AKP ប៉េកាំង ថ្ងៃទី២៨ ខែសីហា ឆ្នាំ ២០២៨– សិក្ខាកាមមន្ត្រីពីក្រសួងព័ត៌មាន ២៥រូប ចូលរួមក្នុងវគ្គ«បណ្ដុះបណ្តាលសមត្ថភាពសារព័ត៌មានសម្រាប់កម្ពុជា» នៅសាកលវិទ្យាល័យភាសាបរទេសប៉េកាំង ដើម្បីពង្រឹងសមត្ថភាពបន្ថែមលើកិច្ចការព័ត៌មាន ក្នុងន័យឆ្លើយតប ទៅនឹងតម្រូវការ និងការផ្លាស់ប្តូរយ៉ាងឆាប់រហ័សនូវបរិបទថ្មី ទំនើបក្នុងក្របខណ្ឌជាតិ និងអន្តរជាតិ។

លើកឡើងក្នុងវគ្គ«បណ្ដុះបណ្តាលសមត្ថភាពសារព័ត៌មានសម្រាប់កម្ពុជា» ចាប់ពីថ្ងៃទី ២៨-១០ សីហានេះ នៅទីក្រុងប៉េកាំង សាធារណៈរដ្ឋប្រជាមានិតចិន នៅថ្ងៃទី២៨ ខែសីហានេះ កញ្ញា ឆន ណាវី អគ្គនាយករង នៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាននៃព្រះរាជាណាចក្រកម្ពុជា ដែលទទួលបាន ការចាត់តាំងពីឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានគូសបញ្ជាក់ថា ប្រព័ន្ធផ្សព្វផ្សាយបានដើរតួនាទីយ៉ាងសំខាន់ក្នុងការលើកកម្ពស់ការតភ្ជាប់ និងការយោគយល់គ្នារវាងប្រជាជនទៅកាន់ប្រជាជន បង្កើនការផ្លាស់ប្តូរវប្បធម៌ លើកកម្ពស់សន្តិភាព ស្ថិរភាព និងការអភិវឌ្ឍន៍ក្នុងតំបន់ និងកិច្ចសហប្រតិបត្តិការអន្តរជាតិយ៉ាងស៊ីជម្រៅក្នុងចំណោមរដ្ឋ។ យើងអាច និយាយ បានថាព័ត៌មាន ចាំបាច់ណាស់ ក្នុងការរស់នៅប្រចាំថ្ងៃរបស់ យើងរហូតចាត់ទុកថា ព័ត៌មានគឺជាចំណីអាហារប្រចាំថ្ងៃដែលមិនអាចខ្វះបាន។ យើងបានកត់សម្គាល់ឃើញថា គំរូ នៃការប្រើប្រាស់ប្រព័ន្ធផ្សព្វផ្សាយ និងព័ត៌មានរបស់សង្គមបានឆ្លងកាត់ការផ្លាស់ប្តូរយ៉ាងសំខាន់ ជាមួយនឹងភាពជឿនលឿននៃបច្ចេកវិទ្យា និងលទ្ធភាពទទួលបានព័ត៌មាននៅលើប្រព័ន្ធផ្សព្វផ្សាយតាមអ៊ីនធឺណិត និងប្រព័ន្ធផ្សព្វផ្សាយសង្គម។ 

នៅក្នុងនីតិកាលទី៧ នេះ ក្រសួងព័ត៌មាន បានដាក់ចេញនូវ ផែនការយុទ្ធសាស្ត្រអភិវឌ្ឍន៍វិស័យព័ត៌មាន  និងសោតទស្សន៍ ដើម្បីជំរុញការកសាង និងអភិវឌ្ឍធនធានមនុស្សរក្សានូវសណ្តាប់ធ្នាប់ ព័ត៌មាន បង្កើនគុណភាពមាតិកាខ្លឹមសារ  ការផលិត និងជំរុញកិច្ចសហប្រតិបត្តិការការទូតព័ត៌មាន។ ចំណុចទាំងនេះហើយ ទើបទាមទារឱ្យយើងត្រូវតែពង្រឹង សមត្ថភាព វិជ្ជាជីវៈបន្ថែម ស្របតាម ចក្ខុវិស័យរបស់ក្រសួងព័ត៌មាន គឺសន្តិសុខព័ត៌មាន ដែលផ្តោតលើកត្តា៣៖ ១) ការទទួលបានព័ត៌មានគ្រប់ជ្រុង ជ្រោយ  ២) គុណភាពព័ត៌មាន ៣) សុវត្ថិភាពព័ត៌មាន។
«ខ្ញុំសង្ឃឹមថាក្រោយ ពីបានចូលរួមវគ្គបណ្តុះបណ្តាលនេះ សិក្ខាកាមទាំងអស់ នឹងទទួលបានចំណេះដឹង និងសមត្ថភាព បន្ថែមទៀតក្នុង កិច្ចការព័ត៌មាន ដើម្បីឆ្លើយតបទៅ នឹងតម្រូវ ការ និងការផ្លាស់ប្តូរយ៉ាង ឆាប់រហ័សនូវបរិបទថ្មីទំនើប ក្នុងក្របខណ្ឌជាតិ និងអន្តរជាតិ»។

លោកស្រី Liu Moxiao ដែលជាគ្រូបង្រៀននៅមហាវិទ្យាល័យសារព័ត៌មាន និងទំនាក់ទំនងអន្តរជាតិនៃសាកលវិទ្យាល័យភាសាបរទេសប៉េកាំង បានលើកឡើងថាវគ្គបណ្តុះបណ្តាលស្ដីពី “ការកសាងសមត្ថភាពសម្រាប់សារព័ត៌មានកម្ពុជា” គឺជាឱកាសដ៏មានតម្លៃសម្រាប់ការផ្លាស់ប្តូរ និងការសិក្សា។ ក្នុងយុគសម័យនៃការពន្លឿនសកលភាវូបនីយកម្មនេះ អង្គភាពសារព័ត៌មានគឺជាបណ្តាញដ៏សំខាន់ ដែលបានដើរតួនាទីមិនអាចជំនួសបាន ក្នុងការកសាងរូបភាពជាតិ ការលើកកម្ពស់ការផ្លាស់ប្តូរវប្បធម៌ និងការជំរុញកិច្ចសហប្រតិបត្តិការអន្តរជាតិ។ 
ក្នុងអំឡងពេលវគ្គបណ្តុះបណ្តាលនេះយើងសង្ឃឹមថានឹងផ្តល់ឱ្យអ្នកធ្វើការវិស័យសារព័ត៌មានកម្ពុជានូវវេទិកាមួយដើម្បីឱ្យទទួលបានការយល់ដឹងស៊ីជម្រៅអំពីគោលគំនិតអភិវឌ្ឍន៍ និងបទពិសោធន៍ជាក់ស្តែងនៃឧស្សាហកម្មប្រព័ន្ធផ្សព្វផ្សាយសារព័ត៌មានចិន និងដើម្បីជួយមិត្តខ្មែរលើកកម្ពស់ជំនាញវិជ្ជាជីវៈ និងការកសាងសមត្ថភាពរបស់ខ្លួន ដោយហេតុនេះអាចបង្ហាញឱ្យឃើញកាន់តែច្បាស់ពីភាពទាក់ទាញ និងរចនាបទរបស់កម្ពុជាទៅកាន់ពិភពលោក និងបញ្ចូលភាពរឹងមាំថ្មីទៅក្នុងកិច្ចសហប្រតិបត្តិការ និងមិត្តភាពដែកថែបរវាងចិន និងកម្ពុជា។

លោក លិវ ជា ទីប្រឹក្សារបស់មជ្ឈមណ្ឌលអប់រំនិងបណ្តុះបណ្តាលនៃសាកលវិទ្យាល័យភាសាបរទេសប៉េកាំងនិងជានិពន្ធនាយករបស់ទីភ្នាក់ងារបោះពុម្ពផ្សាយការបង្រៀននិងការស្រាវជ្រាវភាសាបរទេស បានមានប្រសាសន៍ថា វគ្គបណ្តុះបណ្តាលនេះ ធ្វើឡើងស្របពេលនឹងខួបលើកទី៦៧ នៃការបង្កើតទំនាក់ទំនងការទូតរវាងចិន និងកម្ពុជា និង "ឆ្នាំទេសចរណ៍ចិន-កម្ពុជា"។ ចំណងមិត្តភាពរវាងចិន និងកម្ពុជា មានភាពគោរពពេលវេលា។ អរិយធម៌ចិន និងកម្ពុជាមានប្រវត្តិសាស្ត្រតែមួយ ហើយទទួលប្រជាជនហៅថា «មិត្តភាពដែកថែបចិន និងកម្ពុជា»។ ខែមេសាឆ្នាំនេះ លោកប្រធានាធិបតី Xi Jinping បានបំពេញទស្សនកិច្ចជាផ្លូវរដ្ឋនៅប្រទេសកម្ពុជា ដោយបានពង្រឹងបន្ថែមទៀតនូវចំណងមិត្តភាពយូរអង្វែងរវាងចិន និងកម្ពុជា។ ទំនាក់ទំនងរវាងប្រជាជនចិន និងកម្ពុជា ក្នុងប្រព័ន្ធផ្សព្វផ្សាយព័ត៌មាន ការផ្លាស់ប្តូរវប្បធម៌ និងការអប់រំភាសាកាន់តែជិតស្និទ្ធ។ ខណៈដែលការកសាងសមត្ថភាពប្រព័ន្ធផ្សព្វផ្សាយរបស់កម្ពុជាបន្តរីកចម្រើនអ្នកជំនាញផ្នែកសារព័ត៌មានត្រូវពង្រឹងវិជ្ជាជីវៈ និងជំនាញទំនាក់ទំនងអន្តរជាតិបន្ថែមទៀត។ យើងសង្ឃឹមថា វគ្គបណ្តុះបណ្តាលនេះនឹងផ្តល់នូវវេទិកាមួយសម្រាប់ការផ្លាស់ប្តូរ និងចែករំលែកបទពិសោធន៍ប្រព័ន្ធផ្សព្វផ្សាយ ដែលជួយមន្ត្រីកម្ពុជាដែលកំពុងទស្សននៅប្រទេសចិន ទទួលបានការយល់ដឹងកាន់តែស៊ីជម្រៅអំពីទស្សនវិជ្ជានៃការអភិវឌ្ឍន៍ និងបទពិសោធន៍ជាក់ស្តែងនៃឧស្សាហកម្មប្រព័ន្ធផ្សព្វផ្សាយចិន ពង្រឹងបន្ថែមទៀតនូវការរៀនសូត្រទៅវិញទៅមក ក្នុងវិស័យទំនាក់ទំនងព័ត៌មាន និងជំរុញការផ្លាស់ប្តូរវប្បធម៌ និងកិច្ចសហប្រតិបត្តិការជាក់ស្តែងរវាងភាគីទាំងពីរ។
«ខ្ញុំជឿថាក្នុងរយៈពេលនៃការបណ្តុះបណ្តាលសិក្ខាកាមចូលរួមនឹងទទួលបានការយល់ដឹងកាន់តែស៊ីជម្រៅអំពីវិស័យប្រព័ន្ធផ្សព្វផ្សាយព័ត៌មានរបស់ប្រទេសចិន និងការយល់ដឹងយ៉ាងជ្រាលជ្រៅចំពោះវប្បធម៌នៃទីក្រុងប៉េកាំង និងទីក្រុងGuilin និងការយល់ដឹងកាន់តែស៊ីជម្រៅអំពីសាកលវិទ្យាល័យភាសាបរទេសប៉េកាំង និងទីភ្នាក់ងារបោះពុម្ពផ្សាយការបង្រៀន និងការស្រាវជ្រាវភាសាបរទេស»។

សាកលវិទ្យាល័យភាសាបរទេសប៉េកាំង មានប្រវត្តិ84 ឆ្នាំ កំពុងបង្រៀន 101 ភាសាបរទេស។ ជំនាញភាសាខ្មែរត្រូវបានបង្កើតឡើងក្នុងឆ្នាំ 1961។ នៅចុងខែមេសាឆ្នាំនេះ លោក Jia Dezhong អនុលេខាបក្សនៃសាកលវិទ្យាល័យភាសាបរទេសប៉េកាំង បានដឹកនាំគណៈប្រតិភូមកកាន់ប្រទេសកម្ពុជា ហើយធ្វើទស្សនកិច្ចនៅរាជបណ្ឌិត្យសភាកម្ពុជា និងសាកលវិទ្យាល័យភូមិន្ទភ្នំពេញ។ គណៈប្រតិភូបានចុះហត្ថលេខាលើ "កិច្ចព្រមព្រៀងស្តីពីការផ្លាស់ប្តូរទេពកោសល្យកម្រិតខ្ពស់រវាងសាកលវិទ្យាល័យភាសាបរទេសប៉េកាំង និងសាកលវិទ្យាល័យភូមិន្ទភ្នំពេញ" ដោយធ្វើឱ្យស៊ីជម្រៅនូវកិច្ចសហប្រតិបត្តិការលើវិស័យអប់រំ និងបណ្ឌិត្យសភារវាងសាកលវិទ្យាល័យទាំងពីរ និងបញ្ចូលកម្លាំងជំរុញថ្មីទៅក្នុងទំនាក់ទំនងមិត្តភាពចិន-កម្ពុជា។

គួរបញ្ជាក់ដែរថា សិក្ខាកាមពីកម្ពុជាដែលបានចូលរួមវគ្គនេះ មានចំនួន២៥រូប ពីអគ្គនាយកដ្ឋានជំនាញ ចំណុះក្រសួងព័ត៌មានដូចជា៖ អគ្គនាយកដ្ឋាន វិទ្យុជាតិកម្ពុជា (RNK) អគ្គនាយកដ្ឋាន ទូរទស្សន៍ជាតិកម្ពុជា (TVK) អគ្គនាយកដ្ឋាន ទីភ្នាក់ ងារសារព័ត៌មាន កម្ពុជា (AKP) ដែលផ្តោតសំខាន់ លើ ការងារផ្សព្វផ្សាយ តាមរយៈប្រព័ន្ធផ្សព្វផ្សាយ បែបប្រពៃណី និងប្រព័ន្ធផ្សព្វផ្សាយ បែបថ្មីជាមួយគ្នានេះ ក៏មានអគ្គនាយកដ្ឋានព័ត៌មាន និងសោតទស្សន៍ ដែល ផ្តោតលើការរៀបចំគោលនយោបាយ លិខិតបទដ្ឋានគតិយុត្តនានា ដើម្បីគ្រប់ គ្រង ពង្រឹងវិជ្ជាជីវៈ និងសណ្តាប់ធ្នាប់ សារព័ត៌មានរួម នឹងអគ្គនាយកដ្ឋានរដ្ឋបាល និង ហិរញ្ញវត្ថុ ដែលមានមុខងារគាំទ្រ លើ ដំណើរការការងាររបស់ក្រសួង និង អង្គភាពចំណុះទាំងអស់៕

ដោយ៖ ចរិយា