AKP សៀមរាប ថ្ងៃទី២៦ ខែសីហា ឆ្នាំ២០២៦--
ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានមានប្រសាសន៍ថា ស្ថិតក្នុងបរិយាកាសដែលបច្ចេកវិទ្យាឌីជីថលកំពុងបោះជំហានយ៉ាងលឿនឥតឈប់ឈរ និងគ្របដណ្តប់ស្ទើរគ្រប់ទិដ្ខភាពនៃជីវិតរស់នៅ កម្ពុជាក៏ដូចជាពិភពលោកបានមើលឃើញយ៉ាងច្បាស់ពីសក្តានុពលនៃបច្ចេកវិទ្យា ដែលកាន់តែដើរតួនាទីចាំបាច់នៅក្នុងការពង្រឹង
ភាពក្នុងការអភិវឌ្ឍសង្គមសេដ្ឋកិច្ច ។

ឯកឧត្តម ហ៊ុន ម៉ានី មានប្រសាសន៍បែបនេះនៅក្នុងឱកាសដែលឯកឧត្តមអញ្ជើញជាអធិបតីដ៏ខ្ពង់ខ្ពស់ក្នុងពិធីបើកសិក្ខាសាលា ស្ដីពីឌីជីថលលូបនីយកម្មក្នុងរដ្ឋបាលសាធារណៈ (Workshop on Digitalization in Public Administration) សម្រាប់ប្រទេសសមាជិកអាស៊ាន និងប្រទេសទីម័រឡេស្តេ នាព្រឹកថ្ងៃទី២៦ ខែសីហា ឆ្នាំ២០២៥ នៅខេត្តសៀមរាប។

ឯកឧត្តម មានប្រសាសន៍ថា ក្នុងបរិបទប្រែប្រួលយ៉ាងឆាប់រហ័ស និងពិបាកព្យាករណ៍នៃបរិស្ថានសង្គមសេដ្ឋកិច្ចនៃសន្តិសុខសាកល ដែលបច្ចុប្បន្នកំពុងបន្តរងឥទ្ធពល ភាពតានតឹងនៃភូមិសាស្ត្រនយោបាយ និងការធ្លាក់ចុះសេដ្ឋកិច្ចសាកល និងការបន្តមានជម្លោះនៅតាមតំបន់មួយចំនួនជាបន្តបន្ទាប់ បានគំរាមកំហែង ដល់សុខសន្តិភាពសេ្ថរភាពនិងវិបុលភាពរបស់ប្រជាជនទូទាំងពិភពលោក។

ឯកឧត្តមបន្តថា នៅក្នុងបរិបទដ៏ស្មុគ្រស្មាញនេះ កម្ពុជា ក៏ដូចជាប្រទេសក្នុងតំបន់ បានមើលឃើញច្បាស់ពីភាពចាំបាច់នៃការពង្រឹងសមត្ថភាពសេវាសាធារណៈ និងរួមគ្នាដោះស្រាយបញ្ហាប្រឈមក្នុងប្រទេសរៀងៗខ្លួនផង ក្នុងតំបន់ផង និងសាកលលោកផងដែរ។ ជាក់ស្តែងសិក្ខាសាលាដែលបានរៀបចំឡើងនាពេលនេះ កំពុងផ្តោតលើការពង្រឹងកិច្ចសហប្រតិបត្តិការ និងចែករំលែកបទពិសោធន៍ទៅវិញទៅមកពីឧត្តមានុវត្ត និងនវានុវត្តន៍នៃការធ្វើឌីជីថលូបនីយកម្មក្នុងរដ្ឋបាលសាធារណៈ៕
ដោយ៖ ឃុត សៅ