AKP ភ្នំពេញ ថ្ងៃទី ២៦ ខែ សីហា ឆ្នាំ ២០២៦ -- ក្រុមអ្នកសង្កេតការណ៍អន្តរកាល (IOT)ចំនួន៥ ប្រទេសរួមមានដូចជា ម៉ាឡេស៊ី ឥណ្ឌូណេស៊ី ឡាវ ហ្វីលីពីន និងវៀតណាម ដឹកនាំដោយ លោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ី ប្រចាំកម្ពុជាដែលចេញដំណើរពីរាជធានីភ្នំពេញនៅព្រឹកថ្ងៃទី២៦ ខែសីហា ឆ្នាំ២០២៥នេះ បានធ្វើដំណើរទៅដល់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដើម្បីចុះពិនិត្យ និងសង្កេតការណ៍ទីកន្លែងដែលទាហានថៃ បានចូលរាយបន្លាលួសយកផ្ទះ និងដីធ្លីរបស់ប្រជាពលរដ្ឋកម្ពុជា។
ក្រុមអ្នកសង្កេតការណ៍អន្តរកាល (IOT) ដឹកនាំដោយ លោក វរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ី ប្រចាំកម្ពុជា បានចុះទីតាំងជាក់ស្តែងដើម្បីសង្កេត ផ្ទៀងផ្ទាត់ និងរាយការណ៍អំពីស្ថានភាពព្រំដែន ត្រង់ចំណុចបណ្តោយព្រំដែនលេខ៤៧ នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នេះបើយោងតាមសេចក្ដីប្រកាសព័ត៌មានរបស់ក្រសួងការពារជាតិចេញផ្សាយនារសៀលថ្ងៃទី២៦ ខែសីហា ឆ្នាំ២០២៥។

គួរបញ្ជាក់ផងដែរថា ការចុះត្រួតពិនិត្យពីសំណាក់ ក្រុមអ្នកសង្កេតការណ៍អន្តរកាលទាំង ៥ ប្រទេស ដោយផ្ទាល់នេះ បានធ្វើឡើងបន្ទាប់ពីកងទ័ពថៃបានឈ្លានពានយ៉ាងងងើល ដោយលើកគ្នីគ្នាមករាយបន្លាលួសដើម្បីព័ទ្ធយកផ្ទះសម្បែង និងដីធ្លី របស់ប្រជាពលរដ្ឋក្នុងខេត្តបន្ទាយមានជ័យ កាលពីថ្ងៃទី២៥ ខែសីហា ឆ្នាំ២០២៥។

ថ្លែងនៅក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ»នៅថ្ងៃទី២៦ ខែសីហា ឆ្នាំ២០២៥ លោជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជាឱ្យដឹងថា កាលពីថ្ងៃទី២៥ ខែសីហា ឆ្នាំ២០២៥ ចាប់ពីម៉ោង ១៤:២០ នាទី រសៀលនេះ កងកម្លាំងយោធារបស់ថៃបានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែក៏ត្រូវបានប្រជាពលរដ្ឋ និងសមត្ថកិច្ចនៅភូមិជោគជ័យ ធ្វើការទប់ស្កាត់យ៉ាងខ្លាំង ទើបកងកម្លាំងរបស់ថៃយកបន្លាលួសនោះត្រឡប់ទៅវិញ។ លោកជំទាវឧត្ដមសេនីយ៍ឯកបានបញ្ជាក់ទៀតថា បន្ទាប់មក នៅវេលាម៉ោង១៥៖១៤រសៀលថ្ងៃដដែលនេះដែរ កងកម្លាំងថៃ បានធ្វើសកម្មភាពជាថ្មីបំរុងនឹងយកបន្លាសលួសមករាយម្តងទៀត ហើយក៏ត្រូវបានប្រជាពលរដ្ឋដែលជាម្ចាស់ដី និងប្រជាពលរដ្ឋផ្សេងៗទៀតធ្វើការទប់ស្កាត់យ៉ាងខ្លាំងក្លា រហូតដល់កងកម្លាំងរបស់ថៃយកបន្លាលួសរបស់ខ្លួនត្រឡប់ចូលទៅវិញ។

លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិបានលើកឡើងផងដែរថា ចាប់តាំងតែពីយប់ថ្ងៃទី២៥ ខែសីហា ឆ្នាំ ២០២៥ រហូតដល់ព្រឹកថ្ងៃទី ២៦ ខែសីហា ឆ្នាំ ២០២៥ បងប្អូនប្រជាពលរដ្ឋដែលជាម្ចាស់ដី និងប្រជាពលរដ្ឋផ្សេងៗទៀតបានរួមសាមគ្គីគ្នា ធ្វើការឆ្លើយតបគឺផ្តើមចេញពីការព្រួយបារម្ភចំពោះមុខ និងការរាយបន្លាលួស របស់កងទ័ពថៃ ហើយក៏ក្នុងគោលដៅការពារនូវអ្វីដែលពួកគាត់ចាត់ទុកថាជាទ្រព្យសម្បត្តិស្របច្បាប់របស់ពួកគាត់តែប៉ុណ្ណោះ ដែលកើតចេញពីការស្រឡាញ់ទឹកដី និងការពារទ្រព្យសម្បត្តិផ្ទាល់ខ្លួនស្របច្បាប់របស់ពួកគាត់។ លោជំទាវ ឧត្តមសេនីយ៍ឯក ម៉ាលី សុជាតា បានថ្លែងសង្កត់ធ្ងន់ថា៖ «នៅក្នុងការកើតហេតុការណ៍នេះកងកម្លាំង និងអាជ្ញាធរមានសមត្ថកិច្ចចម្រុះរបស់កម្ពុជាយើង ដែលមិនប្រដាប់ដោយអាវុធ ហើយដែលយើងឈរជើងប្រចាំតំបន់នោះក៏មានវត្តមាននៅកន្លែងនោះផងដែរ ដើម្បីការពារសុវត្តិភាពជូនដល់បងប្អូនប្រជាពលរដ្ឋ ដែលបានបំពេញប្រកបដោយវិជ្ជាជីវៈ ការទទួលខុសត្រូវខ្ពស់។ ម្យ៉ាងវិញទៀតកងកម្លាំងរបស់យើង បានអនុវត្តន៍យ៉ាងម៉ឺងម៉ាត់នូវលក្ខខណ្ឌបទឈប់បាញ់ដូចដែលបានឯកភាពគ្នានៅក្នុងកិច្ចប្រជុំកន្លងមករវាងកម្ពុជា និងថៃ។

ជាមួយគ្នានេះដែរ លោកជំទាវឧត្ដមសេនីយ៍ឯកអ្នកនាំពាក្យក្រសួងការពារជាតិក៏បានបន្ថែមថា កម្ពុជាស្នើឱ្យភាគីថៃគោរពឱ្យបានពេញលេញ និងខ្ជាប់ខ្ជួននូវបទឈប់បាញ់ និងជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី៥របស់កម្ពុជា និងកងទ័ពភូមិភាគទី១របស់ថៃ ដែលបានប្រព្រឹត្តឡើងកាលពីថ្ងៃទី២២ ខែសីហា ឆ្នាំ២០២៥ កន្លងទៅថ្មីៗនេះ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និងចៀសវាងទង្វើដែលនាំទៅដល់ការកើនឡើងនៃភាពតានតឹង៕

ដោយ៖ មករា