AKP ព្រះសីហនុ ថ្ងៃទី២១ ខែសីហា ឆ្នាំ២០២៥-- លោក សែជូ សិទ្ធិជោតិ លេខាធិការគណៈកម្មាធិការសាខា និងជាអនុប្រធានមន្ទីរសុខាភិបាលខេត្តព្រះសីហនុ ដោយមានការចូលរួមពីមន្ត្រីសុខាភិបាលខេត្ត មន្ត្រីប្រតិបត្តិសាខា អនុសាខាក្រុងកំពង់សោម នាថ្ងៃព្រហស្បតិ៍ទី២១ ខែសីហា ឆ្នាំ២០២៥ បាននាំយកអំណោយមនុស្សធម៌ចែកជូនដល់គ្រួសារស្ត្រីទើបសម្រាលកូន និងកំពុងរង់ចាំសម្រាលដែលមានជីវភាពខ្វះខាតចំនួន ១៥គ្រួសារ ក្នុងនោះមណ្ឌលសុខភាពអូរឧកញ៉ាហេង១០គ្រួសារ និងមណ្ឌលសុខភាពអូរជ្រៅ៥គ្រួសារ ស្ថិតនៅក្រុងកំពង់សោម ខេត្តព្រះសីហនុ ដើម្បីគាំទ្រដល់សកម្មភាពការងារឥស្សរជនឆ្នើមថ្នាក់ជាតិ ដែលមានសម្តេច កិតិ្តព្រឹទ្ធិបណ្ឌិត ប៊ុន រ៉ានី ហ៊ុនសែន ជាប្រធាន ក្រុមការងារឥស្សរៈជនឆ្នើមថ្នាក់ជាតិ និងឯកឧត្តម ម៉ាង ស៊ីណេត ជាប្រធានសាខាកាកបាទក្រហមកម្ពុជាខេត្តព្រះសីហនុ។

ក្នុងឱកាសនោះ លោក សែជូ សិទ្ធិជោតិ បានពាំនាំប្រសាសន៍ផ្តាំផ្ញើសួរសុខទុក្ខ និងសេចក្តីនឹករលឹកពីឯកឧត្តម ម៉ាង ស៊ីណេត ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំងបានធ្វើការណែនាំដល់ស្ត្រីមានផ្ទៃពោះទាំងអស់ត្រូវទៅពិនិត្យសុខភាពឪ្យបានទៀងទាត់តាមការណត្តិរបស់ក្រុមគ្រូពេទ្យ ឬយ៉ាងតិចឱ្យបាន៤ដងមុនពេលសម្រាលតាមពេលវេលាកំណត់ ដើម្បីទទួលបានការពិនិត្យថែទាំសុខភាព និងទទួលបានវ៉ាក់សាំងបង្ការជំងឺ និងការធ្វើតេស្តដោយស្ម័គ្រចិត្តរកមេរោគដើម្បីលុបបំបាត់ការចម្លងមេរោគអេដស៍ និងស្វាយពីម្តាយទៅកូន ទន្ទឹមនោះត្រូវទៅសម្រាលកូននៅមណ្ឌលសុខភាព ឬមន្ទីរពេទ្យដែលមានគ្រូពេទ្យទទួលបានការបណ្តុះបណ្តាល និងមានជំនាញវិជ្ជាជីវត្រឹមត្រូវ ចំណែកស្ត្រីមានកូនតូចគួរតែបំបៅកូនដោយទឹកដោះ ដើម្បីឱ្យកូនរបស់យើងមានសុខភាពល្អ មិនងាយឈឺនឹងទទួលបានភាពកក់ក្តៅពីម្តាយ និងទារកមានអាយុ៦ខែឡើង ត្រូវធ្វើរបបអាហារដូចជា បបរគ្រប់គ្រឿងដើម្បីឱ្យទារកមានសុខភាពល្អ និងសូមទៅទទួលវ៉ាក់សាំងបង្ការជំងឺទាំង១១មុខ តាមការណែនាំរបស់គ្រូពេទ្យ។

សូមជម្រាបជូនថា អំណោយដែលផ្តល់ជូនស្រីកំពង់សម្រាល និងរង់ចាំសម្រាលទាំង១៥នាក់ ក្នុងមួយនាក់ទទួលបាន អង្ករ២៥គីឡូក្រាម ត្រីខ១យួរ មី១កេស ទឹកត្រី១យួរ កន្ទេល១ ឃីតទារក១ ឃីតមនុស្សចាស់១ (មុង១ ភួយ១ ក្រមា១ សារុង១) និងថវិកាចំនួន ៥ម៉ឺនរៀល ក្នុងនោះផងដែរ សាខាកាកបាទក្រហមបានផ្តល់មីចំនួន៤កេស ក្នុងមណ្ឌលសុខភាពសម្រាប់គ្រូពេទ្យប្រចាំការ៕

ដោយ ងូ សុមុនី