AKP ភ្នំពេញ ថ្ងៃទី៣១ ខែសីហា ឆ្នាំ២០២៥-- ក្រុមការងារការិយាល័យអភិរក្សនៃអាជ្ញាធរទន្លេសាប ចាប់ពីថ្ងៃទី២៦ ដល់ថ្ងៃទី៣០ ខែសីហា ឆ្នាំ២០២៥ បានបន្តចុះសិក្សាស្វែងយល់ និងពិគ្រោះយោបល់ជាមួយសហគមន៍ ព្រមទាំងអ្នកពាក់ព័ន្ធនានា ដើម្បីអាចកំណត់វិភាគមុខងារលើតំបន់អភិរក្សជលផលអតីតឡូតិ៍នេសាទលេខ៦ តំបន់ ទន្លេឆ្មារ ស្ថិតក្នុងភូមិដូនស្តើង និងភូមិពៅវើយ ឃុំពាមបាង ស្រុកស្ទោង ខេត្តកំពង់ធំ។

ក្នុងដំណើរបេសកកម្មនេះ ក្រុមការងារបាន ជួបពិភាក្សា និងប្រមូលព័ត៌មានជាមួយមេឃុំ ក្រុមប្រឹក្សាឃុំម្សាក្រង និងឃុំកំពង់ចិនជើង ដែលជាឃុំពាក់ព័ន្ធ ជួបពិភាក្សា និងប្រមូលព័ត៌មានជាមួយសហគមន៍នេសាទ និងប្រជានេសាទនៅភូមិពាម ឃុំម្សាក្រង និង ជួបពិភាក្សា និងប្រមូលព័ត៌មានជាមួយសហគមន៍នេសាទ និងប្រជានេសាទនៅភូមិនាងសល្ងាច ឃុំកំពង់ចិនជើង។ ក្រុមការងារចុះបំពេញបេសកកម្មនេះមានគោលបំណងសំខាន់ៗគឺ៖ ទី១. ស្វែងយល់ពីបញ្ហាប្រឈមផ្សេងៗ ដែលជះឥទ្ធិពលដល់តំបន់បឹងទន្លេឆ្មារ និងទាញផលប្រយោជន៍ពីតំបន់នេះ ទី២. ស្វែងយល់ពីសក្តានុពល និងការប្រែប្រួលនៃធនធានជលផល ជីវៈចម្រុះ ព្រៃលិចទឹក និងប្រព័ន្ធអេកូឡូស៊ី និងទី៣. ពិនិត្យ និងវាយតម្លៃលើទីតាំងពាក់ព័ន្ធជាក់ស្តែងពីបម្រែបម្រួលបទល្មើស និងធនធានធម្មជាតិខាងលើ។

សូមជម្រាបជូនថា សកម្មភាពចុះសិក្សាស្វែងយល់ និងពិគ្រោះយោបល់ជាមួយសហគមន៍ ព្រមទាំងអ្នកពាក់ព័ន្ធនានា ដើម្បីអាចកំណត់វិភាគមុខងារ លើតំបន់អភិរក្សជលផលខាងលើនេះ គឺជាសកម្មភាពមួយក្នុងចំណោមសកម្មភាពសំខាន់ៗជាច្រើនដែលត្រូវបានអនុម័តដាក់អនុវត្តនៅក្នុងផែនការសកម្មភាពប្រចាំនឆ្នាំ២០២៥ របស់អាជ្ញាធរទន្លេសាប៕

ដោយ ណយ នឿន (ប្រភព៖ អាជ្ញាធរទន្លេសាប)