AKP ភ្នំពេញ  ថ្ងៃ២៣  ខែសីហា  ឆ្នាំ២០២៥---

ឯកឧត្តម សៀក ឡេង អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជួបសំណេះសំណាល និងនាំយកអំណោយជាស្បៀងជូនដល់កងទ័ពជួរមុខដែលកំពុងឈរជើងការពារបូរណភាពទឹកដីតាមបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តឧត្តរមានជ័យ ។ 

ថ្លែងក្នុងពិធីប្រគល់អំណោយកាលពីថ្ងៃទី២២ ខែសីហា ឆ្នាំ២០២៥ឯកឧត្តមអនុរដ្ឋលេខាធិការ បាននាំយកនូវប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តមរដ្ឋមន្ត្រី ឌិត ទីណា ដែលជានិច្ចជាកាលលោកតែងតែគិតគូរ និងយកចិត្តទុកដាក់ជាខ្លាំង ពិសេសលើការឧបត្ថម្ភគាំទ្រ និងផ្គត់ផ្គង់ស្បៀងជូនដល់កងទ័ពយើងដែលកំពុងឈរជើងនៅសមរភូមិជួរមុខ។  

បន្ថែមពីលើនេះ  ក្រសួងកសិកម្ម រុក្ខាប្រមាញ់ និងនេសាទ    ក៏បាននិងកំពុងសកម្មក្នុងការផលិត និងផ្គត់ផ្គង់ជាប្រចាំនូវស្បៀងជាបន្លែ ត្រី សាច់ និងស៊ុត ជូនដល់កងទ័ពជួរមុខតាមព្រំដែនកម្ពុជា-ថៃ ក្នុងភូមិសាស្ត្រខេត្តឧត្តរមានជ័យ  , ខេត្តបន្ទាយមានជ័យ និងខេត្តព្រះវិហារផងដែរ។ 
ឯកឧត្តមបញ្ជាក់ថា  ៖ សកម្មភាពនេះសរបញ្ជាក់ពីការចូលរួមគាំទ្រយ៉ាងពេញទំហឹង និងស្មារតីទទួលខុសត្រូវខ្ពស់របស់ក្រសួងកសិកម្មចំពោះរាជរដ្ឋាភិបាលក្នុងពេលដែលប្រទេសជាតិកំពុងជួបបញ្ហា៕

ដោយ៖ ពេជ្រ សំអឿន (ប្រភព៖ក្រសួងកសិកម្ម រុក្ខាប្រមាញ់ និងនេសាទ)