណាក់អ្នកពាក់ព័ន្ធនឹងដំណើរការប្រឡងពីគ្រប់មជ្ឈដ្ឋាន ដើម្បីបន្តកែលម្អយន្តការរៀបចំការប្រឡងសញ្ញាបត្រមធ្យមសិក្សាទុតិយភូមិកាន់តែល្អប្រសើរឡើងពីមួយឆ្នាំទៅមួយឆ្នាំ ឆ្លើយតបនឹងគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន ពោលគឺ “អ្នកចេះគឺជាប់”៕

ដោយ៖ ចាន់ សុភឿន (ប្រភព៖ ក្រសួងអប់រំ)