AKP កំពង់ស្ពឺ ថ្ងៃទី២១ ខែសីហា ឆ្នាំ២០២៥-- ថ្នាលបណ្តុះកូនឈើថ្នាក់តំបន់ដែលមានសមត្ថភាពអាចបណ្តុះកូនឈើបានច្រើនជាង១លានដើម បានសាងសង់រួចជាស្ថាពរ និងបានបណ្តុះកូនឈើជូនប្រជាពលរដ្ឋកម្ពុជា យកទៅដាំដុះ និងប្រើប្រាស់តាមតម្រូវការ ដោយមានភ្ជាប់ជាមួយ App សម្រាប់តាមដានការលូតលាស់ សុខភាពកូនឈើ និងការណែនាំពីការដាំដុះដែរ។ ក្នុងដំណើរចុះសួរសុខទុក្ខឧទ្យានុរក្សជួរភ្នំក្រវ៉ាញ និងពិនិត្យផ្ទាល់ ទីតាំងថ្នាលបណ្តុះកូនឈើថ្នាក់តំបន់ក្នុងភូមិសាស្រ្តឃុំតាសាល ស្រុកឱរ៉ាល់ ខេត្តកំពង់ស្ពឺរបស់លោក ច័ន្ទថេត ថានរៈ ប្រធានមន្ទីរបរិស្ថានខេត្តកំពង់ស្ពឺ នាថ្ងៃទី២០ ខែសីហា ឆ្នាំ២០២៥។

លោកប្រធានមន្ទីរបានលើកឡើងបន្តថា លើសពីសមត្ថភាពផលិតកូនឈើបានជាច្រើនជាង១លានដើមក្នុងមួយឆ្នាំ ថ្នាលបណ្តុះកូនឈើថ្នាក់តំបន់នេះ នឹងក្លាយជាទីកន្លែងទាក់ទាញទេសចរឱ្យមកទស្សនា និងថតរូបលេង។ ជាមួយគ្នានេះ ក្រៅពីការរៀបចំផលិតថ្នាលជាជួរៗ ដែលលម្អដោយកូនគ្រប់ប្រភេទពេញដោយភាពបៃតងស្រស់ ថ្នាលនេះក៏មានរចនាបន្ថែមដោយមានដាំផ្កាក្រដាស និងផ្កាចំប៉ីអម និងមានសួនច្បារស្រស់ស្អាត ដែលផ្តល់ជាកន្លែងមានម្លប់ត្រឈឹងត្រឈៃសម្រាប់អង្គុយលេងកម្សាន្ត មានហាងកាហ្វេ មានបន្ទប់ទឹកអនាម័យ សម្រាប់ទេសចរគយគន់ទេសភាពបែបអេកូទេសចរណ៍របស់កម្ពុជា នៅក្នុងភូមិសាស្រ្តស្រុកឱរ៉ាល់ ដែលមានភាពផ្សារភ្ជាប់ទៅនឹងតំបន់អេកូទេសចរណ៍ផ្សេងៗទៀត ដែលស្ថិតក្បែរតំបន់ភូមិសាស្រ្តមួយនេះឱ្យក្លាយជារបៀងទេសចរណ៍ស្របតាមអនុសាសន៍ណែនាំដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលសម្តេចតែងយកចិត្តទុកដាក់ចំពោះការអភិវឌ្ឍដែលធ្វើឱ្យសហគមន៍មូលដ្ឋានមានជីវភាពល្អប្រសើរ និងមានភាពជាម្ចាស់នៅតាមសហគមន៍តំបន់ការពារធម្មជាតិ។

ក្នុងឱកាសនោះ លោក ច័ន្ទថេត ថានរៈ បានថ្លែងស្វាគមន៍ និងបានលើកឡើងនូវការគោរព និងដឹងគុណយ៉ាងជ្រាលជ្រៅបំផុត ចំពោះមន្ត្រីឧទ្យានុរក្សទាំងអស់ ដែលបម្រើការនៅជួរមុខនៃការអភិរក្ស។ ដោយសង្កត់ធ្ងន់ថាខេត្តកំពង់ស្ពឺសម្បូរទៅដោយធនធានធម្មជាតិហើយតំបន់ការពារធម្មជាតិគឺផ្តល់សារៈសំខាន់ទៅដល់ការអភិវឌ្ឍនៃជីវភាពជាពិសេសការលើកកម្ពស់ជីវភាពរបស់សហគមន៍មូលដ្ឋាន។

សូមជម្រាបជូនថា អនុវត្តតាមយុទ្ធសាស្រ្តបញ្ចកោណដំណាក់កាលទី១នេះ ក្រសួងបរិស្ថានបានសាងសង់ស្ថានីយ៍បណ្តុះកូនឈើថ្នាក់តំបន់ចំនួន០៥ស្ថានីយ៍ ក្នុងនោះថ្នាលបណ្តុះកូនឈើ៖ តំបន់ទី១. ៣ហិកតា សាងសង់នៅក្នុងស្រុកអូរាំងឪ ខេត្តត្បូងឃ្មុំ។ ទី២. នៅក្នុងស្រុកគូលែន ខេត្តសៀមរាប (១០ហិកតា)។ ទី៣. នៅក្នុងស្រុកឱរ៉ាល់ ខេត្តកំពង់ស្ពឺ (២០ហិកតា)។ ទី៤. នៅស្រុកកែវសីមា ខេត្តមណ្ឌលគីរី (១០ហិកតា) និងទី៥. នៅស្រុកកោះកុង ខេត្តកោះកុង (៣ហិកតា)៕

ដោយ លឹម សាន្ត