AKP ប៉េកាំង ថ្ងៃទី៣០ ខែសីហា ឆ្នាំ ២០២៥– សិក្ខាកាមមន្ត្រីពីក្រសួងព័ត៌មាន ទស្សនកិច្ចតំបន់ប្រវត្តិសាស្ត្រ និងវប្បធម៌ ដ៏ល្បីល្បាញក្នុងទីក្រុងប៉េកាំង «ព្រះវិហារឋានសួគ៌» (Temple of Heaven)  គឺជាទីកន្លែង ដែលស្តេចនៃរាជវង្សម៉ង និងរាជវង្សឈឹង ថ្វាយយញ្ញបូជាដល់ ឋានសួគ៌ និងបួងសួងសុំក្តីសុខចម្រើន។

សិក្ខាកាមមន្ត្រីពីក្រសួងព័ត៌មាន នាថ្ងៃទី២៩ ខែសីហា បានធ្វើដំណើរទស្សនកិច្ចទៅព្រះវិហារឋានសួគ៌ ក្នុងទីក្រុងប៉េកាំង សាធារណៈរដ្ឋប្រជាមានិតចិន គឺជាទីកន្លែងដែលស្តេចនៃរាជវង្សម៉ង និងរាជវង្សឈឹង ថ្វាយយញ្ញបូជាដល់ ឋានសួគ៌ និងបួងសួងសុំឱ្យមានទទួលផលច្រើនល្អ មានទំហំផ្ទៃដីសរុប ២៧៣ ហិចតា។ ព្រះវិហារ ចែកចេញជា២ផ្នែកធំៗដោយជញ្ជាំង គឺអាសនៈខាងក្នុង និងអាសនៈខាងក្រៅ។ ជញ្ជាំងខាងជើង គឺជារាងរង្វង់ជានិមិត្តរូបផ្ទៃមេឃ ចំណែកជញ្ជាំងខាងត្បូងមានរាងការ៉េជានិមិត្តរូបផែនដី ហើយ រួមគ្នាតំណាងឲ្យពិភពលោក។ 

សំណង់នៃព្រះវិហារភាគច្រើនស្ថិតនៅអាសនៈខាងក្នុង ដែល ត្រូវបានបែងចែកជាពីរផ្នែកដោយជញ្ជាំង៖ ផ្នែកខាងជើងគឺអាសនៈ Qigu ដែលមានអគារកណ្តាលមួយហៅថាQiniandian (The Hall of Prayer for Good Harvests) គឺសម្រាប់ការអធិស្ឋាននិទាឃរដូវ ដើម្បីទទួលផលច្រើនល្អ។ ផ្នែកខាងត្បូងគឺអាសនៈរង្វង់មូល ហើយមានវេទិកាថ្មរាងជារង្វង់ដ៏ធំមួយ ស្ថិតនៅកណ្តាលហៅថា Yuangu (The Circular Mound Altar) ដែលប្រើសម្រាប់ថ្វាយយញ្ញបូជា ដល់ឋានសួគ៌នៅពេលអយនភាគនៃសិសិរដូវ(Winter Solstice)៕

ដោយ៖ ចរិយា