AKP ភ្នំពេញ ថ្ងៃទី៣០ ខែសីហា ឆ្នាំ២០២៥--
ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានគូសបញ្ជាក់ថា កម្ពុជា និងបណ្ដារដ្ឋអាស៊ានប្ដេជ្ញារួមគ្នាប្រយុទ្ធប្រឆាំងគ្រឿងញៀនដោយប្រកាន់នូវគោលការណ៍មិនលើកលែងចំពោះករណីគ្រឿងញៀន។ ការគូសបញ្ជាក់របស់ឯកឧត្តម នាយឧត្តមសេនីយ៍បែបនេះ ក្នុងឱកាសដែលលោកដឹកនាំប្រតិភូកម្ពុជាចូលរួមក្នុងកិច្ចប្រជុំមន្ត្រីជាន់ខ្ពស់អាស៊ាន លើកទី៤៦ ស្តីពីបញ្ហាគ្រឿងញៀន និងកិច្ចប្រជុំពាក់ព័ន្ធ (Plenary Meeting of 46TH ASEAN Senior Officials Meeting on Drug Matters and Its Related Meeting)” ចាប់ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៥។ 

ឯកឧត្តម នាយឧត្តមសេនីយ៍ មាស វិរិទ្ធ បានថ្លែងថា កិច្ចប្រជុំលើកទី ៤៦ នេះ បណ្ដាលរដ្ឋអាស៊ានបានរួមគ្នាពិនិត្យនិងពិភាក្សាលើវឌ្ឍនភាពការងារត្រួតពិនិត្យគ្រឿងញៀនអាស៊ាន និងផែនការសកម្មភាពនៃកិច្ចប្រជុំក្រុមការងារត្រួតពិនិត្យគ្រឿងញៀនប្រចាំកំពង់ផែសមុទ្រលើកទី៩ (9th ASITF) កិច្ចប្រជុំក្រុមការងារអាកាសយានដ្ឋានអន្តរជាតិលើកទី១៤ (14th AAITF) និងផែនការសកម្មភាពអាស៊ានក្នុងការប្រយុទ្ធប្រឆាំងគ្រឿងញៀនឆ្នាំ២០១៦-២០២៥ និងបន្តពិភាក្សាលើប្រធានបទចំនួន០៥ គឺ ទី១.ការងារអប់រំ បង្ការ ទី២.ការងារព្យាបាលស្ដារនីតិសម្បទា ទឺ៣.ការងារអនុវត្តច្បាប់ ទី៤.ដំណាំជំនួសគ្រឿងញៀន និងទី៥.ការងារស្រាវជ្រាវ។ ឯកឧត្តម នាយឧត្តមសេនីយ៍បានបញ្ជាក់ផងដែរថា កម្ពុជាបានចូលរួមក្នុងកិច្ចប្រជុំមន្ត្រីជាន់ខ្ពស់អាស៊ានស្តីពីគ្រឿងញៀន ASOD ជាមួយដៃគូសន្ទនា រួមមាន ប្រទេសចិន ជប៉ុន កូរ៉េ ឥណ្ឌា អូស្រ្តាលី និងប្រទេសរុស្ស៊ី ផងដែរ។ 

ក្នុងព្រឹត្តិការណ៍នៃកិច្ចប្រជុំលើកទី៤៦ នោះដែរ ឯកឧត្តម នាយឧត្តមសេនីយ៍ មាស វិរិទ្ធ បានសង្កត់ធ្ងន់ថា កម្ពុជាបានប្ដេជ្ញាចិត្តចូលរួមប្រយុទ្ធប្រឆាំងគ្រឿងញៀនទាំងក្នុងតំបន់ និងសកលលោក ដោយប្រកាន់នូវគោលការណ៍មិនលើកលែងចំពោះករណីគ្រឿងញៀន ដើម្បីឆ្លើយតបទៅនឹងចក្ខុវិស័យអាស៊ានគ្មានគ្រឿងញៀនតាមរយៈយុទ្ធនាការប្រយុទ្ធប្រឆាំងគ្រឿងញៀន និងផែនការសកម្មភាពការងារប្រយុទ្ធប្រឆាំងគ្រឿងញៀននៅកម្ពុជា២០២៤-២០២៨។ ទន្ទឹមនេះ ឯកឧត្ដម នាយឧត្ដមសេនីយ៍ក៏បានបន្ថែមថា កម្ពុជាចូលរួមគ្រប់យន្តការទ្វេភាគី ត្រីភាគី និងអន្តរជាតិ ការប្រយុទ្ធប្រឆាំងគ្រឿងញៀនតាមប្រព័ន្ធបច្ចេកវិទ្យាឌីជីថលលើទូរសព្ទដៃ NoDrug  ដែលផ្ដល់ចំណេះដឹង និងការរាយការណ៍ដើម្បីយកគ្រឿងញៀនចេញពីសហគមន៍៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន