AKP ភ្នំពេញ ថ្ងៃទី២៦ ខែសីហា ឆ្នាំ២០២៥-- ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានដឹកនាំមន្ត្រីអង្គភាពគ្រប់គ្រង និងអនុវត្តគម្រោង ទីប្រឹក្សាជាតិ និងអន្តរជាតិ និងគណៈប្រតិភូក្រុមបេសកកម្មធនាគារវិនិយោគហេដ្ឋារចនាសម្ព័ន្ធ (AIIB) ដឹកនាំដោយលោក David Ginting ប្រធានក្រុមបេសកកម្ម ដើម្បីចុះត្រួតពិនិត្យស្វែងយល់លើប្រព័ន្ធទំនើបកម្មនៃប្រព័ន្ធធារាសាស្ត្រគ្រប់ជ្រុងជ្រោយស្ទឹងជីនិត ស្ថិតក្នុងភូមិសាស្ត្រស្រុកសន្ទុក ស្រុកបារាយណ៍ និងស្រុកតាំងគោក ខេត្តកំពង់ធំ នារសៀលថ្ងៃចន្ទ ទី២៥ ខែសីហា ឆ្នាំ២០២៥។

ឯកឧត្តមបានមានប្រសាសន៍ជម្រាបជូនប្រតិភូក្រុមបេសកកម្មធនាគារវិនិយោគហេដ្ឋារចនាសម្ព័ន្ធអាស៊ី (AIIB) អំពីហេដ្ឋារចនាសម្ព័ន្ធធារាសាស្ត្រទំនើបនិងគ្រប់ជ្រុងជ្រោយស្ទឹងជីនិត ដែលមានអាងទឹក ប្រឡាយមេ ប្រឡាយរង និងប្រឡាយបង្ហូរចូលស្រែកសិករ។

ទន្ទឹមនឹងនេះ ឯកឧត្តមបានបញ្ជាក់ថា ប្រព័ន្ធនេះមានលទ្ធភាពស្រោចស្រពលើផ្ទៃដីកសិកម្មប្រមាណ ១៦០០០ហិកតា ក្នុងស្រុកចំនួន៣នៃខេត្តកំពង់ធំ ខួបប្រាំង និងខួបវស្សា។ ម៉្យាងវិញទៀត ប្រព័ន្ធធារាសាស្ដ្រនេះក៏បានក្លាយទៅជាតំបន់អេកូទេសចរណ៍ដ៏ទាក់ទាញសម្រាប់បងប្អូនប្រជាពលរដ្ឋរស់នៅក្នុងតំបន់ផងដែរ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)