AKP សៀមរាប ថ្ងៃទី២៦ ខែសីហា ឆ្នាំ២០២៥-- ព្រះមន្ត្រីសង្ឃ ព្រះសង្ឃ និងពុទ្ធបរិស័ទក្រុងបាត់ដំបង ដឹកនាំដោយព្រះពុទ្ធរស្មី យឿម រដ្ឋសភា ព្រះរាជាគណៈកិត្តិយស ព្រះអនុគណក្រុងបាត់ដំបង ព្រះយសបញ្ញា បណ្ឌិត វី សុវិជ្ជា ព្រះប្រធានសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង  នៅរសៀលថ្ងៃទី២៦ ខែសីហា ឆ្នាំ២០២៥ បាននាំយក វិទ្យុទាក់ទង ស្បៀងអាហារ និងសម្ភារប្រើប្រាស់ប្រចាំថ្ងៃ ដែលជាជំនួយឧបត្ថម្ភពីព្រះចៅអធិការទាំង២៨វត្តនៃក្រុងបាត់ដំបង ព្រះសង្ឃ និងពុទ្ធបរិស័ទវត្តខ្មែរបាលិលេយ្យ សហរដ្ឋអាមេរិក សប្បុរសជនខ្មែរក្នុងប្រទេស យកទៅផ្តល់ជូនកងទ័ពជួរមុខតាមខ្សែបន្ទាត់ព្រំដែនស្ថិតតំបន់តាថាវ បុស្សស្បូវ អានសេះ ភ្នំខ្មោច និងតំបន់មុំបី ស្ថិតនៅស្រុកជាំក្សាន្ត ខេត្តព្រះវិហារ ដោយពិធីនេះបានធ្វើឡើងនៅវត្តទួលអណ្តែត។ 

ព្រះពុទ្ធរស្មី យឿម រដ្ឋសភា បានមានសង្ឃដីកាថា ក្នុងស្មារតីខ្មែររួបរួមសាមគ្គីគ្នា លើកទឹកចិត្តដល់បងប្អូនកងទ័ពដែលកំពុងឈរជើងតាមបន្ទាត់ព្រំដែន ដែលបានលះបង់គ្រប់យ៉ាង ដើម្បីការពារបូរណភាពទឹកដីពីការឈ្លានពានពីប្រទេសថៃ ព្រះសង្ឃ សប្បុរសជនទាំងក្នុងប្រទេស និងក្រៅប្រទេស មានទឹកចិត្ត ទឹកព្រះទ័យ ចូលរួមលើកទឹកចិត្តដល់កងទ័ព ដោយបានជួយឧបត្ថម្ភ ជា វិទ្យុទាក់ទង ស្បៀងអាហារ សម្ភារៈប្រើប្រាស់ប្រចាំថ្ងៃជាច្រើនមុខ និងឧបត្ថម្ភថវិកាតាមទិសដៅនីមួយៗ បេីគតិជាទឹកប្រាក់ ប្រមាណ៦០លានរៀល។ 

ការផ្តល់ជូននូវសម្ភារទាំងនេះមិនមែនថា រាជរដ្ឋាភិបាលខ្វះខាតនោះទេ តែជាការចូលរួមជួយឧបត្ថម្ភបន្ថែមទៀត។ ព្រះអង្គបានបន្ថែមថា យើងពិតជាមានមោទកភាពចំពោះវីរកងទ័ព ពោរពេញដោយឆន្ទៈ មនសិការ ស្មារតីក្លាហាន និងសេចក្តីស្មោះត្រង់ចំពោះជាតិ ដែលពួកគាត់បានសុខចិត្តយកទ្រូងពាំងគ្រាប់រំសេវ និងអាវុធគ្រប់ប្រភេទ ប្តូរយកសុខសន្តិភាពជូនប្រជាជនកម្ពុជាទាំងមូល ដែលយើងអាចសម្រានលក់ ហូបឆ្ងាញ់ ប្រកបដោយស្នាមញញឹម និងភាពកក់ក្តៅជាមួយក្រុមគ្រួសារ៕

ដោយ ឃុត សៅ