AKP សៀមរាប ថ្ងៃទី២៦ ខែសីហា ឆ្នាំ២០២៥--ថ្លែងនៅក្នុងពិធីបើកវគ្គបណ្តុះបណ្តាលស្តីពី "ការទទួលបដិសណ្ឋារកិច្ចទេសចរមូស្លីម និងស្តង់ដាមូស្លីមហ្វ្រែនលី        កម្ពជា" ជូនដល់មូលដ្ឋានអាជីវកម្ម និងភាគីពាក់ព័ន្ធនានាក្នុងវិស័យទេសចរណ៍ ដែលប្រារព្ធធ្វើក្នុងខេត្តសៀមរាបនាថ្ងៃទី២៦ ខែសីហា ឆ្នាំ២០២៥នេះ  ឯកឧត្តម កាទើ មហាំម៉ាត់ណោសស្រ៊ី រដ្ឋលេខាធិការ រដ្ឋមន្ត្រីក្រសួងទេសចរណ៍ បានថ្លែងថា ទេសចរណ៍មូស្លីមគឺជាទីផ្សារអាទិភាពមួយក្នុងការរួមចំណែកជំរុញដល់កំណើនទេសចរអន្តរជាតិមកទស្សនាកម្ពុជា។

យោងតាមស្ថិតិ ប្រជាជនមូស្លីមទូទាំងសកលលោកមានចំនួន ប្រមាណជិត ២ពាន់លាននាក់ ស្មើនឹងប្រមាណ ២៥% នៃចំនួនប្រជាជនសរុបក្នុងសកលលោក។

ឯកឧត្តម កាទើ មហាំម៉ាត់ណោសស្រ៊ី បន្តថាកត្តាទាំងនេះ បានបង្ហាញឱ្យឃើញពីកាលានុវត្តភាពកាន់តែប្រសើរឡើងសម្រាប់កម្ពុជាក្នុងការច្បាមយកឱកាស និងធ្វើពិពិធកម្មទីផ្សារទេសចរណ៍ដើម្បីពង្រឹងនិងពង្រីកសក្តានុពលវិស័យទេសចរណ៍កម្ពុជាឱ្យកាន់តែទូលំទូលាយ និងរីកចម្រើនប្រកបដោយចីរភាព បរិយាបន្ន និងភាពធន់ តាមរយៈការចាប់យកទីផ្សារទេសចរណ៍មូស្លីម មកបំពេញបន្ថែមទីផ្សារអន្តរជាតិដែលមានស្រាប់។ ក្នុងន័យនេះ បន្ទាប់ពីការដាក់ចេញផែនការអភិវឌ្ឈន៍ទេសចរណ៍មូស្លីម (២០២៣-២០២៧) ដែលជាត្រីវិស័យដ៏សំខាន់ក្នុងការទាក់ទាញទេសចរណ៍ ស្តង់ដាមូស្លីមហ្រ្វែនលីកម្ពុជា គឺជាយន្តតូបករណ៍មួយដ៏សំខាន់ដែលបង្ហាញឱ្យឃើញពីការត្រៀមខ្លួនរបស់កម្ពុជាក្នុងការរៀបចំគោលដៅទេសចរណ៍មូស្លីម មូលដ្ឋានអាជីវកម្មទេសចរណ៍មូស្លីម និងការទទួលបដិសណ្ឋារកិច្ចយ៉ាងកក់ក្តៅជូនទេសចរមូស្លីម។

ឯកឧត្តម ក៍បានស្នើឱ្យសមាគមទេសចរណ៍ និងប្រតិបត្តិករក្នុងឧស្សាហកម្មទេសចរណ៍ មូលដ្ឋានអាជីវកម្មទេសចរណ៍ទាំងអស់សូមបន្តពង្រឹងគុណភាពសេវាកម្មរបស់ខ្លួនឱ្យមានគុណភាពកាន់តែល្អប្រសើរឡើងជាលំដាប់ ជាមួយការរក្សាបាននូវថ្លៃសមរម្យ និងពិនិត្យលទ្ធភាពបញ្ចូលសម្បទាគ្រប់គ្រាន់ក្នុងការទទួលទេសចរណ៍មូស្លីម ដែលជាតម្លៃបន្ថែមនៃការផ្តល់សេវាកម្មរបស់ខ្លួន និងសូមស្នើដល់មូលដ្ឋានអាជីវកម្មទេសចរណ៍ទាំងអស់ សូមចូលរួមគាំទ្រ និងផ្សព្វផ្សាយ យុទ្ធនាការទស្សនាកម្ពុជានៅរដូវកាលបៃតង តាមរយៈគាំទ្រដល់ដំណើរទស្សនកិច្ចសិក្សារបស់សិស្ស-និស្សិត នៅតាមបណ្តាគ្រឹះស្ថានសិក្សានានាផងដែរ៕

ដោយ៖ ឃុត សៅ