AKP ភ្នំពេញ ថ្ងៃទី២៦ ខែសីហា ឆ្នាំ២០២៥-- ឯកឧត្តម សរ គឹមសាន្ត ដឹកនាំប្រជុំអគ្គលេខាធិការអាជ្ញាធរទន្លេសាប នាថ្ងៃទី២៦ ខែសីហា ឆ្នាំ២០២៥ បានដឹកនាំក្រុមការងារមន្រ្តីបច្ចេកទេសអាជ្ញាធរទន្លេសាប ដើម្បីចូលរួមកិច្ចប្រជុំពិគ្រោះយោបល់លើរបាយការណ៍ស្តីពីការពិនិត្យ ផ្ទៀងផ្ទាត់ ធ្វើបច្ចុប្បន្នភាព និងចងក្រងទិន្នន័យដីធ្លីនៃតំបន់បឹងទន្លេសាប ក្នុងភូមិសាស្រ្តខេត្តបាត់ដំបង។

ការរៀបចំចងក្រងប្រពន្ធ័ទិន្នន័យនៅតំបន់ជុំវិញបឹងទន្លេសាប ដើម្បីឈានទៅរៀបចំផែនការគ្រប់គ្រង អភិរក្ស និងអភិវឌ្ឍធនធានធម្មជាតិ រមណីយដ្ឋានទេសចរណ៍ វារីវប្បកម្ម កសិកម្ម កសិឧស្សាហកម្ម សំដៅពង្រឹងសេដ្ឋកិច្ចជាតិតាមរយ:ការកាត់បន្ថយភាពក្រីក្ររបស់ប្រជាពលរដ្ឋ លើកកម្ពស់ជីវភាពគ្រួសារស្របតាមគោលនយោបាយរបស់រាជរដ្ឋាភិបាល ឆ្នាំ២០៣០-២០៥០។

កិច្ចប្រជុំពិគ្រោះយោបល់ខាងលើនេះ មានការអញ្ជើញចូលរួមជាអធិបតីពីសំណាក់ឯកឧត្តម សូ ខនឬទ្ធីគុណ រដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់ និងជាប្រធានក្រុមការងារប្រតិបត្តិខេត្តបាត់ដំបង ឯកឧត្តម យិន ងួនកូលេនីន អនុរដ្ឋលេខាធិការតំណាងក្រសួងធនធានទឹក និងឧតុនិយម និងតំណាងអន្តរក្រសួង-ស្ថាប័នជំនាញទាំងកម្រិតថ្នាក់ជាតិ-ថ្នាក់ខេត្ត និងថ្នាក់មូលដ្ឋានពាក់ព័ន្ធ សរុបមានចំនួនប្រមាណ៥០រូបនៅសណ្ឋាគារប្រេស៊ីដង់ ខេត្តបាត់ដំបង៕

ដោយ ណយ នឿន (ប្រភព៖ អាជ្ញាធរទន្លេសាប)