AKPកំពង់ធំ ថ្ងៃទី ២៣ ខែសីហា ឆ្នាំ២០២៥--

លោកស្រី អ៉ឹម សុខវីន អនុប្រធានអនុសាខាកាកបាទក្រហមស្រុកតាំងគោកនិងសហការីរួមជាមួយព្រះសង្ឃនិងអាជ្ញាធរមូលដ្ឋានកាលពីរសៀលថ្ងៃទី២២ខែសីហាឆ្នាំ២០២៥បានចុះសួរសុខទុក្ខ និងនាំយកអំណោយមនុស្សធម៌ឧបត្ថម្ភជូនគ្រួសាររងគ្រោះដោយភ្លើងឆេះផ្ទះអស់ទាំងស្រុងស្ថិតនៅភូមិប៉ប្រក ឃុំស្វាយភ្លើង ស្រុកតាំងគោក ខេត្តកំពង់ធំ។

លោកស្រី អ៉ឹម សុខវីន បានបញ្ជាក់ថាម្ចាស់ផ្ទះឈ្មោះ ប៉េង សុខឃាង ភេទប្រុសអាយុ២៩ឆ្នាំ ប្រពន្ធឈ្មោះ ស្ងួន សុគុណ អាយុ២៩ឆ្នាំ សមាជិកគ្រួសារ៥នាក់ទៀត÷១.ឈ្មោះ ប៉ាត កេក ភេទស្រីអាយុ៦៨ឆ្នាំចាស់ជរា។២.ឈ្មោះខន សុធារ៉ា ភេទប្រុសអាយុ០៦ឆ្នាំ។៣.ឈ្មោះខន សុធារ៉ា ភេទប្រុសអាយុ០៤ឆ្នាំ។៤.ឈ្មោះ ខន ណារី ភេទ ស្រីអាយុ០២ឆ្នាំនិង៥.ឈ្មោះ សុខ លែនបញ្ញា ភេទស្រីអាយុ០៧ឆ្នាំ។ 

ផ្ទះមានទំហំ៦ម៉ែត្រគុណ៨ម៉ែត្រ ដំបូលកាចជា២ខ្នងប្រក់ក្បឿង ជញ្ជាំងស័ង្កសី រនាបឈើ ត្រូវភ្លើងឆេះអស់ទាំងស្រុងបណ្ដាលមកពីការឆ្លងចរន្តអគ្គិសនីនិងសម្ភារៈប្រើប្រាស់មួយចំនួនទៀតរួមមានគ្រែចំនួន៣ ទូសង្ហារឹមចំនួន២និងសម្ភារៈប្រើប្រាស់មួយចំនួនធំទៀត។

លោកស្រី អ៉ឹម សុខវីនបានលើកឡើងថាដោយមានការយកចិត្តទុកដាក់ពីសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែនប្រធានកាកបាទក្រហមកម្ពុជា និងឯកឧត្តម នួន ផារ័ត្ន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ សម្ដេចនិងឯកឧត្តមតែងតែយកចិត្តទុកដាក់ដល់គ្រួសារដែលងាយរងគ្រោះដើម្បីឱ្យគាត់ទទួលបាននូវគ្រឿងឧបភោគបរិភោគ ក្នុងការដោះស្រាយជីវភាពបានមួយកំរិត។ ជាក់ស្ដែងដោយសារបាតុភូតធម្មជាតិកើតឡើងជាបន្តបន្ទាប់ បានធ្វើឱ្យរាំងស្ទះក្នុងការបង្កបង្កើនផលប្រជាពលរដ្ឋមួយចំនួន ពិសេសគឺបញ្ហាភ្លើងឆេះផ្ទះ ខ្យល់កន្ត្រាក់ ទឹកជំនន់ គ្រោះរាំងស្ងួត ដែលកើតឡើងជាយថាហេតុ តាមពាក្យស្លោក"ទីណាមានទុក្ខលំបាក ទីនោះមានកាកបាទក្រហមកម្ពុជាចុះជួយដល់មូលដ្ឋាន"។

សូមបញ្ជាក់ថា គ្រួសារដែលរងគ្រោះដោយអគ្គីភ័យលេបត្របាក់ផ្ទះ១ខ្នងអស់ទាំងស្រុងបានទទួលអំណោយពីអនុសាខាកាកបាទក្រហមស្រុកតាំងគោករួមមាន÷ អង្ករ៥០គីឡូក្រាម មី១កេស ទឹកសុទ្ធ២កេស តង់១ ទឹកត្រី ទឹកស៉ីអ៉ីវ៤យួរ ត្រីខ១យួរ  ឃីត១កញ្ចប់ធំ និងថវិកា២០ម៉ឺនរៀល។អំណោយរបស់ព្រះចៅអធិការវត្តវត្តសរសីរួមមាន÷អង្ករ១០០គីឡូក្រាម មី៣កេស ទឹកក្រូច២កេស ទឹកត្រី ទឹកស៉ីអ៉ីវ៤យួរ ត្រីខ៣យួរ សៀង ០៥គីឡូក្រាម ប្រេងឆា០២លីត្រ គ្រឿងទេស០១កញ្ចប់ និងថវិកា២០ម៉ឺនរៀល។រដ្ឋបាលឃុំស្វាយភ្លើងរួមមាន÷សៀវភៅសរសេរ១០ក្បាល កាតាប៣ និងថវិកា ១០ម៉ឺនរៀល។ប្រជាពលរដ្ឋភូមិប៉ប្រកឧបត្ថម្ភថវិកា ២០ម៉ឺនរៀលនិងព្រះចៅអធិការវត្តស្វាយភ្លើងឧបត្ថម្ភថវិកាចំនួន១០ម៉ឺនរៀលផងដែរ៕

ដោយ៖ ស៊ុម វណ្ណា