AKP កំពង់ស្ពឺ ថ្ងៃ១៩ ខែសីហា ឆ្នាំ២០២៥-- ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានអញ្ជើញជាអធិបតីក្នុងពិធីបើកវគ្គផ្សព្វផ្សាយស្តីពីតួនាទី ភារកិច្ច បែបបទ និងនីតិវិធីសម្របសម្រួលដោះស្រាយបណ្តឹងរបស់ការិយាល័យប្រជាពលរដ្ឋ ដោយមានការចូលរួមពីអភិបាលរងខេត្ត ប្រធានមន្ទីរជុំវិញខេត្ត និងប្រធានកាល័យប្រជាពលរដ្ឋក្រុង-ស្រុក ប្រមាណ២០០នាក់ ដែលរៀបចំឡើងនៅសាលប្រជុំសាលាខេត្តកំពង់ស្ពឺ នាព្រឹកថ្ងៃទី១៩ ខែសីហា ឆ្នាំ២០២៥។

ឯកឧត្តមបណ្ឌិតមានប្រសាសន៍ថា វគ្គផ្សព្វផ្សាយនេះក្នុងគោលបំណង ដើម្បីផ្សព្វផ្សាយទៅដល់លោក មេភូមិ អាជីវករ សិស្សានុសិស្សលោកគ្រូអ្នកគ្រូ សាធារណជនបានជ្រាប ថាតើការិយាល័យប្រជាពលរដ្ឋមានតួនាទីរចនាសម្ព័ន្ធភារកិច្ច និងសិទ្ធិអំណាចអ្វីខ្លះ? តើអ្វីទៅជាការិយាល័យប្រជាពលរដ្ឋ?

ឯកឧត្តមបណ្ឌិតផ្តល់មតិណែនាំជូនអង្គពិធីទាំងមូលឱ្យបានយល់ជ្រួតជ្រាបអំពីរចនាសម្ព័ន្ធ តួនាទី ភារកិច្ច សមត្ថកិច្ច សិទ្ធិអំណាច ការសម្រុះសម្រួលដោះស្រាយបណ្តឹងនៅតុពិសេស ការទទួលពាក្យបណ្តឹង និងការស៊ើបអង្កេតបណ្តឹងរបស់ការិយាល័យប្រជាពលរដ្ឋ ជាពិសេសក្នុងគោលបំណងសហការពីគ្រប់អង្គភាពពាក់ព័ន្ធដើម្បីលើកកម្ពស់អភិបាលកិច្ចល្អ ក្នុងការផ្តល់សេវានៅរដ្ឋបាលថ្នាក់ក្រោមជាតិ និងសម្រុះសម្រួលដោះស្រាយបណ្ដឹងនៅក្រៅប្រព័ន្ធតុលាការក្នុងការផ្តល់សេវាសាធារណៈឱ្យមានប្រសិទ្ធភាពខ្ពស់។

ឯកឧត្តមបណ្ឌិតអភិបាលខេត្តបានបញ្ជាក់ថារាជរដ្ឋាភិបាលបានចេញនូវអនុក្រឹត្យលេខ១៩អនក្រ.បក ចុះថ្ងៃទី០៨ ខែកុម្ភៈឆ្នាំ ២០១៧ ស្ដីពីការបង្កើតការិយាល័យប្រជាពលរដ្ឋ នៅរដ្ឋបាលថ្នាក់ក្រោមជាតិក្នុងគោលបំណងលើកកម្ពស់អភិបាលកិច្ចល្អ ក្នុងការផ្ដល់សេវានៅរដ្ឋបាលថ្នាក់ក្រោមជាតិ ក្នុងការទទួលសម្របសម្រួលដោះស្រាយបណ្ដឹងនៅក្រៅប្រព័ន្ធតុលាការ ដែលពាក់ព័ន្ធនិងការផ្ដល់សេវាសាធារណៈ៕

ដោយ លឹម សាន្ត