AKP កំពង់ធំ ថ្ងៃទី៣០ ខែសីហា ឆ្នាំ២០២៥-- នៅទីបញ្ជាការតំបន់ប្រតិបត្តិការសឹករងកំពង់ធំយោធភូមិភាគទី៤ នាព្រឹកថ្ងៃទី៣០ ខែសីហា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានគណៈបញ្ជាការឯកភាពរដ្ឋបាលខេត្ត និងជាអនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានប្រគល់ស្បៀងអាហារគ្រឿងឧបភោគបរិភោគភេសជ្ជៈ ប្រេងឥន្ធនៈដែលជាជំនួយឧបត្ថម្ភរបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំជូនដល់ទីបញ្ជាការស្រាលការពារ ទប់ស្កាត់ និងបង្ក្រាបបទល្មើសធនធានធម្មជាតិចំនួន៩គោលដៅ នៅក្នុងភូមិសាស្ត្រស្រុកសណ្ដាន់ និងស្រុកប្រាសាទបល្ល័ង្ក។

ជាកិច្ចចាប់ផ្ដើម ឧត្តមសេនីយ៍ទោ សោម ស៊ុន និងអង្គពិធីទាំងមូលបានគោរពវិញ្ញាណក្ខន្ធចំពោះវីរយុទ្ធជន ដែលបានពលីជីវិតដ៏អង់អាចក្លាហាន ក្នុងបុព្វហេតុការពារជាតិការពារបូរណភាពទឹកដីពីការឈ្លានពានដ៏សាហាវឃោរឃៅ ព្រៃផ្សៃ ពីសំណាក់ពួកចោរសៀម មកលើដែនអធិបតេយ្យភាពកម្ពុជានៅតាមព្រំដែនក្នុងភូមិសាស្ត្រខេត្តឧត្តរមានជ័យ និងខេត្តព្រះវិហារនាពេលកន្លងទៅថ្មីៗនេះ នឹងបានសូមបួងសួរឱ្យវិញ្ញាណក្ខន្ធវីរយុទ្ធជនរបស់យើងបានទៅកាន់សុខគតិភពកុំបីឃ្លៀងឃ្លាតឡើយ។

ឧត្តមសេនីយ៍ទោ សោម ស៊ុន បានថ្លែងនូវកាកោតសរសើរចំពោះកងកម្លាំងចម្រុះនៅទីបញ្ជាការស្រាទាំង៩ ដែលបានធ្វើសកម្មភាពយ៉ាងសកម្ម នៅតំបន់ដែនជម្រកសត្វព្រៃ ព្រៃឡង់ ក្នុងភូមិសាស្ត្រស្រុកសណ្ដាន់ និងតំបន់ដែនជម្រកសត្វព្រៃបឹងពែ ក្នុងភូមិសាស្ត្រស្រុកប្រាសាទបល្ល័ង្ក និងដែនគម្របព្រៃឈើស្រុកសណ្ដាន់ និងស្រុកសន្ទុក ខេត្តកំពង់ធំ។ ជាលទ្ធផលក្នុងរយៈពេលជាងមួយឆ្នាំនៃយុទ្ធនាការការពារ ទប់ស្កាត់ និងបង្ក្រាបបទល្មើសធនធានធម្មជាតិកន្លងទៅនេះ ដោយបានចាប់ផ្ដើមអនុវត្តពីថ្ងៃទី០១ ខែឧសភា ឆ្នាំ២០២៤ មកដល់បច្ចុប្បន្ននេះ កងកម្លាំងចម្រុះរបស់យើងបានរកឃើញផ្ទៃដីដែលក្រុមជនល្មើសលួចកាប់ទន្ទ្រានយកធ្វើជាកម្មសិទ្ធិនាពេលកន្លងទៅ មានចំនួន ជិត ៤០០០ហិកតា ហើយបច្ចុប្បន្នផ្ទៃដីទាំងនោះត្រូវបានកងកម្លាំងចម្រុះ និងស្ថាប័នជំនាញពាក់ព័ន្ធ ធ្វើការគ្រប់គ្រង ព្រមទាំងរួមគ្នាដាំស្ដារព្រៃឈើឡើងវិញនៅលើផ្ទៃដីដែលបានដករហូតជាសម្បត្តិរដ្ឋ បានចំនួនជាង ៥ម៉ឺនដើមរួចមកហើយ ។ ជាមួយនោះ ក៏បានចាប់ឃាត់ខ្លួនជនប្រព្រឹត្តបទល្មើសបានមួយចំនួន រួមជាមួយមធ្យោបាយជាវត្ថុតាងបញ្ជូនទៅកាន់តុលាការ ដើម្បីផ្ដន្ទាទោសតាមច្បាប់រួចមកហើយ។

ឧត្តមសេនីយ៍ទោ សោម ស៊ុន បានប្រគល់ភារកិច្ចជូនដល់កងកម្លាំងចម្រុះទាំងអស់ ត្រូវបន្តរួមគ្នាធ្វើសកម្មភាព ឱ្យបានសកម្មថែមទៀត ធ្វើយ៉ាងណាប្ដេជ្ញាចិត្ត ការពារ ទប់ស្កាត់ និងបង្ក្រាបឱ្យបានជនល្មើសលួចកាប់ទន្ទ្រានព្រៃឈើយកដីធ្វើជាកម្មសិទ្ធិ។ក្រុមជនលើសមួយចំនួន នៅតែលួចចូលកាប់ដឹកជញ្ជូនឈើខុសច្បាប់ ដើម្បីចាប់ឃាត់ខ្លួន រួមជាមួយវត្ថុតាងបញ្ជូនទៅកាន់តុលាការដើម្បីផ្ដន្ទាទោសតាមផ្លូវច្បាប់ ដោយគ្មានការលើកលែងឡើយ។

នៅក្នុងឱកាសនេះ ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍ គណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិ តំណាងឱ្យឯកឧត្តម នួន ផារ័ត្ន អភិបាលខេត្ត និងជាប្រធានគណបញ្ជាការឯកភាពរដ្ឋបាលខេត្តកំពង់ធំ បានប្រគល់ជូនស្បៀងអាហារ គ្រឿងឧបភោគបរិភោគ ភេសជ្ជៈ ប្រេងឥន្ធនៈ ជូនដល់ទីបញ្ជាការស្រាទាំង ៩គោលដៅដើម្បីបន្តនិរន្តរភាពការងារឱ្យទទួលបានជោគជ័យ ដើម្បីបុព្វហេតុសង្គមជាតិ និងប្រជាជនកម្ពុជា៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)