AKP ភ្នំពញ ថ្ងៃទី២១ ខែសីហា ឆ្នាំ២០២៥-- តបតាមការអញ្ជើញរបស់ក្រសួងវប្បធម៌ និងទេសចរណ៍នៃសាធារណរដ្ឋប្រជាមានិតចិន និងនាយកដ្ឋានវប្បធម៌ និងទេសចរណ៍នៃរដ្ឋបាលតំបន់ស្វយ័តខេត្តក្វាងស៊ី  ឯកឧត្តម ហាប់ ទូច រដ្ឋលេខាធិការប្រចាំការក្រសួងវប្បធម៌ និងវិចិត្រសិល្បៈ បានអញ្ជើញចូលរួមវេទិកា វេទិកាផ្លាស់ប្តូរ និងសហប្រតិបត្តិការវប្បធម៌តម្រង់ទិសអាស៊ាន ឆ្នាំ២០២៥ (2025 ASEAN-Oriented Cultural Exchange and Cooperation Forum) នៅទីក្រុង Liuzhou តំបន់ស្វយ័ត Guangxi ប្រទេសចិន ចាប់ពីថ្ងៃទី១៦ ដល់២០ ខែសីហា ឆ្នាំ២០២៥។

វេទិកានេះមានគោលបំណងចែករំលែកចំណេះដឹង និងបទពិសោធន៍ ដែលផ្តោតលើទេសចរណ៍ទីក្រុងបែបថ្មី និងការធ្វើសមាហរណកម្មរវាងសារមន្ទីរ និងបច្ចេកវិទ្យាឌីជីថល  ដើម្បីឆ្ពោះទៅពង្រឹងកិច្ចសហប្រតិបត្តិការកាន់តែស៊ីជម្រៅ រវាងសារមន្ទីរនានាក្នុងប្រទេសចិន និងបណ្តាប្រទេសសមាជិកអាស៊ាន ការអភិវឌ្ឍសារមន្ទីរ បច្ចេកវិទ្យា និងនវានុវត្តន៍ប្រកបដោយចីរភាព និងការលើកកម្ពស់វិបុលភាពនៃវិស័យវប្បធម៌ ទេសចរណ៍ និងសេដ្ឋកិច្ច  ក្នុងការរួមចំណែកកសាងសហគមន៍ ចិន-អាស៊ាន កាន់តែជិតស្និទ្ធជាមួយអនាគតរួមគ្នា។

ឯកឧត្ដម ហាប់ ទូច បានមានប្រសាសន៍ថា វេទិកា ASEAN-Oriented Cultural Exchange and Cooperation Forum ក្រោមមូលបទ "សារមន្ទីរ និង អនាគតនៃទីក្រុង" មានការអញ្ជើញចូលរួមពីថ្នាក់ដឹកនាំ និងអ្នកជំនាញក្នុងវិស័យសារមន្ទីរ និងវិស័យពាក់ព័ន្ធនៃបណ្តាប្រទេសសមាជិកអាស៊ាន-ចិន៕

ដោយ ណយ នឿន (ប្រភព៖ ក្រសួងវប្បធម៌)